Te Tusi i te Lua ki te Kau Kolinito 12:1-21

  • Fakaasiga ki a Paulo (1-7a)

  • ‘Mea makaikai i te foitino’ o Paulo (7e-10)

  • E sē se tino fatauva i apositolo fia ‵sili (11-13)

  • Manavase a Paulo ki te kau Kolinito (14-21)

12  E ‵tau mo au o faipati fakamatamata. E se aoga te mea tenei, kae ka saga atu au ki mea fakaofoofogia e lavea+ mo fakaasiga a te Aliki.+  E iloa ne au se tagata telā se soko o Keliso, i te 14 tausaga ko ‵teka ne avaka ki luga i te lagi tuatolu. E se iloa ne au me ne avaka i te foitino io me ikai, ko te Atua e iloa ne ia.  E tonu, e iloa ne au se vaegā tagata penā—me ne avaka i te foitino io me ikai, e se iloa ne au; ko te Atua e iloa ne ia—  telā ne avaka ki loto i te palataiso kae ne lagona ne ia a pati kolā e se mafai o faipatigina, kae e se ‵tau o faipati ki ei se tino.  Ka faipati fakamatamata au e uiga ki te tagata tenei, kae ka se faipati fakamatamata au e uiga ki a au eiloa kae vagana fua ko oku vāivāiga.  Me kafai foki loa e manako au o faipati fakamatamata, e se ko tena uiga i a au se tino valea, me e faipati atu ne au te mea tonu. Kae ka se fai eiloa au penā, ko te mea ke seai se tino e tavae ne ia au kae na ko mea fua kolā ne lavea kae lagona tonu ne ia mai i a au,  ona ko te mauaga fua o fakaasiga fakaofoofogia penā. Ko te mea ke mo a ma tō silia toku fia maluga, ne tuku mai ei ki a au se mea makaikai ki toku foitino,+ se agelu a Satani, ke laupāpā faeloa ne ia au, ko te mea ke mo a ma tō silia toku fia maluga.  Ne fakatagi atu au ki te Aliki fakatolu taimi e uiga ki te mea tenei, ko te mea ke ave kea‵tea mai i a au.  Kae ne fai mai a ia ki a au: “A toku alofa tauanoa ko lava loa mō koe, me i toku ‵mana e katoatoa ‵lei i taimi e vāivāi ei koe.”+ Tela la, ka faipati fakamatamata au mo te fiafia i oku vāivāiga, ko te mea ke tumau te ‵mana o Keliso i luga i a au e pelā me se faleie. 10  Tela la, ka fiafia au i oku vāivāiga, i pati faka‵mae loto, i taimi e se lava ei aku mea, i fakasauaga mo mea faiga‵ta mō Keliso. Me ko te taimi e vāivāi ei au, ko te taimi foki tenā e malosi ‵ki ei au.+ 11  Ko oti ne fai au e pelā me se tino valea. Ne fakamalosi ne koutou au ke fai penā, me ne ‵tau o taku ‵lei ne koutou au. Me i a au e sē se tino fatauva, i se mea e tasi, māfai e faka‵tusa au ki otou apositolo fia ‵sili, e tiga eiloa e seai soku aoga.+ 12  Se mea tonu me ne fakaasi atu ki a koutou a fakailoga o te apositolo e auala i te lasi o te kufaki,+ e pelā foki mo fakailoga mo mea fakaofoofogia, mo galuega ‵mana.+ 13  I te feitu fea ne fai ei koutou e pelā me ne tino fatauva māfai e fakatusa ki nisi fakapotopotoga katoa? Me i a au ne seki fai mo fai se amoga ‵mafa ki a koutou.+ A koutou ke a‵lofa kae ke fakamagalo mai foki taku mea ‵se tenei. 14  Kiloke! Tenei te tolu o taimi ko toka ei au o fanatu ki a koutou, kae ka se fai au mo fai se amoga ‵mafa ki a koutou. Me i a au e se ‵sala atu ki otou mea,+ kae ki a koutou; me e se ‵tau o fakamoe‵moe a tama‵liki+ ke fakaputu aka a mea mō olotou mātua, ka ko mātua mō olotou tama‵liki. 15  Kae e pelā mo au, ka fiafia malosi au o fakaaoga aku mea katoa mo toku malosi kātoa mō koutou.+ Kafai e lasi toku alofa mō koutou, e a, e ‵tau fua o foliki te otou a‵lofa ki a au? 16  E ui i ei, e seki fai au mo amoga ‵mafa ki a koutou.+ Kae e fai mai koutou i a au e “faitogafiti” kae ne ‵po ne au koutou i se “auala faitogafiti.” 17  E a, ne faka‵se ne au koutou e auala i a latou kolā ne uga atu ne au ki a koutou? 18  Ne fakamalosi ne au a Tito kae ne uga atu ne au se taina ke olo atu mo ia. E a, ne takolekole koutou ne Tito?+ E a, e seki sa‵sale katoa matou i te agaga e tasi tenā? Mo te auala e tasi tenā? 19  E mata, ne mafau‵fau faeloa koutou me ko taumafai matou o ‵pulu matou ki a koutou? E fai‵pati atu matou i mua o te Atua i te ‵kau fakatasi mo Keliso. Taina fagasele, e fai atu ne matou a mea katoa konei ke fakama‵losi aka ei koutou. 20  Me e tai mataku loa au, me kafai e oko atu au, kāti ka se maua atu ne au koutou e pelā mo te mea e fakamoemoe au ki ei kae ka se maua ne koutou au e pelā mo te mea e fakamoe‵moe koutou ki ei, kae i lō te fai penā, kāti ka maua mai i ei a te fai taua, te loto masei, te loto ita, kinauga, te fatufatu, ko pati musu‵musu, ko tino e ‵fonu i te fakamata‵mata, mo mavae‵vaega. 21  Kafai e toe foki atu au, kāti ka fakamasiasi au ne toku Atua i mua o koutou, kae kāti ka mafatia toku loto i te fanoanoa ona ko tino e tokouke kolā ne agasala muamua kae ne seki sala‵mo i olotou amioga lai‵lai mo amioga fakatauavaga sē ‵tau* mo amioga matafatu* kolā ne fai ne latou.

Fakamatalaga mai lalo

Eleni, por·neiʹa. Onoono ki te FP.
Io me “amioga fakatakalialia.” Eleni, a·selʹgei·a. Onoono ki te FP.