Te Lua Nofoaiga Tupu 29:1-36

  • Hesekia, te tupu o Iuta (1, 2)

  • Fakamafulifuliga ne fai ne Hesekia (3-11)

  • Ko faka‵ma te faletapu (12-19)

  • Ko toe fai te taviniga i te faletapu (20-36)

29  Ko 25 tausaga o Hesekia+ i te taimi ne fai ei a ia mo tupu, kae ne pule a ia i Ielusalema i tausaga e 29. A te igoa o tena mātua ko Avia te tama fafine a Sakalia.+  Ne fai faeloa ne ia te mea tonu i te kilokiloga a Ieova,+ e pelā eiloa mo mea ne fai ne tena tupuga ko Tavita.+  I te masina muamua o te tausaga muamua o tena pulega, ne ‵tala ne ia a mataloa o te fale o Ieova kae toe fai faka‵lei ne ia.+  Tenā ne aumai ei ne ia a faitaulaga mo tino Levi kae fakamaopoopo latou i te malae i te feitu ki saegala.  Ne fai atu a ia ki a latou: “Faka‵logo mai ki a au, koutou e tino Levi. I te taimi nei, fakatapu otou foitino+ kae fakatapu a te fale o Ieova te Atua o otou tupuga, kae ave kea‵tea a mea sē ‵ma mai te koga tapu.+  Me i ‵tou tamana ne seki fakamaoni kae ne fai ne latou a mea ma‵sei i te kilokiloga a Ieova te ‵tou Atua.+ Ne tiaki ne latou a ia kae ‵fuli kea‵tea olotou mata mai te faleie tapu o Ieova kae ‵fuli olotou tua ki a ia.+  Ne ‵pono foki ne latou a mataloa o te fakaosoga+ kae tamate a moli.+ Ne taofi ne latou te ‵sunuga o mea ma‵nogi+ mo te ofoatuga o taulaga ‵sunu+ ki te Atua o Isalaelu i te koga tapu.  Tela la, ne oko mai eiloa te kaitaua o Ieova ki Iuta mo Ielusalema,+ tenā ne fai ei ne ia latou e pelā me se mea fakamataku kae fakaofoofogia mo se mea fakapoi,* e pelā eiloa mo te mea e lavea ne koe ki ou mata.+  A ‵tou tupuga ne ‵mate i te pelu,+ kae ko ‵tou tama tāgata, ‵tou tama fāfine, mo ‵tou avaga ne ave fakapagota ona ko te mea tenei.+ 10  Ko te manakoga eiloa o toku loto ke fai se feagaiga mo Ieova te Atua o Isalaelu,+ ko te mea ke se oko mai ki a tatou a tena kaitaua telā e ‵ka pelā me se afi. 11  Aku tama tāgata, e se tenei te taimi ke fakata‵mala ei koutou, me ko oti ne filifili koutou ne Ieova ke ‵tu i ana mua, ke tavini atu ki a ia,+ kae ke fai ke fanaka te au mai i ana taulaga.”+ 12  Tenā ne ‵tu aka ei a tino Levi: ko Mahata te tama tagata a Amasai mo Ioelu te tama tagata a Asalia mai tino Koate;+ mai tino Melali+ ko Kiso te tama tagata a Apiti mo Asalia te tama tagata a Iehaleli; mai tino Kelesona+ ko Ioaha te tama tagata a Sima mo Etena te tama tagata a Ioaha; 13  mai tama tāgata a Elisafana ko Similai mo Ieuelu; mai tama tāgata a Asafo+ ko Sakalia mo Matania; 14  mai tama tāgata a Hemanu+ ko Ieielu mo Simei; mai tama tāgata a Ietutunu+ ko Semaia mo Usieli. 15  Tenā ne fakamaopoopo fakatasi mai ei ne latou olotou taina kae fakatapu latou kae o‵mai o faka‵ma a te fale o Ieova, e pelā eiloa mo te fakatonuga a te tupu e ‵tusa mo pati a Ieova.+ 16  Ne olo atu a faitaulaga ki loto i te fale o Ieova o fai te faka‵māga kae aumai ki tua a mea lai‵lai katoa ne maua i loto i te faletapu o Ieova kae avatu ki te koga ateatea+ o te fale o Ieova. Kae ne puke ne tino Levi o ave ki tua ki te Vanu o Ketalono.+ 17  Tenā ne kamata ei latou o fai te fakatapuga i te aso muamua o te masina muamua, kae i te valu o aso o te masina ne oko atu latou ki te fakaosoga o te fale o Ieova.+ Ne fakatapu ne latou te fale o Ieova i te valu o aso, kae i te 16 o aso o te masina muamua ne oti ei latou. 18  Oti aka, olo atu ei latou ki loto i te Tupu ko Hesekia kae fai atu: “Ko oti ne faka‵ma ne matou a te fale kātoa o Ieova, te fatafaitaulaga o taulaga ‵sunu+ mo ana meāfale katoa+ mo te taipola o falaoa+ mo ana meāfale katoa. 19  Kae ko meāfale katoa kolā ne ave kea‵tea ne te Tupu ko Aasa i te taimi o tena pulega mo tena sē fakamaoni,+ ko oti ne fakatoka ne matou kae fakatapu foki,+ kae konā e tuku i mua o te fatafaitaulaga a Ieova.” 20  Kae ko te Tupu ko Hesekia ne tu aka i te tafataeao ‵malu kae fakamaopoopo fakatasi mai ne ia a pelenise o te fakai, kae ne olo aka latou ki luga i te fale o Ieova. 21  Ne aumai ne latou e fitu pulumakau, e fitu mamoe, e fitu mamoe tāgata kae fitu kouti tāgata mo fai se taulaga mō agasala mō te malo, mō te koga tapuaki kae penā foki mō Iuta.+ Tenā ne fai atu ei a ia ki faitaulaga, ko latou kolā ne ‵tupu mai i a Alona, ke ofo a mea konā i te fatafaitaulaga a Ieova. 22  Tenā ne tamate ei ne latou te pulumakau,+ kae puke ne faitaulaga a toto kae fakamatulutulu atu ki luga i te fatafaitaulaga;+ oti aka ne tamate ne latou a mamoe kae fakamatulutulu atu a toto ki luga i te fatafaitaulaga, kae ne tamate ne latou a mamoe tāgata kae fakamatulutulu atu a toto ki luga i te fatafaitaulaga. 23  Tenā ne aumai ei ne latou a kouti tāgata o te taulaga mō agasala ki mua o te tupu mo te fakapotopotoga kae tuku atu olotou lima ki luga i ei. 24  Ne tamate ne faitaulaga a mea konā kae ofo atu se taulaga mō agasala mo toto i ei i luga i te fatafaitaulaga, ke fai ei se faka‵māga mō Isalaelu kātoa, me ne fai mai te tupu me i te taulaga ‵sunu mo te taulaga mō agasala e ‵tau o fai mō Isalaelu kātoa. 25  I te taimi tenā, ne fai ei ne ia a tino Levi ke ‵tu i te fale o Ieova mo sumepalo, mea fakatagi‵tagi e isi ne uka i ei, mo kitala+ e auala i te fakatonuga a Tavita+ mo Kato+ te tino fakamatala fakaasiga mo Natano+ te pelofeta, me ne fai mai ne Ieova te fakatonuga tenā e auala i ana pelofeta. 26  Ne ‵tu eiloa a tino Levi mo mea fakatagi‵tagi a Tavita kae ko faitaulaga ne puke i pu.+ 27  Tenā ne fai ei te fakatonuga a Hesekia ke ofo atu te taulaga ‵sunu i luga i te fatafaitaulaga.+ I te taimi ne kamata ei o ofo atu te taulaga ‵sunu, ne kamata o usu aka te pese a Ieova kae ne faka‵tagi aka foki a pu, mai te tautali atu ki fakatonuga o mea fakatagi‵tagi a te tupu o Isalaelu ko Tavita. 28  Ne ifo ki lalo a te fakapotopotoga kātoa i te taimi ne usu ei te pese kae faka‵tagi a pu​—ne tumau eiloa a mea katoa konei ke oko ki te taimi ko palele ei te taulaga ‵sunu. 29  Kae i te taimi ne oti ei te ofoatuga o te taulaga, ne to‵tuli kae ifo ki lalo a te tupu mo tino katoa ne ‵nofo mo ia i konā. 30  Ne fai atu a te Tupu ko Hesekia mo pelenise ki tino Levi ke ‵viki atu ki a Ieova i pati a Tavita+ mo Asafo+ te tino fakamatala fakaasiga. Tenā ne ofo atu ei ne latou a vikiga mo te fia‵fia lasi, kae to‵tuli kae ifo latou ki lalo. 31  Tenā ne fai atu ei a Hesekia: “Nei la, ko oti koutou ne ‵vae kea‵tea mō Ieova, o‵mai la o aumai otou taulaga mo otou taulaga fakafetai ki te fale o Ieova.” Ne kamata o avatu ne te fakapotopotoga a taulaga mo taulaga fakafetai, kae ne avatu ne so se tino a taulaga ‵sunu+ mo te loto fiafia. 32  A te aofaki o taulaga ‵sunu kolā ne aumai ne te fakapotopotoga e 70 pulumakau, 100 mamoe, 200 mamoe tāgata—a mea katoa konei ne avatu e pelā me ne taulaga ‵sunu ki a Ieova+ 33  kae ko taulaga tapu e 600 pulumakau kae 3,000 mamoe. 34  Kae e se lava a faitaulaga ke ‵fole a pa‵kili o taulaga ‵sunu katoa, tenā ne fesoasoani atu ei olotou taina Levi ki a latou+ ke oko ki te taimi ko palele ei te galuega kae ke oko foki ki te taimi ko mafai ei o fakatapu a faitaulaga,+ me e sili atu te fakamaoni o tino Levi o fakatapu a latou eiloa i lō faitaulaga. 35  Ko oko foki eiloa i te uke o taulaga ‵sunu,+ e pelā foki mo gako o taulaga ‵kai fakatasi+ mo taulaga meainu mō taulaga ‵sunu.+ Tenā ne toe kamata ei o fai a te taviniga i te fale o Ieova. 36  Ne fia‵fia a Hesekia mo tino katoa ki mea katoa ne fai ne te Atua tonu mō tino,+ me i mea katoa konei ne mea ne ‵tupu fakavave.

Fakamatalaga mai lalo

Io me “fai fa‵kata.”