Te Lua Nofoaiga Tupu 20:1-37

  • Ko fakamatakutaku ne atufenua ‵pili mai a Iuta (1-4)

  • Ko ‵talo a Iosefatu mō se fesoasoani (5-13)

  • Te ‵tali mai i a Ieova (14-19)

  • Ko fakasao fakavavega a Iuta (20-30)

  • Te gataga o te pulega a Iosefatu (31-37)

20  Mai tua ifo, ne o‵mai a tino Moapi+ mo tino Amoni,+ fakatasi mo nisi tino Amonima* o taua ki a Iosefatu.  Ne avatu te fakailoaga ki a Iosefatu: “E isi se potukau o tino e tokouke kolā e o‵mai o taua ki a koe mai kogā koga o te tai,* mai Etoma,+ kae konā e ‵nofo i Hasasona-tamala, telā ko Eneketi.”+  Tenā ne kamata ei o mataku a Iosefatu, kae fakaiku* aka ke ‵sala atu ki a Ieova.+ Tenā ne fakailoa atu ei ne ia ke fakaliki‵liki a Iuta kātoa.  Ne maopoopo fakatasi a tino Iuta o fesili atu ki a Ieova;+ ne o‵mai latou mai fakai katoa o Iuta ke fesili atu ki a Ieova.  Tenā ne tu aka ei a Iosefatu i loto i te fakapotopotoga o Iuta mo Ielusalema i loto i te fale o Ieova i mua o te koga ateatea fou,  ana muna: “Ieova te Atua o omotou tupuga, e a, e se ko koe te Atua o te lagi;+ e a, e se pule atu koe ki malo katoa o atufenua?+ E maua i ou lima a te ‵mana mo te malosi, kae e seai se tino e mafai o taua atu ki a koe.+  Te motou Atua, e a, e seki afuli ne koe kea‵tea a tino o te fenua tenei i mua o ou tino Isalaelu kae tuku atu e pelā me se kope tumau ki tama* a tou taugasoa ko Apelaamo?+  Kae ne ‵nofo latou i ei, kae faite ne latou mō koe i konā se koga tapuaki mō tou igoa,+ kae fai atu,  ‘Kafai e oko mai a fakalavelave ki a matou, faitalia me e auala mai i te pelu, fakasalaga ‵mafa, famai io me se oge, ke ‵tu eiloa matou i mua o koe mo te fale tenei (me i tou igoa e tuku i loto i te fale tenei)+ kae ka‵laga atu ki a koe mo se fesoasoani mai omotou puapuaga, ke fakalogo mai eiloa koe kae faka‵sao mai matou.’+ 10  Nei la, konei a tāgata o Amoni, Moapi mo koga maugā o Seila,+ kolā ne seki talia ne koe a Isalaelu ke taua atu ki ei i te taimi ne o‵mai ei latou ki tua mo te fenua o Aikupito. Ne ‵fuli kea‵tea a Isalaelu mai i a latou kae seki ‵ta fakapalele atu latou.+ 11  Nei la, ko taui mai ne latou ki a matou mai te afuliga o matou kea‵tea mai tou fenua telā ne tuku mai ne koe ke fai mo omotou tofi.+ 12  Te motou Atua, e a ka se fakasala ne koe latou?+ Me e seai se motou malosi i mua o te potukau o tino e tokouke kolā e o‵mai o taua mai ki a matou; kae e se iloa ne matou a mea e ‵tau o fai ne matou,+ kae e ‵kilo atu eiloa omotou mata ki a koe.”+ 13  I te taimi tenā, ne ‵tu atu eiloa a tino Iuta katoa i mua o Ieova, fakatasi mo olotou tama‵liki fo‵liki, olotou avaga mo olotou tama‵liki.* 14  Kae i te kogaloto o te fakapotopotoga ne oko mai ei te agaga o Ieova ki a Iasielu te tama tagata a Sakalia te tama tagata a Penaia te tama tagata a Ieiela te tama tagata a Matania te tino Levi, telā ne tupu mai i a Asafo. 15  Ana muna: “Faka‵logo mai, e Iuta kātoa mo koutou tino Ielusalema mo te Tupu ko Iosefatu! Konei a pati a Ieova ne fai mai ki a koutou, ‘Sa ma‵taku io me pole‵pole ona ko te potukau o tino e tokouke konei, me i te taua e se i a koutou kae i a te Atua.+ 16  Olo o taua atu ki a latou i te aso ma taeao. Ka o‵mai latou i te auala o Sisi, kae ka maua ne koutou a latou i te mata o te vanu mai mua o te koga lavaki o Ieluelu. 17  E se manakogina ke taua atu koutou i te taua tenei. ‵Tu i otou tulaga, sa gasue‵sue,+ kae ‵kilo atu ki te fakaolataga a Ieova mō koutou.*+ Iuta mo Ielusalema, sa ma‵taku io me pole‵pole.+ Olo o taua atu ki a latou i te aso ma taeao, kae ka fakatasi atu a Ieova ki a koutou.’”+ 18  I konā eiloa, ne ifo a Iosefatu ki lalo mo ana mata e ‵fuli ki te laukele, kae ko Iuta kātoa mo tino Ielusalema ne ifo ki lalo i mua o Ieova o tapuaki atu ki a Ieova. 19  Tenā ne ‵tu aka ei a tino Levi kolā ne ‵tupu mai i tino Koate+ mo tino Kola o ‵viki atu ki a Ieova te Atua o Isalaelu i se leo maluga ‵ki.+ 20  Ne alausu latou i te tafataeao kae olo atu ki te koga lavaki o Tekoa.+ I te lotou auala, ne tu aka a Iosefatu kae fai atu: “Faka‵logo mai ki a au, e Iuta kātoa mo koutou tino Ielusalema! Fakatuanaki ki a Ieova te otou Atua ko te mea ke mafai ne koutou o tu ‵mautakitaki.* Fakatuanaki ki ana pelofeta,+ kae ka manuia koutou.” 21  I te otiga o tena fai‵patiga mo tino, ne filifili aka ne ia a tāgata ke usu a pese+ ki a Ieova kae ofo atu a vikiga i olotou gatu tapu kae olo atu i mua o tāgata e isi ne olotou meatau, kae fai atu: “Fakafetai atu ki a Ieova, me i tena alofa fakamaoni e tumau ki te se-gata-mai.”+ 22  I te taimi ne kamata ei latou o usu a pese o vikiga mo te fia‵fia, ne fakatoka ne Ieova se potukau o tino ke ‵muni o taua atu ki tāgata o Amoni, Moapi mo koga maugā o Seila kolā ne o‵mai o taua ki Iuta, tenā ne fakatau ‵ta ei ne latou a latou eiloa.+ 23  Kae ko tino Amoni mo tino Moapi ne ma‵fuli atu ki tino mai koga maugā o Seila+ o fakamasei kae ‵ta fakapalele atu latou; kae i te lotou otiga mai tino Seila, ne fakatau taua eiloa latou.+ 24  I te okoatuga o tino Iuta ki te faleleoleo maluga o te koga lavaki+ kae ‵kilo atu ki te potukau o tino e tokouke, ne lavea ne latou olotou foitino ‵mate e ta‵tela i te laukele;+ e seai ne tino ne ‵sao. 25  Tenā ne o‵mai ei a Iosefatu mo ana tino o puke a mea ne maua ne latou i te taua, kae ne maua ne latou a koloa, gatu mo nisi mea ‵gali e uke, tenā ne puke ei ne latou ke oko ki te taimi ko se mafai ei o puke ne latou se isi mea.+ E tolu aso ne fakaaoga ne latou ke tali i ei a mea o te taua ona ko te uke o mea konā. 26  I te fa o aso ne maopoopo fakatasi latou i te Vanu o Pelaka, me tenā te koga ne ‵viki* atu ei latou ki a Ieova. Tenā te pogai ne fakaigoa ei ne latou te koga tenā ki te Vanu o Pelaka*+ ke oko mai ki te aso nei. 27  Tenā ne ‵foki mai ei a tāgata katoa o Iuta mo Ielusalema, fakatasi mo Iosefatu te lotou takitaki ki Ielusalema mo te fia‵fia, me ne fai ne Ieova latou ke fia‵fia ona ko olotou fili.+ 28  Ne o‵mai latou ki Ielusalema mo mea fakatagi‵tagi e isi ne uka i ei, kitala+ mo pu+ kae olo atu ki te fale o Ieova.+ 29  Kae ne oko atu ki malo katoa o te fenua a te mataku ki te Atua i te taimi ne ‵logo ei latou me i a Ieova ne taua atu ki fili o Isalaelu.+ 30  Tenā ne seki toe ai ei ne fakalavelave ne oko atu ki te malo o Iosefatu, kae ne tumau eiloa tena Atua i te tukuatuga o te filemu ki a ia i feitu katoa.+ 31  Kae ne tumau eiloa a Iosefatu i te pule atu ki Iuta. Ko 35 ana tausaga i te taimi ne fai ei a ia mo tupu, kae ne pule a ia i Ielusalema i tausaga e 25. A te igoa o tena mātua ko Asupa te tama fafine a Sili.+ 32  Ne tumau a ia i te sasale i te auala o tena tamana ko Asa.+ Ne seki ‵fuli kea‵tea a ia mai i ei, kae ne fai ne ia a mea kolā e ‵tonu i te kilokiloga a Ieova.+ 33  Kae ko koga ma‵luga ne seki fakaseai,+ kae ko tino ne seki fakatoka olotou loto mō te Atua o olotou tupuga.+ 34  Kae ko te tala fakasolopito kātoa o Iosefatu, mai te kamataga ke oko ki te fakaotiga, e tusi i tusi a Ieu+ te tama tagata a Hanani,+ kolā e aofia i te Tusi o Tupu o Isalaelu. 35  I te otiga o mea konā, ne fai taugasoa a te tupu o Iuta ko Iosefatu mo te tupu o Isalaelu ko Aasaia, telā ne fai ne ia a mea ma‵sei.+ 36  Tenā ne fai ei ne ia ke ga‵lue tasi lāua i te faitega o vakamutu ke olo ki Talasisi,+ kae ne faite ne lāua a vakamutu i Esionikepa.+ 37  Kae ko Eliesa te tama tagata a Totavau mai Malesaa ne faipati fakapelofeta o ‵teke atu ki a Iosefatu, ana muna: “Ona ko koe ne fai taugasoa ki a Aasaia, ka fakamasei ne Ieova au galuega.”+ Tenā ne ‵kasa ei a vakamutu,+ kae ne seki mafai ne latou o olo atu ki Talasisi.

Fakamatalaga mai lalo

Io me kāti, “ko tino Meuno.”
E mautinoa me ko te Tai Mate.
Epelu, “saga tonu atu ana mata.”
Epelu, “fanau.”
Epelu, “tama tāgata.”
Io me “‵kilo atu ki te auala ka faka‵sao ei koutou ne Ieova.”
Io me “o kufaki.”
Epelu, “fakamanuia.”
Tena uiga “Fakamanuiaga.”