Te Tusi i te Lua ki te Kau i Tesalonia 2:1-17

  • Te tino solitulafono (1-12)

  • Fakamalosiga ke tu ‵mautakitaki (13-17)

2  Kae e pelā mo te fakatasi mai o te ‵tou Aliki ko Iesu Keliso,+ e oku taina, mo te fakamaopoopoga o tatou ki a ia,+ e fakamolemole atu matou ki a koutou,  ke se vave o ‵numi otou mafaufau io me ‵poi e auala i se fakamatalaga fakaosofia*+ io me se fekau fai gutu io me e auala i se tusi e pelā me ne avatu ne matou me i te aso o Ieova*+ ko oti ne oko mai.  Ke mo a ma fakaloiloi* koutou ne se tino i so se feitu, me ka se oko mai te aso tenā seiloga ke oko muamua mai te aposetasi*+ mo te fakaasimaiga o te tino solitulafono,+ telā ko te tama o te fakaseaiga.+  E ‵teke atu a ia kae fakamaluga aka a ia eiloa ke maluga atu i mea katoa kolā e taku ko atua io me se mea e tapuaki* ki ei a tino, ko te mea ke sagasaga a ia ki lalo i te faletapu o te Atua, kae fakaasi atu ki tino katoa i a ia se atua.  E a, ko se masaua ne koutou, me ne fai sāle atu ne au ki a koutou a mea konei i te taimi ne ‵nofo fakatasi ei tatou?  Kae nei la ko iloa ne koutou a te mea telā e taofiofi ne ia te tino solitulafono, ko te mea ke fakaasi faka‵sau mai a ia i tena taimi tonu.  E tonu, ko leva ne galue te uiga solitulafono tenei i se auala ‵funa,+ kae e ‵funa aka fua ke oko ki te taimi e galo atu ei a te tino telā e taofiofi ne ia te mea tenā.  Tenā ko fakaasi mai ei te tino solitulafono, telā ka fakaseai ne te Aliki ko Iesu e auala i te ‵mana telā e vau i tena gutu,+ kae ka fakaseai te tino tenā māfai ko lavea atu*+ tena fakatasi mai.  Kae ko te fakatasi mai o te tino solitulafono e māfua mai eiloa i a Satani+ mo ana galuega ‵mana katoa mo fakailoga mo mea fakaofoofogia ‵loi katoa+ 10  mo amioga sē fakamaoni+ katoa mō tino kolā ka fakaseai, e pelā me se fakasalaga me ne seki talia ne latou te munatonu ko te mea ke ‵sao latou. 11  Tenā eiloa te pogai ne talia ei ne te Atua ke faka‵se latou ne mea fakaloi‵loi penā, ko te mea ke tali‵tonu latou ki te loi tenā,+ 12  ko te mea ke fakamasino a latou katoa me ne seki tali‵tonu latou ki te munatonu kae ne fia‵fia fua ki faifaiga sē fakamaoni. 13  E tiga te feitu tenā, e ‵tau faeloa o fakafetai matou ki te Atua mō koutou, e oku taina kolā e alofa ki ei a Ieova,* me ne filifili koutou+ ne te Atua mai i te kamataga mō te fakaolataga e auala i te fakatapuga o koutou+ ki tena agaga kae e auala i te otou fakatuanaki ki te munatonu. 14  Ne kalaga ne ia koutou ki te mea tenei e auala i te tala ‵lei telā e folafola atu ne matou, ko te mea ke maua ne koutou te ‵malu o te ‵tou Aliki ko Iesu Keliso.+ 15  Tela la, e oku taina, ke tu ‵mautakitaki+ koutou kae puke ‵mau ki mea ko oti ne akoako atu ki a koutou,+ faitalia me ne auala atu i se fekau fai gutu io me se tusi mai i a matou. 16  E se gata i ei, ke i luga i a koutou te ‵tou Aliki ko Iesu Keliso mo te Atua te ‵tou Tamana, kolā e a‵lofa mai ki a tatou+ kae tuku mai foki ne lāua a fakamafanafanaga se-gata-mai mo te fakamoemoega ‵lei+ e auala i te alofa tauanoa, 17  ke fakamafanafana atu ki otou loto kae faka‵mautakitaki* ne ia koutou i galuega mo pati katoa e fai ne koutou.

Fakamatalaga mai lalo

Io me “e auala i se agaga.” Onoono ki te FP, “Agaga.”
Onoono ki te MF A5.
Io me “takolekole koutou.”
Io me “ko te fulitua ki te tapuakiga tonu.”
Io me “fakaaloalo.”
Eleni, “te taimi e fakaasi mai ei tena fakatasi mai.”
Onoono ki te MF A5.
Io me “fakamalosi koutou.”