Te Tusi Muamua ki a Timoteo 4:1-16

  • Fakaeteete i akoakoga a temoni (1-5)

  • Te auala ke fai mo fai se tavini ‵lei a Keliso (6-10)

    • Fakamalosiga o te foitino mo te tapuaki fakamaoni ki te Atua (8)

  • Saga faka‵lei ki au akoakoga (11-16)

4  E tiga te feitu tenā, e fakaasi manino mai i te muna fakaosofia* me i taimi fakamuli ka ‵to kea‵tea a nisi tino mai te fakatuanaki, ka ‵saga atu latou ki fakamatalaga fakaosofia+ sē ‵tonu mo akoakoga a temoni,  e auala i tino fia amio‵tonu kolā e fai‵pati ki mea ‵loi,+ kae ko ‵mate olotou loto lagona e pelā me ne ‵sunu ki se fiti ‵ka.  E fakatapu ne latou a tino ke se a‵vaga+ kae fakatonu atu ki tino ke se ‵kai ki meakai+ kolā ne faite ne te Atua ke ‵kai ki ei+ mo te loto fakafetai, ne tino kolā e fakatuanaki+ kae e iloa tonu ne latou te munatonu.  Me i mea katoa a te Atua ne faite e ‵lei,+ kae e seai se mea e ‵tau o tiakina+ māfai e maua a mea konā mo te loto fakafetai,  me e faka‵magina a mea konā e auala i te muna a te Atua mo te ‵talo atu e uiga ki ei.  Mai i te tukuatuga o pati fakatonutonu konei ki te kautaina, ka fai ei koe mo fai se tavini ‵lei a Keliso Iesu, se tino e fagai faka‵lei ki muna o te fakatuanaki mo akoakoga ‵lei kolā ne tautali faka‵lei koe i ei.+  Kae ‵teke atu ki tala sē ‵tonu,+ e pelā mo tala kolā e sau‵tala ki ei a loma‵tua. I te suā feitu, taumafai malosi ke fakamasani koe ki mea e uiga ki te tapuaki fakamaoni ki te Atua.  Me i fakamalosiga faka-te-foitino e aoga fua ki nai mea, kae ko te tapuaki fakamaoni ki te Atua e aoga ki mea katoa, me e folafola mai i ei a te ola tenei e pelā foki mo te ola telā ka oko mai.+  E tonu eiloa te fakamatalaga tenā kae e ‵tau o talia katoatoa. 10  Tenei eiloa te pogai e ga‵lue fakafi‵ta ei tatou kae fakapalele foki ‵tou mafi,+ me ko oti ne fakaeke atu ‵tou fakamoemoega ki luga i te Atua ola, telā ko te Fakaola+ o vaegā tino katoa,+ kae maise eiloa a tino fakamaoni. 11  Tuku atu faeloa a fakatonuga konei kae akoako atu a mea konā. 12  Ke mo a eiloa ma talia se tino ke manatu fatauva ki tou tulaga talavou. I lō te fai penā, ke fai koe mo fakaakoakoga ki tino fakamaoni i au pati, i au amioga, i tou alofa, i tou fakatuanaki, mo tou tulaga ‵ma. 13  Tumau i te faitau atu i mua o tino katoa,+ fakamalosi kae akoako atu latou ke oko ki te taimi e oko atu ei au. 14  Ke mo a koe ma fakatamala i te meaalofa tenā i a koe kae telā ne tuku atu e auala i se valoaga i te fakaekeatuga o lima o te kau toeaina ki luga i a koe.+ 15  Mafaufau ‵loto ki mea konei; ke ‵goto ifo ki loto i tou loto, ko te mea ke lavea ‵lei ne tino katoa tou gasolo ki mua. 16  Saga faka‵lei faeloa ki a koe mo au akoakoga.+ Tumau i mea konei, me kafai e fai ne koe a mea konei ka fakasao ne koe a koe eiloa mo latou kolā e faka‵logo ki a koe.+

Fakamatalaga mai lalo

Eleni, “te agaga.”