Te Tusi i te Lua ki te Kau Kolinito 4:1-18

  • Mainaga o te tala ‵lei (1-6)

    • Ko fakapouli a mafaufau o tino sē tali‵tonu (4)

  • Koloa tāua i loto i mea ne faite ki kele (7-18)

4  Tela la, ona ko te mea ko maua ne matou a te galuega tenei e auala i te alofa fakamagalo telā ne fakaasi mai ki a matou, e se mafai o ‵fiu matou.  Kae ko oti ne tiakina ne matou a mea ‵funa kae fakalumaluma, e se faitogafiti matou, io me akoako ‵se atu a te muna a te Atua;+ kae mai te fakaasi atu o te munatonu, ko fai ei matou mo fai ne fakaakoakoga ‵lei ki loto lagona o tino katoa i mua o te Atua.+  A te ‵tonuga loa, kafai e ‵pono ki te veli a te tala ‵lei tenei e folafola atu ne matou, e ‵pono fua ki a latou kolā ko fakaseai,  ko tino sē tali‵tonu kolā ko oti ne fakapouli olotou mafaufau+ ne te atua o te olaga masani tenei,+ ko te mea ke se maina atu a te mainaga+ o te ‵malu o te tala ‵lei e uiga ki te Keliso, telā ko te fakatusa o te Atua.+  Me e se talai atu matou e uiga ki a matou eiloa, kae e uiga ki a Iesu Keliso e pelā me ko te Aliki kae ko matou e pelā me ko otou pologa ona ko Iesu.  Me ko te Atua eiloa telā ne fai mai: “Ke maina atu te mainaga mai te pouliga,”+ kae ko oti ne fakamaina ne ia omotou loto+ ke maina i te iloaga ‵malu o te Atua e auala i mata o Keliso.  Kae ko maua ne matou a te koloa tāua+ tenei i loto i mea ne faite ki kele,*+ ko te mea ke maua ne matou a te malosi telā e sili atu i te malosi masani mai te Atua kae e se maua mai i a matou.+  E taotaomaki matou ne fakalavelave mai feitu katoa, kae e se sai‵tia matou. E ‵numi masei matou, kae e isi faeloa se auala e avanoa ke ‵sao ei matou;+  e fakasauagina matou kae e se tuku tiaki;+ e ‵pei ‵tuki matou ki lalo, kae e se fakamaseigina.+ 10  E kufaki faeloa ne matou i omotou foitino a faifaiga tamate tino kolā ne logo‵mae ei a Iesu,+ ko te mea ke mafai o lavea atu a te olaga o Iesu i loto i omotou foitino. 11  Me i a matou kolā e ola e fakafesagai atu faeloa ki te mate+ ona ko Iesu, ko te mea ke mafai foki o lavea atu te olaga o Iesu i loto i omotou foitino ‵mate konei. 12  Tela la, a te mate e galue i loto i a matou, kae ko te ola i loto i a koutou. 13  Ona ko te mea e maua fakatasi ne matou a te agaga o te fakatuanaki e pelā mo te mea telā ne tusi mai penei: “Ona ko te mea ne fakaasi atu faeloa ne au te fakatuanaki ko faipati atu ei au”;+ e penā foki matou ona ko te mea ne fakaasi atu faeloa ne matou te fakatuanaki, ko fai‵pati atu ei matou 14  mo te iloa me i te Atua telā ne fakatu aka ne ia Iesu ka faka‵tu aka foki ne ia matou fakatasi mo Iesu kae ka tuku atu ei matou fakatasi mo koutou.+ 15  Me ne fai a mea katoa konei mō koutou, ko te mea ke fakalasi atu te alofa tauanoa ona ko pati fakafetai a tino e tokouke kolā e tuku atu mō te vikiga o te Atua.+ 16  Tela la, e se ‵fiu matou, kae e tiga eiloa e gasolosolo ifo o vāi‵vai omotou foitino i tua, kae e ma‵losi eiloa omotou loto me e faka‵fou faeloa omotou malosi i aso takitasi. 17  E tiga eiloa e vave oti a puapuaga* kae e mā‵ma foki, e fakagalue ne latou i loto i a matou a te ‵malu telā e gasolosolo aka faeloa o lasi atu kae e tumau foki ki te se-gata-mai,+ 18  i te taimi e ‵kilo atu faeloa i ei omotou mata, e se ki mea kolā e lavea, kae ki mea e se lavea.+ Me i mea e lavea e se tumau, kae ko mea e se lavea e tumau ki te se-gata-mai.

Fakamatalaga mai lalo

Io me “i loto i tiā kele.”
Io me “tofotofoga.”