Te Lua Nofoaiga Tupu 34:1-33

  • Iosia, te tupu o Iuta (1, 2)

  • Fakamafulifuliga ne fai ne Iosia (3-13)

  • Ko maua te tusi o te Tulafono (14-21)

  • Te valoaga a te pelofeta ko Hulita e uiga ki te puapuaga (22-28)

  • Ko faitau atu ne Iosia te tusi ki tino (29-33)

34  Ko valu tausaga o Iosia+ i te taimi ne fai ei a ia mo tupu, kae ne pule a ia i tausaga e 31 i Ielusalema.+  Ne fai ne ia te mea tonu i te kilokiloga a Ieova kae sasale i auala o Tavita tena tupuga, kae ne seki ‵fuli atu a ia ki te feitu fakaatamai io me ko te feitu fakamaui.  I te valu tausaga o tena pulega, i te taimi koi tamaliki ei a ia, ne kamata a ia o ‵sala ki te Atua o Tavita tena tupuga;+ kae i te 12 o tausaga, ne kamata o faka‵ma ne ia a Iuta mo Ielusalema+ mai koga ma‵luga+ mo pou lakau tapu,* tupua matagā+ mo tupua fiti.  E se gata i ei, ne ofa ki lalo ne latou a fatafaitaulaga o Paala i ana mua, kae ne ‵kati ne ia ki lalo a tulaga e ofo atu i ei a mea ma‵nogi kolā e ‵tu mai luga o latou. Ne ofa likiliki foki ne ia a pou lakau tapu,* tupua matagā, mo tupua fiti kae tuki ke liu pauta kae laku i luga i tanuga o tino kolā ne ofo sāle olotou taulaga ki mea konā.+  Kae ne ‵sunu ne ia a ivi o faitaulaga i luga i olotou fatafaitaulaga.+ Tenā ne faka‵ma ei ne ia a Iuta mo Ielusalema.  Kae i fakai o Manase, Efalaima,+ Simeona ke oko atu eiloa ki Nafatali, i koga kolā ne fakamaseigina i olotou tafa,  ne ofa ne ia ki lalo a fatafaitaulaga kae tuki ke malipi‵lipi a pou lakau tapu* mo tupua matagā,+ ke liu pauta; kae ne ‵kati ne ia ki lalo a tulaga katoa e ofo atu i ei a mea ma‵nogi i te fenua kātoa o Isalaelu,+ oti aka foki atu ei a ia ki Ielusalema.  I te 18 tausaga o tena pulega, i te otiga ne faka‵ma ne ia te fenua mo te faletapu,* ne uga atu ne ia a Safana+ te tama tagata a Asalaia, Maseia te takitaki o te fakai, mo Ioaha te tama tagata a Ioase te tino fakamau fakamatalaga ke toe faite faka‵lei ne latou te fale o Ieova tena Atua.+  Ne o‵mai latou ki a Hilikia te faitaulaga sili kae tuku atu ki ei a tupe kolā ne avatu ki te fale o te Atua, kolā ne ‵tae ne tino Levi kolā e tavini e pelā me ne tino tausi mataloa mai i Manase, Efalaima mo Isalaelu kātoa,+ e pelā foki mo Iuta, Peniamina, mo tino Ielusalema. 10  Tenā ne tuku atu ei ne latou a tupe ki tino kolā ne ‵tofi aka ke onoono ki te faiga o te galuega i te fale o Ieova. I konā ne fakaaoga ei ne tino ga‵lue i te fale o Ieova ke faite kae faka‵lei ki ei te fale. 11  Ne tuku atu ne latou a tupe ki tufuga faite mea mo kamuta ke ‵togi ki ei a fatu kolā ne ‵kati mo laupapa mo fai a pelesese kae ke faite a ‵saga o te fale kolā ne talia ne tupu o Iuta ke fakamasei.+ 12  Kae ne fai ne tāgata konei a te galuega mo te fakamaoni.+ Ne ‵tofi aka a tino Levi ko Iaata mo Opetaia mai tino Melali+ ke onoono ki te faiga ne latou o te galuega, kae ko Sakalia mo Mesulama mai tino Koate+ ke tavini atu e pelā me ne ovasia. Kae ko tino Levi, ko latou katoa kolā e apo i mea tau pese,+ 13  e pule i tino ga‵lue masani* kae ko ovasia o latou katoa kolā e fai a galuega i vaega kese‵kese o te taviniga; kae ko nisi tino Levi ne failautusi, ofisa, mo tino tausi mataloa.+ 14  I te taimi ne tapale ei ne latou ki tua a tupe kolā ne aumai ki te fale o Ieova,+ ne maua aka ne Hilikia te faitaulaga te tusi o te Tulafono a Ieova+ telā ne tuku mai e auala* i a Mose.+ 15  Ne fai atu a Hilikia ki a Safana te failautusi: “Ko oti ne maua ne au te tusi o te Tulafono i te fale o Ieova.” I konā loa ne tuku atu ei ne Hilikia te tusi ki a Safana. 16  Tenā ne aumai ei ne Safana a te tusi ki te tupu kae fai atu ki ei: “Au tavini e fai eiloa ne latou a mea katoa kolā ne fakatonu atu ki a latou. 17  Ko oti ‵ligi ne latou ki tua a tupe kolā ne maua i te fale o Ieova kae ko oti ne tuku atu ne latou ki tāgata kolā ne ‵tofi aka penā foki loa mo latou kolā e fai te galuega.” 18  Ne fai atu foki a Safana te failautusi ki te tupu: “E isi se tusi ne tuku mai ne Hilikia te faitaulaga ki a au.”+ Tenā ne kamata ei o faitau atu ne Safana i mua o te tupu.+ 19  I te taimi eiloa ne lagona ei ne te tupu a pati o te Tulafono, ne saesae ne ia ana gatu.+ 20  Tenā ne tuku atu ei ne te tupu a te fakatonuga tenei ki a Hilikia, Aikamo+ te tama tagata a Safana, Apatonu te tama tagata a Mika, Safana te failautusi mo Asaia te tavini a te tupu: 21  “Olo o sui au mo tino kolā e ‵toe i Isalaelu mo Iuta kae fesili atu ki a Ieova e uiga ki pati o te tusi telā ne maua aka; me i te kaitaua o Ieova telā ka ‵ligi mai ki a tatou ko oko eiloa i te lasi me i ‵tou tupuga ne seki fai ne latou a pati a Ieova mai te tausi ki mea katoa kolā e tusi i loto i te tusi tenei.”+ 22  Tenā ne olo atu ei a Hilikia, fakatasi mo latou kolā ne uga atu ne te tupu ki a Hulita te pelofeta fafine.+ A ia ko te avaga a Saluma te tama tagata a Tikava te tama tagata a Halase, te tino tausi o te sefe gatu, kae ne nofo a ia i te fakai fou o Ielusalema; kae ne fai‵pati atu latou ki tou fafine i konā.+ 23  Ne fai atu tou fafine ki a latou: “Konei a pati ne fai mai ne Ieova te Atua o Isalaelu, ‘Fai ki te tagata ne uga mai ne ia koutou ki a au: 24  “Konei a pati ne fai mai ne Ieova, ‘Ka aumai ne au te puapuaga ki te koga tenei fakatasi mo ana tino,+ ko mala katoa kolā e tusi i loto i te tusi+ telā ne faitau ne latou i mua o te tupu o Iuta. 25  Me ne tiakina ne latou au+ kae ko fai nei ke fanaka te au mai olotou taulaga ki nisi atua ko te mea ke kaitaua au+ ki olotou galuega katoa, a toku kaitaua ka ‵ligi atu ki luga i te koga tenei kae ka se mafai o tamate.’”+ 26  Kae e pelā mo te tupu o Iuta telā ne uga mai ne ia koutou ke o‵mai o fesili atu ki a Ieova, konei otou pati e ‵tau fai ki a ia, “Konei a pati a Ieova te Atua o Isalaelu ne fai mai: ‘E uiga ki pati ne lagona ne koe,+ 27  ona ko koe ne saga tonu mai mo te loto maulalo i mua o te Atua i te lagonaga ne koe ana pati e uiga ki te koga tenei mo ana tino kae ne loto maulalo koe i oku mua kae ne saesae ne koe ou gatu kae tagi mautuutu i oku mua, ko oti foki ne lagona ne au koe,+ ko te folafolaga a Ieova. 28  Tenā te pogai ka fai ei ne au ke fakatasi atu koe ki ou tupuga,* kae ka takato koe i loto i tou tanuga mo te filemu, kae ka se lavea ne koe ki ou mata a puapuaga katoa kolā ka aumai ne au ki te koga tenei mo ana tino.’”’”+ Tenā ne aumai ei ne latou a te tali ki te tupu. 29  Ne uga atu te fekau a te tupu ke fakamaopoopo mai a toeaina katoa o Iuta mo Ielusalema.+ 30  Oti aka, ne fanatu te tupu ki te fale o Ieova fakatasi mo tāgata katoa o Iuta, ko tino Ielusalema, ko faitaulaga, tino Levi—ko tino katoa, tino ma‵tua e pelā foki mo tama‵liki. Ne faitau atu ne ia ke lagona ne latou a pati katoa i te tusi o te feagaiga telā ne maua i te fale o Ieova.+ 31  Ne tu a te tupu i tena tulaga kae fai ne ia se feagaiga*+ i mua o Ieova me ka tautali eiloa a ia i a Ieova kae tausi ana fakatonuga, ana fakamasauaga mo ana tulafono fo‵liki mo tena loto kātoa mo tena ola*+ kātoa mai te faiga ne ia o pati katoa o te feagaiga kolā ne tusi i te tusi tenei.+ 32  E se gata i ei, ne fai ne ia a latou katoa kolā e ‵nofo atu i Ielusalema mo Peniamina ke lotoma‵lie ki te mea tenā. Kae ne gasue‵sue a tino Ielusalema e ‵tusa mo te feagaiga a te Atua, ko te Atua o olotou tupuga.+ 33  Tenā ne tapale ei kea‵tea ne Iosia a mea fakatakalia‵lia* katoa mai te fenua kātoa o tino Isalaelu,+ kae ne fai ne ia a tino katoa i Isalaelu ke tavini atu ki a Ieova te lotou Atua. I tena olaga kātoa,* ne seki ‵fuli kea‵tea eiloa a latou mai te tautali atu i a Ieova te Atua o olotou tupuga.

Fakamatalaga mai lalo

Onoono ki te FP.
Onoono ki te FP.
Onoono ki te FP.
Epelu, “fale.”
Io me “tino galue ‵mafa.”
Epelu, “e auala i te lima o.”
A te mea tenei se tugapati fakauiga telā e fakasino atu ki te mate.
Io me “fakafou te feagaiga.”
Onoono ki te FP.
Io me “tupua.”
Epelu, “I ana aso katoa.”