Te Lua Nofoaiga Tupu 36:1-23

  • Ioasasa, te tupu o Iuta (1-3)

  • Ieoiakimo, te tupu o Iuta (4-8)

  • Ieoiakini, te tupu o Iuta (9, 10)

  • Setekaia, te tupu Iuta (11-14)

  • Te fakaseaiga o Ielusalema (15-21)

  • Te fakatonuga a Kulesa ke toe faite te faletapu (22, 23)

36  Tenā ne puke ei ne tino o te fenua a Ioasasa+ te tama tagata a Iosia ke fai mo tupu i Ielusalema e sui ei tena tamana.+  Ko 23 tausaga o Ioasasa i te taimi ne fai ei a ia mo tupu, kae ne pule a ia i masina e tolu i Ielusalema.  Kae ne ave kea‵tea a ia ne te tupu o Aikupito mai Ielusalema kae fakasala a te fenua ki te 100 taleni* siliva mo te taleni aulo e tasi.+  E se gata i ei, ne fai ne te tupu o Aikupito a te taina o Ioasasa ko Eliakimo ke fai mo tupu o Iuta mo Ielusalema kae ‵fuli tena igoa ki a Ieoiakimo; kae ne puke ne Neko+ a tena taina ko Ioasasa o aumai ki Aikupito.+  Ko 25 tausaga o Ieoiakimo+ i te taimi ne fai ei a ia mo tupu, kae ne pule a ia i tausaga e 11 i Ielusalema. Ne fai faeloa ne ia a mea ma‵sei i te kilokiloga a Ieova tena Atua.+  Ne vau te tupu o Papelonia ko Nepukanesa+ o taua atu ki a ia ko te mea ke saisai a ia ki pikifao kopa e lua kae ave ki Papelonia.+  Kae ne puke ne Nepukanesa a nisi meāfale o te fale o Ieova ki Papelonia kae tuku atu ki loto i tena palesi i Papelonia.+  Kae ko te tala fakasolopito kātoa o Ieoiakimo, mea fakatakalia‵lia ne fai ne ia mo tala sē ‵lei e uiga ki a ia, e tusi katoa i te Tusi o Tupu o Isalaelu mo Iuta; kae ko tena tama tagata ko Ieoiakini ne fai mo tupu e sui ei a ia.+  Ko 18 tausaga o Ieoiakini+ i te taimi ne fai ei a ia mo tupu, kae ne pule a ia i masina e tolu mo aso e sefulu i Ielusalema; kae ne fai faeloa ne ia a mea ma‵sei i te kilokiloga a Ieova.+ 10  I te kamataga o te tausaga, ne uga atu te fekau a te Tupu ko Nepukanesa ke aumai a ia ki Papelonia,+ fakatasi mo mea tāua i loto i te fale o Ieova.+ Kae ne fai ne ia a Setekaia te taina o tena tamana ke fai mo tupu i Iuta mo Ielusalema.+ 11  Ko 21 tausaga o Setekaia+ i te taimi ne fai ei a ia mo tupu, kae ne pule a ia i tausaga e 11 i Ielusalema.+ 12  Ne fai faeloa ne ia a mea ma‵sei i te kilokiloga a Ieova tena Atua. Ne seki loto maulalo a ia i mua o te pelofeta ko Ielemia,+ telā ne faipati mai i te fakatonuga a Ieova. 13  Ne ‵teke foki a ia ki te Tupu ko Nepukanesa,+ telā ne fai atu ke tauto a ia i mua o te Atua, kae ne tumau loa a ia i te loto ‵fika kae loto makeke kae ita ma ‵fuli atu ki a Ieova te Atua o Isalaelu. 14  A takitaki katoa o faitaulaga e pelā foki mo tino ko oko eiloa i te sē fakamaoni, kae fai ne latou a mea fakatakalia‵lia katoa mai nisi fenua, kae fakalailai ne latou te fale o Ieova+ telā ko oti ne fakatapu ne ia i Ielusalema. 15  A Ieova te Atua o olotou tupuga ne fakamasaua atu faeloa ki a latou i taimi katoa e auala i ana avefekau, ona ko tena alofa atafai ki ana tino mo te fakatāua ne ia o tena koga nofo. 16  Kae ne fakatauemu faeloa latou ki avefekau a te Atua tonu,+ kae fakaseaoga ne latou ana pati+ kae fakaitaita atu ki ana pelofeta,+ ke oko ki te taimi ko kaitaua ei a Ieova ki ana tino,+ mo te taimi ko se mafai ei o fai se faka‵leiga ki a latou. 17  Ne uga mai ne ia a te tupu o tino Kaletaia+ ke taua atu ki a latou, tamate ei ne ia olotou tamataene ki te pelu+ i loto i te lotou koga tapuaki;+ e seai se alofa atafai o ia ki se tamataene io me se tamafine, se tino matua io me se tino masaki.+ Ne tuku atu ne te Atua a mea katoa ki ana lima.+ 18  A meāfale katoa o te fale o te Atua tonu, ko mea ‵lasi mo mea fo‵liki, e pelā foki mo koloa i te fale o Ieova mo koloa o te tupu mo ana pelenise, ne aumai katoa ne ia ki Papelonia.+ 19  Ne ‵sunu ne ia ki lalo te fale o te Atua tonu,+ ofa ki lalo a ‵pui o Ielusalema,+ ‵sunu ana taoa ma‵losi katoa ki te afi, kae fakama‵sei a mea tāua katoa.+ 20  Ne ave fakapagota ne ia ki Papelonia a latou kolā ne ‵sao i te pelu,+ kae ne fai latou mo tavini ki a ia+ mo ana tama tāgata ke oko ki te taimi ne kamata ei o pule a te malo o Pelesia,+ 21  ke fakataunu ei a pati a Ieova ne fai e auala i a Ielemia,+ ke oko ki te taimi ko toe ‵togi ei ne te fenua ana sapati.+ I aso katoa kolā ne lavaki i ei ne tausi eiloa ki te sapati, ke kātoa a tausaga e 70.+ 22  I te tausaga muamua o te tupu o Pelesia ko Kulesa,+ ne fakamalosi aka ne Ieova a te loto o te tupu o Pelesia ko Kulesa ke fai se faka‵pulaga i tena malo kātoa, ko te mea ke fakataunu ei a pati a Ieova ne fai e auala i a Ielemia+ kae ne tusi foki ne ia ki lalo,+ ana muna: 23  “Konei a pati a te tupu o Pelesia ko Kulesa ne fai mai, ‘A Ieova te Atua o te lagi ne tuku mai ne ia ki a au a malo katoa o te lalolagi,+ kae ne fakatonu ne ia au ke faite se fale mō ia i Ielusalema, i Iuta.+ So se tino i a koutou e aofia i ana tino, ke fakatasi atu a Ieova tena Atua ki a ia, kae ke fano a ia ki konā.’”+

Fakamatalaga mai lalo

A te taleni e ‵pau mo te 34.2 kk. Onoono ki te MF E14.