Te Lua Nofoaiga Tupu 33:1-25

  • Manase, te tupu o Iuta (1-9)

  • Ko salamō a Manase ona ko ana mea ma‵sei (10-17)

  • Te mate o Manase (18-20)

  • Amone, te tupu o Iuta (21-25)

33  Ko 12 tausaga o Manase+ i te taimi ne fai ei a ia mo tupu, kae ne pule a ia i tausaga e 55 i Ielusalema.+  Ne fai ne ia a mea ma‵sei i te kilokiloga a Ieova, mai te tautali atu i faifaiga fakatakalia‵lia a atufenua kolā ne afuli kea‵tea ne Ieova i mua o tino Isalaelu.+  Ne toe faite ne ia a koga ma‵luga kolā ne ofa ki lalo+ ne tena tamana ko Hesekia, ne faka‵tu ne ia a fatafaitaulaga ki a Paala kae faite a pou lakau tapu,* kae ne ifo a ia ki te kautau kātoa o te lagi kae tavini atu ki a latou.+  Ne faite foki ne ia a fatafaitaulaga i te fale o Ieova,+ telā ne fai mai ei a Ieova: “A toku igoa ka tuku i Ielusalema ki te se-gata-mai.”+  Kae ne faite ne ia a fatafaitaulaga ki te kautau kātoa o te lagi i koga ateatea e lua i te fale o Ieova.+  Kae ne ‵sunu ne ia ana tama tāgata i te afi*+ i te Vanu o te Tama Tāgata a Hinomo;+ ne fai ne ia a faifaiga faivailakau,+ fakaaoga a mea fakataulaitu, e fai tapune, kae ‵tofi aka ne ia a tino e fesokotaki mo agaga mo tino fakamatala mea ‵tupu i aso mai mua.+ Ne fai ne ia a mea matagā e uke i te kilokiloga a Ieova, telā ne fai ei ke kaitaua a ia.  Ne tuku ne ia te tupua telā ne faite ne ia ki loto i te fale o te Atua tonu+ telā ne fai atu a te Atua ki a Tavita mo tena tama tagata ko Solomona: “I loto i te fale tenei mo Ielusalema, kolā ne filifili ne au mai matakāiga katoa o Isalaelu, ka tuku ne au i ei toku igoa ki te se-gata-mai.+  Kae ka se toe ave kea‵tea eiloa ne au a vae o Isalaelu mai te laukele telā ne ‵tofi ne au ki olotou tupuga, māfai fua e faka‵logo faka‵lei latou ki mea katoa kolā ne fakatonu atu ne au ki a latou, ko te Tulafono kātoa, tulafono fo‵liki, mo ikuga o fakamasinoga kolā ne tuku mai e auala i a Mose.”  Ne tumau eiloa a Manase i te takitaki ‵se ne ia a Iuta mo tino Ielusalema, kae fai ne ia latou ke sili atu te ma‵sei o olotou mea e fai i lō atufenua kolā ne ‵ta fakapalele ne Ieova i mua o tino Isalaelu.+ 10  Ne tumau eiloa a Ieova i te faipati atu ki a Manase mo ana tino, kae ne seki fia ‵saga mai latou.+ 11  Ne aumai ne Ieova a takitaki o kautau o te tupu o Asulia ke taua atu ki a latou, kae ne puke fakapagota ne latou a Manase ki kafilo* kae saisai a ia ki pikifao kopa e lua kae ave a ia ki Papelonia. 12  Ona ko tena mafatia, ne fakamolemole atu a ia ki a Ieova tena Atua ke maua tena taliaga kae ne loto maulalo faeloa a ia i mua o te Atua o ana tupuga. 13  Ne ‵talo atu faeloa tou tagata ki a Ia, kae ona ko tena fakatagi ne otia te loto o te Atua kae lagona ne Ia tena fakatagi ke maua tena taliaga, kae ne toe fakafoki ne Ia a tou tagata ki Ielusalema ki tena tulaga fakatupu.+ Tenā ne iloa ei ne Manase i a Ieova ko te Atua tonu.+ 14  Mai tua o te mea nei, ne faite ne ia se ‵pui i tua mō te Fakai o Tavita+ i te feitu ki togala o Kaiona+ i te vanu ke oko atu eiloa ki te Mataloa o Ika,+ kae toe faka‵soko ne ia ki te suā feitu ki Ofele,+ kae fai ne ia ke maluga ‵ki. E se gata i ei, ne ‵tofi aka ne ia takitaki o te kautau i fakai katoa o Iuta. 15  Tenā ne tapale ei ne ia kea‵tea a atua fakaa‵tea mo tupua fakatusa mai te fale o Ieova+ mo fatafaitaulaga katoa kolā ne faite ne ia i te mauga o te fale o Ieova+ mo Ielusalema, kae ne fai ne ia ke ‵pei ki tua mo te fakai. 16  Ne fakatoka foki ne ia te fatafaitaulaga a Ieova+ kae kamata o ofo atu i luga i ei a taulaga ‵kai fakatasi+ mo taulaga fakafetai,+ kae fai atu a ia ki Iuta ke tavini ki a Ieova te Atua o Isalaelu. 17  E ui i ei, a tino koi ofo atu eiloa a taulaga i luga i koga ma‵luga, faitalia me e ofo atu fua ki a Ieova te lotou Atua. 18  Kae ko te tala fakasolopito kātoa o Manase, tena ‵talo ki tena Atua, mo pati a te tino fakamatala fakaasiga telā ne faipati ki a ia i te igoa o Ieova te Atua o Isalaelu, ne tusi katoa i tala fakasolopito o tupu o Isalaelu. 19  E pelā foki mo tena ‵talo+ mo te auala ne talia ei tena fakatagi, ana agasala katoa mo tena sē fakamaoni,+ ko koga ne faite ne ia i ei a koga ma‵luga kae faka‵tu i ei a pou lakau tapu*+ mo tupua matagā kae koi tuai o loto maulalo a ia, ne tusi katoa i tusi a tāgata fakamatala fakaasiga. 20  Tenā ne takato ifo ei a Manase o malō‵lo fakatasi mo ana tupuga, kae ne tanu ne latou a ia i tena fale; kae ko tena tama tagata ko Amone ne fai mo tupu e sui ei a ia.+ 21  Ko 22 tausaga o Amone+ i te taimi ne fai ei a ia mo tupu, kae ne pule a ia i Ielusalema i tausaga e lua.+ 22  Kae ne tumau a ia i te faiga o mea ma‵sei i te kilokiloga a Ieova, e pelā eiloa mo mea ne fai ne tena tamana ko Manase;+ kae ne ofo atu ne Amone a taulaga ki tupua matagā katoa kolā ne faite ne tena tamana ko Manase,+ kae tumau i te tavini atu ki a latou. 23  Kae ne seki loto maulalo a ia i mua o Ieova+ e pelā mo tena tamana ko Manase ne loto maulalo;+ i lō te fai penā, ne fai ne Amone ke gasolo aka eiloa o uke ana agasala. 24  Fakamuli ifo, ne fai ne ana tavini se togafiti o ‵teke atu ki tou tagata+ kae ne tamate ne latou a ia i tena fale eiloa. 25  Kae ko tino o te fenua ne ‵ta ne latou a tino katoa kolā ne fai te lotou togafiti o ‵teke te Tupu ko Amone,+ kae ne fai ne latou a tena tama tagata ko Iosia+ ke fai mo tupu e sui ei a ia.

Fakamatalaga mai lalo

Onoono ki te FP.
Epelu, “ave i loto i te afi.”
Io me kāti, “i loto i pūga.”
Onoono ki te FP.