Te Lua Nofoaiga Tupu 1:1-17

  • Te fakamolemole a Solomona ke maua te poto (1-12)

  • Te maumea o Solomona (13-17)

1  Ne gasolo aka eiloa o malosi te pulega fakatupu a Solomona te tama tagata a Tavita, kae ne fakatasi atu eiloa a Ieova tena Atua ki a ia kae fai ne ia ke sili atu tena maluga.+  Ne uga atu te fekau a Solomona ki tino Isalaelu katoa, takitaki o taki tokoafe mo taki tokoselau, famasino mo takitaki katoa o Isalaelu, ko ulu o kāiga i olotou tamana.  Tenā ne olo atu ei a Solomona mo te fakapotopotoga kātoa ki te koga maluga i Kipeona,+ me tenā te koga ne tu i ei te faleie o maopoopoga a te Atua tonu, ko te faleie telā ne faite ne Mose te tavini a Ieova i te koga lavaki.  Kae ko oti ne aumai ne Tavita te Pusa a te Atua tonu mai Kiliata-iealima+ ki te koga telā ko oti ne fakatoka ne Tavita; ko oti ne fakatu ne ia se faleie i Ielusalema mō te pusa.+  Kae ko te fatafaitaulaga kopa+ telā ne faite ne Pesaleli+ te tama tagata a Uli te tama tagata a Hulo ne tuku atu i mua o te faleie tapu o Ieova; kae ko Solomona mo te fakapotopotoga e ‵talo sāle i konā.*  Ne ofo atu ne Solomona i konā a taulaga i mua o Ieova, kae ne ofo atu ne ia e 1,000 a taulaga ‵sunu i luga i te fatafaitaulaga kopa+ o te faleie o maopoopoga.  I te po tenā ne fakasae atu a te Atua ki a Solomona kae fai atu ki ei: “Fai mai a te mea telā e manako koe ke tuku atu ne au.”+  Tenā ne fai atu ei a Solomona ki te Atua: “Ko oti ne fakaasi mai ne koe te lasi o tou alofa fakamaoni ki toku tamana ko Tavita,+ kae ne fai ne koe au mo tupu e sui ei a ia.+  Nei la, e Ieova te Atua, ke fakataunu+ eiloa a tau tautoga ne fai ki a Tavita toku tamana, me ko oti ne fai ne koe au mo tupu i tino e tokouke e pelā mo ‵pefu o te laukele.+ 10  Tuku mai nei ki a au a te poto mo te iloa+ ke takitaki ki ei a tino konei, me ko oi te tino e mafai o fakamasino ne ia ou tino e tokouke konei?”+ 11  Tenā ne fai atu ei a te Atua ki a Solomona: “Ona ko te mea e manako eiloa tou loto ki te mea tenei kae ne seki fakamolemole mai koe ki koloa, te maumea mo te takutakua io me ko te ‵mate o tino kolā e takalia‵lia ki a koe, io me fakamolemole mai koe ki se olaga loa,* kae ne fakamolemole mai koe ki te poto mo te iloa ke fakamasino ne koe oku tino kolā ne fai ei koe ne au mo fai te lotou tupu,+ 12  ka tuku atu ki a koe a te poto mo te iloa; kae ka tuku atu foki ne au ki a koe a koloa mo te maumea mo te takutakua kolā e seki maua eiloa ne tupu mai mua atu i a koe kae ka se maua foki ne tupu mai i ou tua.”+ 13  Ne vau a Solomona mai te koga maluga i Kipeona,+ mai i mua o te faleie o maopoopoga, ki Ielusalema; kae ne pule a ia ki Isalaelu. 14  Ne gasolo aka eiloa o uke a kaliota mo solofanua* a Solomona; e 1,400 ana kaliota kae 12,000 solofanua,*+ kae ne tausi ne ia i fakai e faka‵tu ei ana kaliota+ kae pili mai ki te tupu i Ielusalema.+ 15  Ne faite ne te tupu a siliva mo aulo i Ielusalema ke uke e pelā mo fatu,+ kae ko laupapa alasi ke uke e pelā mo lakau ko sukamolo i te Sefila.+ 16  A solofanua a Solomona ne ‵togi mai i Aikupito,+ kae ko tino faipisinisi a te tupu e maua olotou lafu solofanua* mō se ‵togi e tasi.+ 17  A kaliota takitasi kolā ne ‵togi mai i Aikupito e 600 tupe siliva te ‵togi, kae ko te solofanua e tasi e 150 te ‵togi; kae e fakatau atu ne latou ki tupu katoa o tino Heti mo tupu o Sulia.

Fakamatalaga mai lalo

Io me “‵sala atu ki a Ia i konā.”
Epelu, “aso e uke.”
Io me “tāgata faka‵tele solofanua.”
Io me “tāgata faka‵tele solofanua.”
Io me kāti, “mai Aikupito kae mai Kue; e ‵togi mai ne tino faipisinisi a te tupu a mea konā mai Kue” telā kāti e fakasino atu ki Kilikia.