Te Lua Nofoaiga Tupu 3:1-17
3 Tenā ne kamata ei o faite ne Solomona a te fale o Ieova+ i Ielusalema i luga i te Mauga o Molia,+ te koga ne fakasae atu ei a Ieova ki tena tamana ko Tavita,+ i te koga ne fakatoka ne Tavita i te koga tuki saito o Onano+ te tino Iepuse.
2 Ne kamata o faite ne ia i te lua o aso o te lua o masina, i te fa o tausaga o tena pulega.
3 Kae ko te fakavae telā ne fakatoka ne Solomona ke faite i ei te fale o te Atua tonu e 60 kupita te loa kae 20 kupita te lauefa,+ e ‵tusa mo te fuāga o mea i aso mua.*
4 A te fakaosoga i te feitu ki mua e 20 kupita te loa, telā e ‵pau mo te lauefa o te fale,* kae ko tena maluga e 120;* kae ne ufi ne ia a te feitu ki loto ki te tinā aulo.+
5 Ne ‵pui ne ia te fale lasi ki laupapa mai te iunipa, oti aka, ufi ei ne ia ki te aulo ‵lei,+ kae fakagaligali ne ia ki ata o lakau ko pama+ mo filifili.+
6 E se gata i ei, ne fakagaligali ne ia te fale ki fatu tāua kae ‵gali;+ kae ko te aulo+ ne fakaaoga ne ia ko te aulo mai Palavaimi.
7 Ne ufi ne ia a te fale, ana fuafua, laupapa o mataloa, ana ‵pui mo ana mataloa ki aulo;+ kae ne koli ne ia a ata o kelupi i luga i ‵pui.+
8 Ne faite ne ia te Potu Tafasili i te Tapu;*+ a tena loa e ‵pau mo te lauefa o te fale, e 20 kupita, kae ko tena lauefa e 20 kupita. Ne ufi ne ia ki te 600 taleni* o aulo ‵lei.+
9 A te ‵mafa o aulo mo fai a fao e 50 sekela;* kae ne ufi ne ia a potu i te tuafale ki aulo.
10 Oti aka, faite ei ne ia i loto i te Potu Tafasili i te Tapu* a fakatusa o kelupi e lua, kae ufi ne ia ki aulo.+
11 A te ‵loa o kapakau o kelupi+ e 20 kupita; a te kapakau e tasi o te kelupi muamua e lima kupita te loa kae patele ki te ‵pui o te fale, kae ko tena suā kapakau e lima kupita te loa kae patele ki te kapakau e tasi o te suā kelupi.
12 A te kapakau e tasi o te suā kelupi e lima kupita te loa kae patele ki te suā ‵pui o te fale, kae ko tena suā kapakau e lima kupita te loa kae patele ki te kapakau e tasi o te kelupi muamua.
13 A kapakau o kelupi konei e 20 kupita māfai ko ‵fola; kae e ‵tu ki lā vae kae ‵fuli ki loto.*
14 Ne fai foki ne ia te ‵pui laugatu+ ki filo lanu moana, vulu lanu violeta, filo lanu kula malosi, mo laugatu ‵lei kae ‵sui ki ei a ata o kelupi.+
15 Oti aka, faite ei ne ia e lua a pou+ i te feitu ki mua o te fale, e 35 kupita te ‵loa, kae ko ulupou i luga i pou takitasi konā e lima kupita.+
16 Kae ne fai ne ia a filifili, e pelā me ne malele, kae tuku atu ki luga i ulu o pou, kae ne fai ne ia e 100 pomekalanite kae faka‵piki atu ki luga i filifili.
17 Ne faka‵tu ne ia a pou i te feitu ki mua o te faletapu, e tasi i te feitu fakaatamai* kae tasi i te feitu fakamaui;* ne fakaigoa ne ia te pou i te fakaatamai ki a Iakini,* kae ko te pou i te fakamaui ki a Poasa.*
Fakamatalaga mai lalo
^ A te kupita masani e ‵pau mo te 44.5 sm (17.5 ini.), kae e mafau‵fau a nisi tino me i “te fuāga o mea i aso mua” e fakasino atu ki te kupita loa telā e ‵pau mo te 51.8 sm (20.4 ini.). Onoono ki te MF E14.
^ Io me “20 kupita mai te lauefa o te fale.”
^ E se mautinoa a te fuaga tenei.
^ Epelu, “fale.”
^ Epelu, “fale.”
^ Ki loto i te Potu Tapu.
^ Io me “saute.”
^ Io me “mātū.”
^ Tena uiga “Ke Faka‵mautakitaki ne Ia [telā ko Ieova].”
^ Kāti e fakauiga ki te “E Malosi.”
