Te Lua Nofoaiga Tupu 14:1-15

  • Te mate o Avia (1)

  • Asa, te tupu o Iuta (2-8)

  • Ko fakatakavale ne Asa te toko 1,000,000 o tino Aitiope (9-15)

14  Tenā ne takato ifo ei a Avia o malō‵lo fakatasi mo ana tupuga, kae ne tanu ne latou a ia i te Fakai o Tavita;+ kae ko tena tama tagata ko Asa ne fai mo tupu e sui ei a ia. I ana aso, ne seki toe ai eiloa ne taua i te fenua i tausaga e sefulu.  Ne fai ne Asa a te mea ‵lei kae tonu i te kilokiloga a Ieova tena Atua.  Ne tapale kea‵tea ne ia a fatafaitaulaga fakaa‵tea+ mo koga ma‵luga, ne tuki ne ia a pou fatu tapu+ kae ‵kati ki lalo a pou lakau tapu.*+  E se gata i ei, ne fakatonu atu a ia ki Iuta ke ‵sala ki a Ieova te Atua o olotou tupuga kae ke faka‵logo ki te Tulafono mo fakatonuga.  Ne tapale kea‵tea ne ia mai i fakai katoa o Iuta a koga ma‵luga mo tulaga e ofo atu i ei a mea ma‵nogi,+ kae ne tumau eiloa te filemu i te malo mai lalo i a ia.  Ne faite ne ia a fakai e puipui faka‵lei i Iuta,+ ona ko te filemu o te fenua kae seai ne taua e fai ki a ia i tausaga konei, me ne tuku atu ne Ieova ki ei se malōlōga.+  Ne fai atu a ia ki tino Iuta: “Ka faite ne tatou a fakai konei kae faite fakatamilo ne tatou a ‵pui mo taoa,+ mataloa* mo lakau faka‵lava. I o tatou a te fenua, me ne ‵sala atu tatou ki a Ieova ‵tou Atua. Ne ‵sala atu tatou, kae ne tuku mai ne ia te filemu ki a tatou i koga katoa.” Tenā ne manuia eiloa te faitega o olotou mea.+  E isi se kautau a Asa telā e toko 300,000 tāgata mai Iuta, e isi ne olotou talita ‵lasi mo tao. Kae mai i a Peniamina e toko 280,000 toa ‵mafi kolā e tauave ne latou a talita fo‵liki kae isi ne olotou sana.+  Fakamuli ifo, ne vau a Tila te tino Aitiope o taua ki a latou fakatasi mo tena kautau e toko 1,000,000 tāgata kae 300 kaliota.+ I tena okoatuga ki Malesa,+ 10  ne fanatu a Asa o taua atu ki a ia kae ne fakatoka latou e pelā me se kautau ke fepaki i te Vanu o Sefatata i Malesa. 11  Ne kalaga atu a Asa ki a Ieova tena Atua,+ ana muna: “Ieova, e sē se mea faigata ki a koe ke fesoasoani atu ki tino faitalia me tokouke latou io me seai se lotou malosi.+ Ieova te motou Atua, fesoasoani mai ki a matou, i a matou e fakalago‵lago* eiloa ki a koe,+ kae e auala i tou igoa e taua atu ei matou ki te vaitino tenei.+ Ieova, a koe ko te motou Atua. Sa talia eiloa ne koe se tagata ke manumalo i a koe.”+ 12  Ne fakatakavale ne Ieova a tino Aitiope konā i mua o Asa mo Iuta, kae ne ‵tele kea‵tea a tino Aitiope.+ 13  Ne afuli ne Asa mo ana tino a latou ke oko atu ki Kelaa,+ kae ne ‵siga faeloa a tino Aitiope ke oko ki te taimi ko seai se tino i a latou e ola, me ne ‵ta valevale latou ne Ieova mo tena kautau. Oti aka, ave ei ne latou a mea e uke ne maua ne latou i te taua. 14  E se gata i ei, ne ‵ta ne latou a fakai katoa i tafatafa o Kelaa, me ne oko atu ki a latou a te mataku i a Ieova; kae ne ‵fao ne latou a mea i fakai katoa konā me uke ‵ki a mea e mafai o ‵fao ne latou mai i ei. 15  Ne fakamasei foki ne latou a faleie o tino kolā e isi ne olotou lafu manu, kae puke ne latou a lafu mamoe e uke mo kamela, oti aka ‵foki ei latou ki Ielusalema.

Fakamatalaga mai lalo

Onoono ki te FP.
Epelu, “mataloa e lua ana feitu.”
Epelu, “e faka‵pale matou.”