Te Tusi i te Lua ki te Kau Kolinito 2:1-17

  • Manakoga o Paulo ke aumai ne ia te fiafia (1-4)

  • Ko fakamagalo se tino agasala kae toe foki mai ki loto (5-11)

  • Paulo i Teloa mo Maketonia (12, 13)

  • Te galuega talai, se solo o te manumalo (14-17)

    • E se fakaaoga te muna a te Atua ke maua ei a tupe (17)

2  Ko oti ne fakaiku aka ne au i toku mafaufau, ke se toe fanatu au ki a koutou mo te fanoanoa.  Me kafai e fai ne au koutou ke fanoa‵noa, ko oi la ka fakafiafia ne ia au kae na ko te tino fua telā ne fakafanoanoa ne au?  Ne tusi atu ne au aku mea ne fai, ko te mea kafai e fanatu au e se fanoanoa au ona ko latou kolā e ‵tau o fiafia au ki ei, me e talitonu au i te mea telā e aumai ne ia te fiafia ki a au e aumai foki i ei te fiafia ki a koutou katoa.  Ona ko te uke o puapuaga mo te lasi o te mafatia ne tusi atu ei au ki a koutou mo loimata e uke, e se ko te fia fakafanoanoa atu ki a koutou,+ kae ke iloa ne koutou te ‵poko o toku alofa mō koutou.  Kafai ko oti ne aumai ne se tino a te fanoanoa,+ e se fakafanoanoa ne ia au, kae ko koutou katoa​—e se manako au ke tō ‵mafa aku pati e fai atu.  A te polopolokiga ‵mafa tenei ne tuku atu ne te tokoukega o koutou e lava eiloa mō se vaegā tagata penā;  nei la, ko ‵tau o fakamagalo kae fakamafanafana ne koutou a ia,+ ko te mea ke mo a ma tō silia tena loto vāivāi ona ko te lasi o te fanoanoa.+  Tela la, e fakamalosi atu au ki a koutou ke fakamautinoa atu a te otou a‵lofa ki a ia.+  Tenei foki te pogai ne tusi atu ei au ki a koutou: ke fakatalitonu aka me e mata, e faka‵logo eiloa koutou i mea katoa. 10  Kafai e fakamagalo ne koutou se tino i so se mea, e penā foki au. E tonu, so se mea ko oti ne fakamagalo ne au, (māfai ko oti ne fakamagalo ne au se mea) ne fai te mea tenā mō te otou ‵lei i mua o Keliso, 11  ko te mea ke se ‵poa tatou ne Satani,+ me e maina ‵lei tatou i ana togafiti.+ 12  I taku okoga ki Teloa+ o folafola atu a te tala ‵lei e uiga ki a Keliso, ne matala mai ki a au a te mataloa i te Aliki, 13  e seai se fakatapūga ne maua ne au me ne seki maua ne au a Tito,+ toku taina. Tenā ne fakatofa atu ei au ki a latou kae fanatu ki Maketonia.+ 14  Kae ke fakafetai ki te Atua telā e takitaki faeloa ne ia tatou i te solo o te manumalo fakatasi mo Keliso kae e auala i a tatou ko salalau atu ei te manogi gali o te malamalama e uiga ki a ia i koga katoa. 15  Ko fai tatou ki te Atua e pelā me se mea manogi gali a Keliso mai i a latou kolā ka ‵sao mo latou kolā ka fakaseai atu; 16  i te kilokiloga a latou kolā e fakamuli, ko te manogi o te mate telā e takitaki atu ei ki te mate,+ i te kilokiloga a latou kolā ne ‵mua, ko te manogi o te ola telā e takitaki atu ei ki te ola. Kae ko oi la e fetaui ‵lei mo mea konei? 17  Ko tatou, me e se fakaaoga ne tatou a te muna a te Atua+ ke maua mai i ei a tupe e pelā mo tino e tokouke, kae e fai‵pati atu tatou mo te fakamaoni katoatoa e pelā me ne tino ne uga mai ne te Atua, ao, i mua o te Atua kae ‵kau fakatasi mo Keliso.

Fakamatalaga mai lalo