Te Tusi i te Lua ki te Kau Kolinito 11:1-33

  • Paulo mo apositolo fia ‵sili (1-15)

  • Mea faiga‵ta ne oko ki a Paulo e pelā me se apositolo (16-33)

11  E fakamoemoe au ke talia ne koutou a te logosala o aku pati ne fai atu. Kae e tonu, me e fa‵ki eiloa koutou i a au!  Me i a au e masalosalo ki a koutou e pelā mo te masalosalo o te Atua, me ne tauto atu au ke fakaavaga koutou mo se tagata e tokotasi ko te mea ke tuku atu ne au a koutou e pelā me se tamafine ‵ma ki a Keliso.+  Kae e manavase au me e pelā eiloa mo Eva telā ne fakakolekole ne te gata ki tena auala faitogafiti,+ e mafai foki o fakamaseigina otou mafaufau mai te fakamaoni mo te tulaga ‵ma telā e ‵tau o maua ne Keliso.+  Me kafai e fanatu se tino kae e talai atu ne ia se isi Iesu i tafa o te mea telā ne talai atu ne matou, io me ne maua ne koutou se isi agaga i tafa o te mea telā ne maua ne koutou, io me se isi tala ‵lei i tafa o te mea telā ne talia ne koutou,+ e faigofie ke fa‵ki koutou i te tino tenā.  Me i toku iloa e seai se mea e tasi e fatauva ei au i lō otou apositolo fia ‵sili.+  Me kafai e se apo au i te faipati,+ kae e se penā eiloa toku iloa; kae ne fakaasi manino atu ne matou a te mea tenā ki a koutou i auala katoa mo mea katoa.  E mata, ne fai ne au se agasala mai te fakamalalo ifo ne au a au eiloa ko te mea ke fakamaluga aka ei koutou, me ne folafola atu ne au mo te fiafia ki a koutou a te tala ‵lei e uiga ki te Atua e aunoa mo se ‵togi?+  Ne ‵fao ne au a mea mai nisi fakapotopotoga mai te talia ne au te lotou fesoasoani ko te mea ke tavini atu au ki a koutou.+  I taku nofoga i a koutou kae manako au ki se mea, ne seki fai au mo fai se amoga ‵mafa ki se tino e tokotasi i a koutou, me ne lava kae ‵toe a mea e tausi ei au kolā ne tuku mai ne taina kolā ne o‵mai mai Maketonia.+ E tonu, ne fai ne au so se mea ke mo a eiloa e fai au mo fai se amoga ‵mafa ki a koutou kae ka fakatumau eiloa ne au a te faiga tenā.+ 10  E pelā eiloa mo te munatonu e uiga ki a Keliso telā e nofo i loto i a au, ka se fakagata eiloa toku faipati fakamatamata+ i kogā koga katoa o Akaia. 11  Se a te pogai? Ona ko au e se alofa ki a koutou? E iloa ne te Atua i a au e alofa ki a koutou. 12  Kae ko te mea telā e fai ne au ka fai faeloa ne au,+ ko te mea ke fakaseai ne au a fakamasakoga a tino kolā e ma‵nako ke ‵pau mo matou i te galuega telā e fakamata‵mata ei latou. 13  Me i tino konā ne apositolo ‵loi, ne tino faitogafiti, e ‵fuli ne latou a latou eiloa ke pelā me ne apositolo a Keliso.+ 14  Kae e se tioa eiloa me i a Satani e fulifuli faeloa ne ia a ia eiloa ko te mea ke fai a ia e pelā me se agelu o te mainaga.+ 15  Tela la, e sē se mea fakaofoofogia māfai e tumau foki ana tavini i te fulifuliga ne latou a latou eiloa ke fai pelā me ne tavini o te amiotonu. Kae ko te lotou ikuga e fakavae eiloa ki olotou galuega ne fai.+ 16  E toe fai atu au penei: Ke se mafaufau se tino i a au e valea. Kae kafai e penā loa te otou kilokiloga, ke talia la ne koutou au e pelā me se tino valea, ko te mea ke faipati fakamatamata malie au i ei. 17  A te mea telā e faipati atu ne au nei e se ko te tautali atu ki te fakaakoakoga a te Aliki, kae e pelā me se tino valea, telā e faipati fakamatamata mo te loto talitonu ki a ia eiloa. 18  Ona ko te fai‵pati fakamata‵mata o tino e tokouke i te feitu faka-te-foitino, ka penā foki eiloa au. 19  Ona ko koutou ko oko eiloa i te “loto malamalama,” ne fa‵ki ne koutou mo te loto fiafia a tino va‵lea. 20  E tonu, ne fa‵ki eiloa koutou i so se tino telā e fakapologa ne ia koutou, i so se tino telā e ‵tae faka‵ma ne ia otou kope, i so se tino telā e puke ne ia so se mea a koutou, i so se tino telā e fakamaluga aka ne ia a ia eiloa ke maluga atu i a koutou, mo so se tino telā e ‵pa ne ia otou mata. 21  Se mea fakamā ki a matou ke fai atu a pati konei, me e foliga mai i a matou e vāi‵vai. Kae kafai e loto ‵toa a nisi tino—ko faipati atu au i se auala valea—ko fai foki au e pelā me se tino loto toa. 22  A latou ne tino Epelu? E penā foki au.+ A latou ne tino Isalaelu? E penā foki au. A latou ko tama* a Apelaamo? E penā foki au.+ 23  A latou ne tavini a Keliso? E tali atu au e pelā me se tino valea, e sili fakafia atu au i a latou: e uke atu aku galuega ne fai,+ e uke atu a taimi ne falepuipui ei au,+ e uke atu a taimi ne tā fakamasei ei au, kae uke foki a taimi toeitiiti kae mate ei au.+ 24  E lima taimi ne ‵kini ei au ne tino Iutaia ki ‵kini e tolusefulu iva,+ 25  e tolu taimi ne ‵kini ei au ki ‵kini,+ ne peipei au ki fatu i se taimi e tasi,+ e tolu taimi ne kasa ei te motou vaka,+ kae ne tapeapea au i te moana ‵poko i te po mo te ao; 26  i taimi e faimalaga ei, e fepaki au mo mea fakama‵taku i vaitafe, mea fakama‵taku mai tino kai‵soa, mea fakama‵taku mai tino o toku fenua,+ mea fakama‵taku mai tino o fenua fakaa‵tea,+ mea fakama‵taku i fakai ‵lasi,+ mea fakama‵taku i te togavao, mea fakama‵taku i te tai, mea fakama‵taku mai taina ‵loi, 27  i te galue ‵mafa kae fi‵ta, i te sē ti moe i po,+ i te fiakai mo te fiainu,+ i te seai o meakai i taimi e uke,+ i te mokotia kae seai ne oku gatu. 28  I tafa o mea katoa konā, e isi foki se mea telā e tauave faeloa ne au i aso takitasi, ko toku manavase e uiga ki fakapotopotoga katoa.+ 29  Ko oi la e vāivāi, kae ko au e se vāivāi? Ko oi la e siga kae se ‵mae toku loto i ei? 30  Kafai e ‵tau mo au o faipati fakamatamata, ka faipati fakamatamata au i mea kolā e fakaasi mai i ei oku vāivāiga. 31  E iloa ne te Atua telā ko te Tamana o te Aliki ko Iesu, ko te Atua telā e ‵tau o avatu ki ei a tavaega ki te se-gata-mai, i a au e se loi. 32  I Tamaseko, a te kovana telā ne nofo mai lalo o te tupu ko Aleta, ne leoleo ne ia te fakai o tino Tamaseko ko te mea ke puke ne latou au, 33  kae ne tukutuku ifo au ki lalo i loto i se kete mai i se famalama i te ‵pui+ kae ne sao ei au mai i a ia.

Fakamatalaga mai lalo

Eleni, “fanau.”