Te Lua Nofoaiga Tupu 13:1-22

  • Avia, te tupu o Iuta (1-22)

    • Ko fakatakavale ne Avia a Ielopoamo (3-20)

13  I te 18 tausaga o te pulega a te Tupu ko Ielopoamo, ne fai a Avia mo tupu o Iuta.+  Ne pule a ia i tausaga e tolu i Ielusalema. A te igoa o tena mātua ko Mikaio+ te tama fafine a Ulielu mai Kipea.+ Kae ne isi ne taua ne fai i te va o Avia mo Ielopoamo.+  Ne fano a Avia ki te taua mo tena kautau e toko 400,000 toa ‵mafi kolā ne fakaakoako* faka‵lei.+ Kae ko Ielopoamo ne fakatoka o taua atu ki a ia fakatasi mo te toko 800,000 toa ‵mafi kolā ne fakaakoako* faka‵lei.  Ne tu atu a Avia i te Mauga o Semalaima, telā e tu i koga maugā o Efalaima, kae fai atu: “Faka‵logo mai ki a au e Ielopoamo mo Isalaelu kātoa.  E se iloa ne koutou i a Ieova te Atua o Isalaelu ne tuku atu ne ia ki a Tavita se malo ke pule ki Isalaelu ki te se-gata-mai,+ kae ne tuku atu ki a ia mo ana tama tāgata,+ e auala i se feagaiga tumau?*+  Kae ko Ielopoamo+ te tama tagata a Nepata te tavini a te tama tagata a Tavita ko Solomona ne tu aka o ‵teke atu ki tena aliki.+  Kae ne maopoopo atu faeloa ki a ia a tāgata kolā e seai ne olotou mea e fai kae seai foki ne olotou aoga. Kae ne ma‵luga atu latou i a Leopoamo te tama tagata a Solomona i te taimi koi foliki kae loto vāivāi ei a Leopoamo, kae ne seki mafai ne ia o ‵teke atu ki a latou.  “Kae nei la, e mafau‵fau koutou me e mafai ne koutou o ‵teke atu ki te malo o Ieova i lima o tama tāgata a Tavita me i a koutou se vaitino e tokouke kae e isi ne otou pulumakau aulo kolā ne faite ne Ielopoamo ke fai pelā me ne atua o koutou.+  E a, e seki afuli kea‵tea ne koutou a faitaulaga a Ieova,+ ko tino kolā ne ‵tupu mai i a Alona, mo tino Levi, kae e a, e seki faka‵sopo aka eiloa ne koutou otou faitaulaga e pelā mo tino o nisi fenua?+ So se tino e vau mo se tamā pulumakau mo mamoe e fitu e mafai o ‵tofi aka ke fai pelā me se faitaulaga o mea kolā e se ne atua. 10  E pelā mo matou, a Ieova ko te motou Atua,+ kae e seki tiaki ne matou a ia; a omotou faitaulaga kolā ne ‵tupu mai i a Alona e tavini atu ki a Ieova, kae e fesoasoani atu a tino Levi ki te faiga o te galuega. 11  E fai ne latou a taulaga ‵sunu ki a Ieova i tafataeao katoa mo afiafi katoa+ fakatasi mo mea ma‵nogi,+ kae ko te falaoa+ ne ofo atu ki te Atua e tuku i luga i te taipola telā ne faite mai te tinā aulo, kae e faka‵ka ne latou a tugamoli aulo+ mo olotou moli i afiafi katoa,+ me i a matou e tausi eiloa ki omotou tiute e fai ki a Ieova te motou Atua; kae ko oti ne tiaki ne koutou a ia. 12  Kiloke! a te Atua tonu e ‵kau fakatasi mo matou, e takitaki ne ia matou fakatasi mo ana faitaulaga mo pu e faka‵tagi ke fakamailoga ki ei a taua kolā e fai atu ki a koutou. Tāgata Isalaelu, sa taua atu ki a Ieova te Atua o otou tupuga, me ka se manuia eiloa koutou.”+ 13  Kae ne uga atu ne Ielopoamo se kautau ke olo atu i olotou tua, ko te mea ke ‵tu latou i mua o Iuta kae ko te kautau tenā ke o‵mai i olotou tua. 14  I te taimi ne ‵fuli atu ei a tāgata Iuta ki tua, ne lavea ne latou me e ‵tau eiloa o taua latou ki te kautau i olotou mua penā foki loa mo olotou tua. Tenā ne kamata ei o ka‵laga atu latou ki a Ieova,+ kae ko faitaulaga e faka‵tagi ne latou a pu ke ma‵luga. 15  Ne paka‵laga a tāgata Iuta i te kalaga o te taua, kae i te taimi ne paka‵laga ei a tāgata Iuta i te kalaga o te taua, ne fakatakavale ne te Atua tonu a Ielopoamo mo Isalaelu kātoa i mua o Avia mo tino Iuta. 16  Ne ‵tele a tino Isalaelu mai tino Iuta, kae ne tuku atu latou ne te Atua ki olotou lima. 17  Ne ‵ta valevale latou ne Avia mo ana tino, kae ne ‵siga faeloa a tāgata Isalaelu, kae ‵mate atu i ei a sotia e toko 500,000 kolā ne fakaakoako* faka‵lei. 18  Tenā ne masiasi ei a tāgata Isalaelu ona ko te lotou takavale i te taimi tenā, kae ne sili eiloa a tāgata Iuta me ne fakalago‵lago* latou ki a Ieova te Atua o olotou tupuga.+ 19  Ne afuli faeloa ne Avia a Ielopoamo kae puke a fakai mai i a ia, ko Peteli+ mo ana fakai fo‵liki,* Iesana mo ana fakai fo‵liki mo Efeloni+ mo ana fakai fo‵liki. 20  Kae ne seki toe malosi a Ielopoamo i tena tulaga pule i taimi o Avia; tenā ne ta ei a ia ne Ieova, mate ei a ia.+ 21  Kae ko Avia ne gasolo aka o malosi. Fakamuli ifo, ne fai ne ia ana avaga e toko 14,+ kae ne fai a ia mo tamana ki tamaliki tāgata e toko 22 mo tamaliki fāfine e toko 16. 22  Kae ko te tala fakasolopito kātoa o Avia, ana faifaiga mo ana pati, ne fakamau katoa i tusitusiga a te pelofeta ko Ito.+

Fakamatalaga mai lalo

Epelu, “filifili.”
Epelu, “filifili.”
Epelu, “feagaiga o te masima.”
Epelu, “filifili.”
Epelu, “faka‵pale.”
Io me “i ana tafa.”