Te Tusi i te Lua ki te Kau Kolinito 8:1-24

  • ‵Lukuga o mea mō Kelisiano i Iuta (1-15)

  • Ko ‵tau o uga atu a Tito ki Kolinito (16-24)

8  Nei la, e ma‵nako matou ke iloa ne koutou, e taina, e uiga ki te alofa tauanoa o te Atua telā ko oti ne tuku atu ki fakapotopotoga i Maketonia.+  I te taimi ne oko atu ei se tofotofoga lasi i puapuaga e uke, ne fia‵fia malosi latou kae ko te lasi o te lotou ma‵tiva ne fai ei ke mau‵mea latou i te lotou kaima‵lie.  E fakatalitonu atu ne au me e sili atu olotou mea ne fai+ i lō olotou mea ne ‵tau o fai,+  kae ne tumau eiloa latou i te fakatagi mai mo te loto fia‵fia ki a matou ke maua te tauliaga ke ofo atu olotou meaalofa, ke fai se lotou tusaga i te galuega fesoasoani mō tino tapu.+  E se gata fua i mea ne fakamoe‵moe matou ki ei, ne tuku muamua atu eiloa latou ki te Aliki kae fakamuli ifo ki a matou e ‵tusa mo te loto o te Atua.  Tenā ne fakamalosi atu ei matou ki a Tito,+ me e pelā eiloa mo te taimi ne kamata ei ne ia a te galuega tenei i a koutou, e ‵tau foki o fakaoti faka‵lei ne ia te galuega alofa tenei mō koutou.  E ui i ei, e pelā eiloa mo te ‵fonu o koutou i mea katoa, i te fakatuanaki mo muna mo te iloa mo te loto naunau mo te motou a‵lofa ki a koutou, ke ‵fonu foki koutou i te faiga o te galuega alofa tenei.+  E se fai atu ne au a te mea tenei, ke fakatonu atu ei koutou, kae ke iloa ne koutou a te loto nau‵nau o nisi tino kae ke tofotofo aka te ‵tonu o te otou a‵lofa.  Me e iloa ne koutou a te alofa tauanoa o te ‵tou Aliki ko Iesu Keliso, me e tiga eiloa a ia ne maumea, ne fai a ia mo fai se tino mativa mō koutou,+ ko te mea ke mau‵mea koutou e auala i tena mativa. 10  E fakaasi atu ne au toku manatu i te mea tenei:+ E fai te mea tenei mō te otou ‵lei, me i te tausaga ko teka ne seki kamata fua ne koutou a te galuega tenei kae ne fakaasi mai foki ne koutou a te otou loto fia‵fia o fai te galuega. 11  Nei la, ke fakaoti faka‵lei a te mea ne kamata ne koutou, ko te mea ke fakaoti a te mea telā ne toka koutou o fai e ‵tusa mo mea kolā e maua ne koutou. 12  Kafai e toka se tino o tuku atu ana mea, e faigofie ke talia te mea tenā e ‵tusa eiloa mo mea e maua ne te tino,+ kae e se ko mea kolā e se maua ne se tino. 13  Me e se manako au ke faigofie ki nisi tino, kae ke faigata ki a koutou; 14  kae e auala i se faifaiga paleni, e mafai o fesoasoani atu otou mea ‵toe i te taimi nei ki mea e manakogina ne latou, ko te mea ke mafai foki o fesoasoani atu olotou mea ‵toe i te taimi e manakogina ei ne koutou, ko te mea ke mafai o fakapaleni aka a mea. 15  E pelā eiloa mo pati i te tusi: “A te tino telā e uke ana mea e se tō uke ana mea, kae ko te tino telā e mu‵tana ana mea e se tō mu‵tana ana mea.”+ 16  Ke fakafetai ki te Atua me ne tuku atu ne ia te loto naunau tenā mō koutou ki te loto o Tito,+ 17  me ko oti eiloa ne saga faka‵lei mai a ia ki te fakamalosiga tenā, kae ona ko tena loto naunau ko fanatu ei a ia ki a koutou mo te lotomalie. 18  Kae ko uga atu ne matou a ia fakatasi mo te taina telā e lauiloa i fakapotopotoga katoa ona ko te tala ‵lei. 19  E se gata i ei, ne ‵tofi aka foki a ia ne fakapotopotoga ke fai mo fai te motou taugasoa faimalaga ke tuku atu a te meaalofa kaimalie tenei mō te vikiga o te Aliki kae ke fakatalitonu aka ei te motou toka o fesoasoani atu. 20  Tela la, e se ma‵nako matou ke fameo se tino ki a matou e uiga ki te tufaatuga o te meaalofa telā ne tuku mai ki a matou ke tufa atu.+ 21  Me ‘e tausi ne matou a mea katoa mo te fakamaoni, e se gata fua i mua o Ieova* kae e pelā foki i mua o tino katoa.’+ 22  E se gata i ei, e uga atu ne matou fakatasi mo latou a te motou taina telā ne tofotofo faeloa ne matou kae iloa aka me e galue malosi i mea e uke, kae nei ko lasi atu tena galue malosi ona ko te lasi o tena loto talitonu ki a koutou. 23  Kae kafai e isi se fakalotolotolua e uiga ki a Tito, a ia ko toku taugasoa telā e ga‵lue fakatasi māua mō otou manakoga; io me kafai e isi ne fesili e uiga ki omotou taina, a latou ko apositolo ki fakapotopotoga mō te vikiga o Keliso. 24  Tela la, ke fakaasi atu a te otou a‵lofa ki a latou,+ kae fakaasi atu ki fakapotopotoga a te pogai ne fai‵pati fakamata‵mata ei matou e uiga ki a koutou.

Fakamatalaga mai lalo

Onoono ki te MF A5.