Te Lua Nofoaiga Tupu 21:1-20

  • Iolama, te tupu o Iuta (1-11)

  • Se tusi mai i a Elia (12-15)

  • Te fakaotiga sē ‵lei o Iolama (16-20)

21  Tenā ne takato ifo ei a Iosefatu o malō‵lo fakatasi mo ana tupuga kae ne tanu fakatasi mo ana tupuga i te Fakai o Tavita; kae ko tena tama tagata ko Iolama ne fai mo tupu e sui ei a ia.+  Ana taina, ko tama tāgata a Iosefatu, ko Asalia, Ieielu, Sakalia, Asalia, Mikaele mo Sefatia; a latou katoa konei ko tama tāgata a te tupu o Isalaelu ko Iosefatu.  Kae ne tuku atu ne te lotou tamana ki a latou a meaalofa e uke ko siliva mo aulo, mo mea tāua, fakatasi mo fakai e puipui faka‵lei i Iuta;+ kae ne tuku atu ne ia a te malo ki a Iolama,+ me i a ia ko te toekimua.  I te taimi ko pule ei a Iolama i te malo o tena tamana, ne fakamalosi aka ne ia tena tulaga mai te tamatega o ana taina+ katoa ki te pelu, e pelā foki mo nisi pelenise o Isalaelu.  Ko 32 tausaga o Iolama i te taimi ne fai ei a ia mo tupu, kae ne pule atu a ia ki Ielusalema i tausaga e valu.+  Ne sasale a ia i auala o tupu o Isalaelu,+ e pelā eiloa mo mea ne fai ne tino i te kāiga o Aapo, me ne fai a te tama fafine a Aapo mo fai tena avaga;+ kae ne fai faeloa ne ia a mea ma‵sei i te kilokiloga a Ieova.  Kae ko Ieova ne seki manako o fakaseai a te kāiga o Tavita ona ko te feagaiga telā ne fai ne ia mo Tavita,+ me ne tauto a ia me ka isi faeloa se tino e pule mai tena gafa.*+  I aso koi pule ei a ia ne ‵teke atu te kau Etoma ki Iuta+ kae fakatu aka ne latou te lotou tupu.+  Ne olo atu a Iolama mo ana takitaki ki te suā feitu mo ana kaliota katoa, kae ne tu aka a ia i te po kae fakatakavale a tino Etoma kolā ne nikoi i a ia penā foki loa mo takitaki o kaliota. 10  Kae ne tumau eiloa a Etoma i te ‵teke atu ki Iuta ke oko mai ki te aso nei. Ne ‵teke atu foki a Lipina+ ki a ia i te taimi tenā, me ko oti ne tiaki ne ia a Ieova te Atua o ana tupuga.+ 11  Ne faite foki ne ia a koga ma‵luga+ i mauga o Iuta ke fai ei a tino Ielusalema ke fai a faifaiga talitāgata i te feitu faka-te-agaga, kae ne takitaki ‵se ne ia a tino Iuta. 12  Fakamuli ifo, ne oko mai se tusi mai i te pelofeta ko Elia,+ ana muna: “Konei a pati ne fai mai ne Ieova te Atua o Tavita tou tupuga, ‘A koe e seki sasale i auala o tou tamana ko Iosefatu+ io me i auala o te tupu o Iuta ko Asa.+ 13  Kae e sasale koe i te auala o tupu o Isalaelu+ kae fai ei a Iuta mo tino Ielusalema ke fai a faifaiga talitāgata i te feitu faka-te-agaga+ e pelā mo te sē fakamaoni o te kāiga o Aapo,+ kae ne tamate foki ne koe ou taina,+ ko te kaukāiga o tou tamana, kolā e ‵lei atu i a koe. 14  Tela la, ka ‵ta valevale ne Ieova ou tino, au tama tāgata, au avaga, kae fakamasei foki ou kope katoa. 15  Kae ka logo‵mae koe i masaki e uke, e aofia i ei te masaki ki ou gakau, ke oko ki te taimi e ‵to mai ei ou gakau ki tua ona ko te masaki i aso takitasi.’” 16  Tenā ne fakamalosi aka+ ei ne Ieova se agaga o te kaitaua ki a Iolama i tino Filisitia+ mo tino Alapi+ kolā e ‵nofo pili ki tino Aitiope. 17  Ne olo atu latou ki Iuta, kae ulu mālō atu ki loto i ei, kae ave ne latou so se kope ne maua atu i te fale o te tupu,+ fakatasi mo ana tama tāgata mo ana avaga; kae ko tena tama tagata fua e tokotasi ne ‵toe mai ko Ioasasa,*+ tena toekimuli. 18  Kae mai tua o mea katoa konei, ne fai ne Ieova ke poko a ia i se masaki i ana gakau telā e seai se faka‵leiga ki ei.+ 19  Fakamuli ifo, mai tua o tausaga e lua, ne ‵to ki tua ana gakau ona ko tena masaki, kae ne mate a ia mo te logo‵mae mai tena masaki; kae ne seki ‵sunu ne ana tino a mea ma‵nogi mō ia e pelā mo mea ma‵nogi ne ‵sunu mō ana tupuga.+ 20  Ko 32 ana tausaga i te taimi ne fai ei a ia mo tupu, kae ne pule a ia ki Ielusalema i tausaga e valu. E seai se tino ne fanoanoa i te taimi ne mate ei a ia. Kae ne tanu ne latou a ia i te Fakai o Tavita,+ kae e se i koga e tanu ei a tupu.+

Fakamatalaga mai lalo

Epelu, “tuku atu ki ei se moli.”
E fakaigoa foki ki a Aasaia.