Te Lua Nofoaiga Tupu 23:1-21

  • Ko oso atu a Ieoiata; ko fai a Ioasa mo fai te tupu (1-11)

  • Ko tamate a Atalia (12-15)

  • Fakamafulifuliga ne fai ne Ieoiata (16-21)

23  I te fitu o tausaga, ne gasuesue a Ieoiata mo te loto toa kae fai se feagaiga fakatasi mo takitaki o taki tokoselau,+ ko Asalia te tama tagata a Ielohama, Isamaeli te tama tagata a Ieoananu, Asalia te tama tagata a Opeta, Maseia te tama tagata a Ataia mo Elisafata te tama tagata a Sikeli.  Tenā ne olo atu ei latou i loto i Iuta kātoa kae fakamaopoopo fakatasi a tino Levi+ mai fakai katoa o Iuta mo ulu o kāiga o Isalaelu i olotou tamana. I te lotou okoatuga ki Ielusalema,  ne fai ne te fakapotopotoga kātoa se feagaiga+ mo te tupu i te fale o te Atua tonu, oti aka fai atu ei a ia ki a latou: “Kiloke! A te tama tagata a te tupu ka fai mo pule, e pelā eiloa mo te tautoga ne fai ne Ieova e uiga ki tama tāgata a Tavita.+  Tenei te mea e ‵tau o fai ne koutou: A te tasi-vae-tolu o faitaulaga mo tino Levi kolā e ‵tu+ i te Sapati ka fai pelā me ne tino tausi mataloa;+  a te suā tasi-vae-tolu ka ‵tu i te fale* o te tupu,+ kae ko te suā tasi-vae-tolu ka ‵tu i te Mataloa o Fakavae, kae ko tino katoa ka ‵nofo i koga ateatea o te fale o Ieova.+  Sa talia se tino ke ulu ki loto i te fale o Ieova kae na ko faitaulaga fua mo tino Levi kolā e fai ne latou te taviniga.+ E mafai o ulu mai a latou konei me i a latou se potukau tapu, kae ka tausi ne tino katoa a te tiute o latou ki a Ieova.  E ‵tau mo tino Levi o fakatamilo ne latou te tupu i ana feitu katoa, ko tino taki tokotasi mo olotou meatau i olotou lima. So se tino e ulu mai ki loto i te fale e ‵tau o tamate. Olo faeloa mo te tupu i so se koga e fano a ia ki ei.”*  Ne fai eiloa ne tino Levi mo Iuta kātoa a mea kolā ne fakatonu atu ne Ieoiata te faitaulaga. Tenā ne puke ei ne tino taki tokotasi ana tāgata kolā e ‵tu i te Sapati, fakatasi mo latou kolā e se ‵tu i te Sapati,+ me ne seki fakamalō‵lo ne Ieoiata te faitaulaga a potukau+ mai olotou tiute.  Tenā ne tuku atu ei ne Ieoiata te faitaulaga ki takitaki o taki tokoselau+ a tao mo talita fo‵liki mo talita puku‵puku a te Tupu ko Tavita,+ kolā ne tuku i loto i te fale o te Atua tonu.+ 10  Ne faka‵tu ne ia a tino katoa, mo olotou meatau i olotou lima, mai te feitu fakaatamai o te fale ke oko ki te feitu fakamaui o te fale, i tafa o te fatafaitaulaga mo te fale, o fakatamilo te tupu. 11  Tenā ne aumai ei ne latou a te tama tagata a te tupu+ ki tua kae tuku atu ki luga i a ia a te foualiki mo te Tusi o te Tulafono*+ kae fai a ia mo tupu, kae fakaeke a ia ne Ieoiata mo ana tama tāgata. Oti aka, fai atu ei latou: “Ke ola leva te tupu!”+ 12  I te lagonaga ne Atalia a tino e ‵tele kae ‵viki atu ki te tupu, ne vau fakavave a ia ki tino i te fale o Ieova.+ 13  Tenā ne lavea ei ne ia te tupu e tu i tafa o tena pou i te mataloa ki loto. A pelenise+ mo tino faka‵tagi pu e ‵tu mai mo te tupu, kae ko tino katoa o te fenua ko oko eiloa i te fia‵fia+ kae faka‵tagi a pu, kae ko tino usuusu mo olotou mea fakatagi‵tagi e takitaki ne latou te avatuga* o vikiga. I konā eiloa ne saesae ne Atalia ana gatu kae kalaga atu: “Se togafiti! Se togafiti!” 14  Kae ko Ieoiata te faitaulaga ne aumai ne ia ki tua a takitaki o taki tokoselau, ko latou kolā ne faka‵sopo aka ke pule atu ki te kautau, kae fai atu ki a latou: “Puke tou fafine ki tua mai te laina o leoleo, kae kafai e isi se tino e tautali i a ia, tamate atu a ia ki te pelu!” Me ne fai atu te faitaulaga: “Sa tamate tou fafine i loto i te fale o Ieova.” 15  Ne puke ne latou tou fafine, kae i tena okoatuga ki te Mataloa o Solofanua i te fale o te tupu,* tamate fakavave ei ne latou a ia i konā. 16  Tenā ne fai ei ne Ieoiata se feagaiga i te va o ia mo tino katoa mo te tupu, me ka tumau latou i te fai pelā me ne tino o Ieova.+ 17  Oti aka, ne o‵mai a tino katoa ki te fale* o Paala kae ofa ne latou ki lalo,+ kae ne tuki fakalikiliki ne latou ana fatafaitaulaga mo ana fakatusa,+ kae tamate ne latou a Matana te faitaulaga a Paala+ i mua o fatafaitaulaga. 18  Tenā ne tuku atu ei ne Ieoiata ke onoono ki te fale o Ieova a faitaulaga mo tino Levi, kolā ne ‵tofi aka ne Tavita i potukau ke onoono ki te fale o Ieova ke ofo atu a taulaga ‵sunu ki a Ieova+ e ‵tusa eiloa mo mea kolā e tusi i te Tulafono a Mose,+ fakatasi mo te fia‵fia mo te usuga o pese, e pelā mo te fakatonuga a* Tavita. 19  Ne faka‵tu foki ne ia a tino tausi mataloa+ i mataloa o te fale o Ieova, ko te mea ke seai se tino sē ‵ma i so se feitu e mafai o ulu ki loto. 20  Ne puke ne ia a takitaki o taki tokoselau,+ tino tāua, pule o tino, mo tino katoa o te fenua ke olo atu fakatasi mo te tupu mai te fale o Ieova. Tenā ne o‵mai ei latou i te mataloa i luga telā e fano ki te fale* o te tupu kae fakasagasaga ne latou a te tupu i te nofogaaliki+ o te malo.+ 21  A tino katoa o te fenua ne fia‵fia kae ne filemu te fakai, me ko oti ne tamate ne latou a Atalia ki te pelu.

Fakamatalaga mai lalo

Io me “palesi.”
Epelu, “māfai ko fano a ia ki tua kae māfai ko vau ki loto.”
Kāti se peluga tusi telā e aofia i ei te Tulafono a te Atua.
Io me “tuku atu te fakailoga.”
Io me “palesi.”
Io me “faletapu.”
Epelu, “e auala i lima o.”
Io me “palesi.”