Te Lua Nofoaiga Tupu 9:1-31

  • Ko āsi mai te tupu fafine o Seepa ki a Solomona (1-12)

  • Te maumea o Solomona (13-28)

  • Te mate o Solomona (29-31)

9  Ne logo a te tupu fafine o Seepa+ e uiga ki a Solomona, tenā ne vau ei tou fafine ki Ielusalema o tofotofo a Solomona ki fesili faiga‵ta.* Ne o‵mai fakatasi mo ia se kaumalaga e tokouke, fakatasi mo kamela e aumai i ei a sinu pasama mo aulo+ e uke ‵ki mo fatu tāua. Ne fanatu tou fafine ki loto i a Solomona kae faipati atu ki a ia e uiga ki mea katoa i tena loto.+  Tenā ne tali ei ne Solomona ana fesili katoa. E seai eiloa se mea ne faigata ki a* Solomona ke fakamatala atu ki tou fafine.  I te laveaga ne te tupu fafine o Seepa a te poto o Solomona,+ te fale ne faite ne ia,+  meakai i tena taipola,+ te auala e saga‵saga ei ana tavini, galuega a ana tino laulau meakai mo olotou gatu, ana tino fai meainu mo olotou gatu, mo ana taulaga ‵sunu kolā e ofo atu faeloa ne ia i te fale o Ieova,+ ne ofo malosi* eiloa tou fafine i ei.  Ne fai atu tou fafine ki te tupu: “A te tala ne logo au i ei i toku fenua e uiga ki au mea e fai* mo tou poto se tala tonu eiloa.  Kae ne seki fia talitonu au ki tala konā ke oko ki te taimi ne vau ei au ke lavea eiloa ne au ki oku mata.+ Kae kiloke! A mea ne logo au i ei e se ko te āfa foki o tou poto fakaofoofogia.+ A koe ko sili fakafia atu i te tala ne logo au i ei.+  E fia‵fia eiloa ou tāgata, kae e fia‵fia foki au tavini kolā e ‵tu faeloa i ou mua o fakalogo‵logo ki tou poto!  Ke vikia a Ieova tou Atua, telā ne fiafia ki a koe mai te tukuatuga o koe ki luga i tena nofogaaliki ke fai mo tupu a Ieova tou Atua. Ona ko tou Atua e alofa ki tino Isalaelu,+ ne fakasopo aka ne ia koe ke fai mo tupu o fai a fakamasinoga ‵tonu kae amio‵tonu, ko te mea ke tumau i ei ki te se-gata-mai.”  Tenā ne tuku atu ei ne tou fafine ki te tupu a taleni* aulo+ e 120 mo sinu pasama e uke ‵ki mo fatu tāua. Ne seki ai eiloa se aofaki lasi o sinu pasama ne aumai ki konā e pelā mo mea ne avatu ne te tupu fafine o Seepa ki te Tupu ko Solomona.+ 10  E se gata i ei, a tavini a Hilamo mo tavini a Solomona kolā ne aumai ne latou a aulo mai Ofeila+ ne aumai foki ne latou a laupapa asi mo fatu tāua.+ 11  Ne faite ne te tupu mai laupapa asi a kakega mō te fale o Ieova+ mo te fale* o te tupu,+ e pelā foki mo kitala mo mea fakatagi‵tagi e isi ne uka i ei mō ana tino usuusu.+ E seki ai eiloa ne laupapa penā kai lavea atu muamua i te fenua o Iuta. 12  Ne tuku atu foki ne te Tupu ko Solomona ki te tupu fafine o Seepa so se mea ne manako kae fakamolemole mai a ia ki ei, e sili atu* i ana mea ne vau mo ia ki te tupu. Oti aka, foki ei tou fafine ki tena fenua fakatasi mo ana tavini.+ 13  Kae ko te ‵mafa o aulo ne maua ne Solomona i te tausaga e tasi e ‵tusa mo te 666 taleni aulo,+ 14  i tafa o mea ne aumai ne tino faipisinisi mo mea kolā ne maua mai i mea ne fakatau atu mo mea mai tupu katoa o Alapi mo kovana o te fenua kolā ne aumai ne latou a aulo mo siliva ki a Solomona.+ 15  Ne faite ne te Tupu ko Solomona e 200 talita ‵lasi mai aulo ne palu+ (e 600 sekela* o aulo ne fakaaoga ki talita takitasi)+ 16  kae 300 talita fo‵liki mai te aulo ne palu (e tolu mina* o aulo ne fakaaoga ki talita fo‵liki takitasi). Tenā ne tuku ei ne te tupu a mea konā i te Fale o te Vao o Lepanona.+ 17  Ne faite foki ne te tupu se nofogaaliki lasi ki nifo o elefane kae ufi ki te tinā aulo.+ 18  E ono a sitepu ki luga i te nofogaaliki, kae e isi se mea tuku vae aulo e ‵piki ki te nofogaaliki, kae e isi ne mea tuku lima i te avā feitu o te nofoga, kae e lua a leona+ e ‵tu i tafa o mea tuku lima konā. 19  Kae e 12 a leona+ e ‵tu i sitepu e ono konā, e takitasi i mata o sitepu e ono. E seai se isi malo ne fai ne ia se mea penei. 20  A ipu inu katoa a te Tupu ko Solomona ne faite ki aulo, kae ko meāfale katoa o te Fale o te Vao o Lepanona ne faite ki te tinā aulo. E seai se mea ne faite ki siliva, me i siliva ne mea fua sē taulia i aso o Solomona.+ 21  Me i vakamutu a te tupu e olo sāle atu ki Talasisi+ fakatasi mo tavini a Hilamo.+ E fakatasi i loto i tausaga e tolu, a vakamutu o Talasisi e aumai ne latou a aulo e uke mo siliva mo nifo o elefane,+ magiki, mo pikoki. 22  Tela la, a te Tupu ko Solomona e sili atu i nisi tupu katoa o te lalolagi i te maumea mo te poto.+ 23  Kae ko tupu i te lalolagi kātoa ne ma‵nako o fetaui mo* Solomona ke fakalogo‵logo ki tena poto telā ne tuku atu ne te Atua ki tena loto.+ 24  Ne aumai ne latou taki tokotasi se meaalofa—ne mea e faite ki siliva, mea e faite ki aulo, gatu,+ meatau, sinu pasama, solofanua, mo miula—kae ne fai faeloa penei i tausaga takitasi. 25  Kae ko Solomona e 4,000 ana fale tausi solofanua mo kaliota kae 12,000 solofanua,*+ kae ne tausi ne ia i fakai e faka‵tu ei ana kaliota kae pili mai ki te tupu i Ielusalema.+ 26  Kae ne pule atu a ia ki tupu katoa mai te Vaitafe* ke oko ki te fenua o tino Filisitia mo te tuakoi o Aikupito.+ 27  Ne faite ne te tupu a siliva i Ielusalema ke uke e pelā mo fatu, kae ko laupapa alasi ke uke e pelā mo lakau ko sukamolo i te Sefila.+ 28  Kae ne aumai ne latou a solofanua ki a Solomona mai i Aikupito+ mo nisi fenua aka katoa. 29  Kae ko te tala fakasolopito kātoa o Solomona,+ mai te kamataga ke oko ki te fakaotiga, e a, e se tusi katoa i tusi a Natano+ te pelofeta, i valoaga a Aita+ te tino Sailo, mo tusi e fakamau ei a fakaasiga a Ito+ te tino fakamatala fakaasiga e uiga ki a Ielopoamo,+ te tama tagata a Nepata? 30  Ne pule atu a Solomona i Ielusalema ki luga i Isalaelu kātoa i tausaga e 40. 31  Tenā ne takato ifo ei a Solomona o malō‵lo fakatasi mo ana tupuga. Ne tanu ne latou a ia i te Fakai o Tavita tena tamana;+ kae ko tena tama tagata ko Leopoamo ne fai mo tupu e sui ei a ia.+

Fakamatalaga mai lalo

Io me “tupua.”
Epelu, “e seai se mea ne ‵funa mai i a.”
Epelu, “ko seai se agaga i loto i a ia.”
Io me “pati.”
A te taleni e ‵pau mo te 34.2 kk. Onoono ki te MF E14.
Io me “palesi.”
Io me kāti, “i tafa o meaalofa kolā e fetaui mo te ‵togi o.”
A te sekela e ‵pau mo te 11.4 kalame. Onoono ki te MF E14.
A te mina i Tusitusiga Epelu e ‵pau mo te 570 kalame. Onoono ki te MF E14.
Epelu, “‵sala ki mata o.”
Io me “tāgata faka‵tele solofanua.”
Telā ko te Eufilate.