Te Lua Nofoaiga Tupu 11:1-23

  • Te pulega a Leopoamo (1-12)

  • Ko olo a tino Levi fakamaoni ki Iuta (13-17)

  • Te kāiga o Leopoamo (18-23)

11  I te okoatuga a Leopoamo ki Ielusalema, ne fakamaopoopo fakavave ne ia a kāiga o Iuta mo Peniamina,+ e toko 180,000 toa ‵mafi kolā ne fakaakoako* faka‵lei ke taua atu ki Isalaelu ko te mea ke toe fakafoki a te pulega fakatupu ki a Leopoamo.+  Tenā ne oko atu ei te fekau a Ieova ki a Semaia+ te tagata o te Atua tonu, ana muna:  “Fai ki a Leopoamo te tama tagata a Solomona te tupu o Iuta mo tino Isalaelu katoa i Iuta mo Peniamina,  ‘Konei a pati a Ieova ne fai mai: “E se ‵tau mo koutou o olo o taua atu ki otou taina. E ‵tau mo koutou taki tokotasi o ‵foki ki otou fale, me ne fai ne au ke tupu te mea tenei.”’”+ Tenā ne faka‵logo ei latou ki te muna a Ieova kae toe ‵foki kae seki taua atu eiloa ki a Ielopoamo.  Ne nofo atu a Leopoamo i Ielusalema kae faite a fakai e puipui faka‵lei i Iuta.  Tenā ne faite ei ne ia a Peteleema,+ Etama, Tekoa,+  Petesula, Soko,+ Atulama,+  Kata,+ Malesa, Sifo,+  Atolaima, Lakisa,+ Aseka,+ 10  Sola, Aitialona+ mo Hepelona,+ ne fakai e puipui faka‵lei i Iuta mo Peniamina. 11  E se gata i ei, ne toe fakamalosi aka ne ia a fakai e puipui faka‵lei kae tuku atu ki loto i ei a takitaki kae avatu a meakai mo sinu mo uaina ki a latou, 12  kae ne avatu ne ia ki fakai kese‵kese katoa a talita ‵lasi mo tao; ne toe fakamalosi aka ne ia ke ma‵losi ‵ki. Kae ne tumau eiloa a Iuta mo Peniamina mai lalo i a ia. 13  Kae ko faitaulaga mo tino Levi kolā ne ‵nofo i Isalaelu ne ‵kau katoa ki a ia, kae ne o‵mai katoa latou mai olotou kogā fenua. 14  Ne tiaki ne tino Levi olotou laukele moukuā mo olotou kope+ kae o‵mai ki Iuta mo Ielusalema, me ko oti ne faka‵tea latou ne Ielopoamo mo ana tama tāgata mai te tavini atu e pelā me ne faitaulaga a Ieova.+ 15  Tenā ne faka‵sopo aka ei ne Ielopoamo ana faitaulaga mō koga ma‵luga+ mo temoni e foliga pelā me ne kouti+ mo pulumakau ne faite ne ia.+ 16  Kae ko latou kolā ne o‵mai i matakāiga katoa o Isalaelu kolā ne tuku tonu olotou loto o ‵sala ki a Ieova te Atua o Isalaelu ne tau‵tali i a latou ki Ielusalema o ofo atu a taulaga ki a Ieova te Atua o olotou tupuga.+ 17  Ne fakamalosi aka ne latou i tausaga e tolu a te pulega fakatupu o Iuta kae ‵lago atu ki a Leopoamo te tama tagata a Solomona, me ne sa‵sale latou i te auala o Tavita mo Solomona i tausaga e tolu. 18  Tenā ne puke ei ne Leopoamo a Malata mo fai tena avaga, ko te tama fafine a te tama tagata a Tavita ko Ielimota mo Apihaila te tama fafine a te tama tagata a Iese ko Eliapo.+ 19  Fakamuli ifo, ne fanau mai ne tou fafine a tama tāgata ma tou tagata: ko Ieusa, Semalia mo Sahama. 20  Mai tua o tou fafine, ne avaga tou tagata ki a Maaka te mokopuna fafine o Apisaloma.+ Fakamuli ifo, ne fanau mai ne ia a tama ma tou tagata ko Avia,+ Atai, Siisa mo Selomita. 21  Ne alofa malosi atu a Leopoamo ki a Maaka te mokopuna fafine o Apisaloma i lō ana nisi avaga mo avaga fakasalasala katoa,+ me ne puke ne tou tagata e toko 18 ana avaga kae toko 60 ana avaga fakasalasala, kae ne fai a ia mo tamana o tama tāgata e toko 28 kae toko 60 a tama fāfine. 22  Ne fakasopo aka ne Leopoamo a Avia te tama tagata a Maaka ke fai mo ulu mo takitaki o ana taina me ne mafaufau a tou tagata ke fai a ia mo fai te tupu. 23  Kae ne gasuesue a ia mo te malamalama kae uga atu ana nisi tama tāgata ki kogā koga katoa o Iuta mo Peniamina, ki fakai ne puipuigina katoa,+ kae avatu ki a latou a meakai e uke kae puke mai a avaga e tokouke ma latou.

Fakamatalaga mai lalo

Epelu, “filifili.”