Te Tusi Muamua ki a Timoteo 2:1-15

  • ‵Talo mō vaegā tino katoa (1-7)

    • E tokotasi te Atua, e tokotasi te sokoga (5)

    • Te togiola telā e fetaui tonu mō tino katoa (6)

  • Fakatonutonuga mō tāgata mo fāfine (8-15)

    • ‵Pei ki gatu mata ‵lei (9, 10)

2  Muamua la, e fakamalosi atu au ke fai faeloa otou fakatagi, talosaga, ‵talo mō nisi tino, mo ‵talo fakafetai mō vaegā tino katoa,  e uiga ki tupu mo tino katoa i tulaga ma‵luga*+ ko te mea ke tumau tatou i te ola i se olaga ‵lei kae filemu fakatasi mo te tapuaki fakamaoni ki te Atua mo te fakaeteete.+  A te mea tenei e ‵lei kae e talia i te kilokiloga a te Atua, te ‵tou Fakaola,+  telā e loto ke faka‵sao a vaegā tino katoa+ kae ke iloa tonu ne latou a te munatonu.  Me e tokotasi fua te Atua,+ kae e tokotasi foki te sokoga+ i te va o te Atua mo tino,+ ko te tagata, ko Keliso Iesu,+  telā ne tuku mai ne ia a ia eiloa mo fai se togiola telā e fetaui tonu mō tino katoa*+​—tenei eiloa te mea e ‵tau o molimau ki ei i te taimi tonu.  Ko te molimau+ eiloa tenei ne ‵tofi ei au ke fai mo fai se tino talai mo se apositolo+​—au e faipati ki te mea tonu, au e se loi​—se faiakoga mō fenua fakaa‵tea+ e uiga ki te fakatuanaki mo te munatonu.  Tela la, au e manako ke ‵talo a tāgata i koga katoa kae sisi aka olotou lima mo te fakamaoni,+ e aunoa mo te ita+ mo te fia kinau.+  E penā foki a fāfine, e ‵tau o teuteu faka‵lei latou mai te ‵pei ki gatu mata ‵lei,* i te agamalu mo te mafaufau ‵lei, e se ko te vaegā ‵filiga o laulu mo aulo mo penina io me ko te ‵pei ki gatu ‵togi ‵mafa,+ 10  kae i se auala telā e fetaui ‵lei mo fāfine kolā e tavini atu mo te fakamaoni ki te Atua,+ e auala i te faiga o galuega ‵lei. 11  Ke nofo fifilemu a te fafine i te faiga o akoakoga kae ke fakalogo katoatoa.+ 12  E se talia ne au se fafine ke akoako io me pule atu ki se tagata, kae e ‵tau o nofo fifilemu a ia.+ 13  Me ne faite muamua a Atamu, kae fakamuli ko Eva.+ 14  E se gata i ei, e se ko Atamu ne faka‵segina, kae ko te fafine telā ne faka‵segina katoatoa+ kae ne fai mo fai se tino solitulafono. 15  E tiga te feitu tenā, ka puipuigina te fafine i taimi e fanau ei,+ māfai e tumau a ia i te fakatuanaki mo te alofa mo te tapu fakatasi mo te mafaufau ‵lei.+

Fakamatalaga mai lalo

Io me “i tulaga pule.”
Io me “vaegā tino katoa.”
Io me “mata ‵tau.”