Te Muamua Tupu 17:1-24

  • Ko ‵valo ne te pelofeta ko Elia me ka seai ne vaiua (1)

  • Elia ne fagai ne leveni (2-7)

  • Ko asi atu a Elia ki se fafine ko mate tena avaga i Salefata (8-16)

  • Ko mate te tama a te fafine ko mate tena avaga kae toe fakatu aka (17-24)

17  Ne fai atu a Elia*+ te tino Tisepi, kae nofo i Kileata+ ki a Aapo, ana muna: “E pelā eiloa mo Ieova te Atua o Isalaelu telā e tavini atu au ki ei e ola, i tausaga konei ka seai eiloa ne vaiua vagana ke faipati atu au!”+  Ne oko mai te fakatonuga a Ieova ki a ia, ana muna:  “Tiaki te koga tenei kae fano ki te feitu ki saegala o ‵muni i te Vanu o Kilita, i te feitu ki saegala o te Iolitana.  E ‵tau o inu koe mai te vai tenā i ei, kae ka fakatonu ne au a manu eva ko leveni ke avatu ne latou au meakai.”+  Ne fano fakavave a ia kae fai ne ia a te fakatonuga a Ieova; ne fano a ia o nofo i tafa o te Vanu o Kilita, i te feitu ki saegala o te Iolitana.  Kae ne avatu eiloa ne leveni a meakai mo ‵kano o manu i te tafataeao mo meakai mo ‵kano o manu i te afiafi, kae ne inu a ia mai te vai.+  Kae i te fia o aso mai tua ifo, ne ‵masa pakupaku te vai,+ me seki ai eiloa ne vaiua ne ‵to i te fenua.  Ne oko mai te fakatonuga a Ieova ki a ia:  “Tu ki luga kae fano ki Salefata, se fakai o Saitonu, o nofo i ei. Kiloke! Ka fakatonu ne au se fafine ko mate tena avaga i konā ke avatu ne ia au meakai.”+ 10  Ne tu aka tou tagata kae fano ki Salefata. I tena okoatuga ki te mataloa o te fakai, e isi se fafine ko mate tena avaga e fai fafie. Ne kalaga atu a ia ki tou fafine, ana muna: “Fakamolemole, aumai aka ne mu vai i se ipu ke inu aka au.”+ 11  I tena auala o puke mai a mu vai, ne toe kalaga atu a ia ki tou fafine: “Fakamolemole, puke mai aka foki ne mu falaoa i ou lima.” 12  Kae ne fai atu tou fafine: “E pelā eiloa mo Ieova tou Atua e ola, e seai ne aku falaoa, kae isi fua ne aku mu falaoa ‵mata i te tiā lasi mo mu sinu i te tiā foliki.+ Au nei e fai fafie, ko fano ei au o ‵tunu a mu falaoa konā ma māua mo taku tama. Tenei eiloa te toe ‵kaiga a māua, ko ‵mate ei māua.” 13  Tenā ne fai atu ei a Elia ki tou fafine: “Sa mataku. Fano ki loto o fai te mea ne fai mai ne koe. Kae fai muamua ne koe se tamā puta falaoa ma aku mai i au mu mea konā, ko aumai ei ne koe ki tua i a au. Ka oti ko fai ei ne koe ne mu meakai ma koe mo tau tama. 14  Konei a pati a Ieova te Atua o Isalaelu ne fai: ‘A te tiā falaoa lasi tenā ka se palele, kae ko te tiā sinu foliki tenā ka se masa ke oko ki te aso e fai ei ne Ieova ke ‵to te vaiua ki luga i te laukele.’”+ 15  Ne fano tou fafine kae fai ne ia a mea ne fai atu ne Elia, kae ne ‵kai ei a ia mo tena kāiga fakatasi mo Elia i te fia o aso.+ 16  A te tiā falaoa lasi ne seki palele, kae ko te tiā sinu foliki ne seki masa, e ‵tusa eiloa mo te fakatonuga a Ieova ne fai e auala i a Elia. 17  Mai tua o mea konei, ne masaki a te tama tagata a te fafine i o ia te fale, kae ne masaki malosi eiloa tou tagata, tenā ne galo ei tena mānava.+ 18  Ne fai atu tou fafine ki a Elia: “Se a te mea e ita mai ei koe ki a au,* e te tagata o te Atua tonu? E a, a koe ne vau o fakamasaua mai ki a au aku agasala kae ke tamate taku tama?”+ 19  Ne fai atu a ia ki tou fafine: “Tuku mai tau tama.” Tenā ne puke ei ne ia mai lima o tou fafine kae sau ne ia ki te potu i te tuafale, telā e nofo a ia i ei, kae fakamoe ne ia te tamaliki ki luga i tena moega.+ 20  Ne kalaga atu a ia ki a Ieova: “Ieova toku Atua,+ e a, ko aumai foki ne koe te puapuaga ki te fafine e nofo au i ei mai te faiga o tena tama ke mate?” 21  Tenā ne punou fakatolu ifo ei a ia ki luga i te tamaliki kae kalaga atu ki a Ieova: “Ieova toku Atua, fakamolemole, toe fakafoki mai aka te ola ki te tamaliki tenei.” 22  Ne fakalogologo eiloa a Ieova ki te fakatagi a Elia,+ kae ne fakafoki atu a te ola o te tamaliki ki a ia, ko te mea loa ko ola.+ 23  Ne puke aka ne Elia te tamaliki kae ave ifo ne ia mai te potu i te tuafale ki loto i te fale kae tuku atu ne ia ki tena mātua; kae ne fai atu a Elia: “Kiloke, a tau tama ko ola.”+ 24  I konā loa, ne fai atu ei te fafine ki a Elia: “Nei la, ko iloa ne au i a koe se tagata o te Atua+ kae ko te muna a Ieova i tou gutu ko te munatonu eiloa.”

Fakamatalaga mai lalo

Tena uiga “A Toku Atua ko Ieova.”
Io me “Ne a aku mea ne fai ki a koe . . . ?”