Te Muamua Samuelu 28:1-25

  • Ko fanatu a Saulo ki se tino e fesokotaki mo agaga i Enetolo (1-25)

28  I aso konā ne fakamaopoopo ne tino Filisitia olotou kautau o taua atu ki tino Isalaelu.+ Tenā ne fai atu ei a Akisa ki a Tavita: “E iloa ‵lei ne koe me i a koe mo au tāgata e ‵tau o olo fakatasi mo au i te taua.”+  I konā ne fai atu a Tavita ki a Akisa: “E iloa ‵lei ne koe a te mea e ‵tau o fai ne tau tavini.” Ne fai atu a Akisa ki a Tavita: “Tenā te pogai ka fakasopo ei ne au a koe mo fai taku leoleo tumau.”*+  Ko oti ne mate a Samuelu i te taimi tenā, kae ne ‵tagi fanoa‵noa a Isalaelu kātoa ona ko ia kae tanu ne latou a ia i Lama, tena fakai tonu.+ Kae ne afuli kea‵tea ne Saulo a tino e fesokotaki mo agaga mo tino fakamatala mea ‵tupu mai te fenua.+  Ne maopoopo fakatasi a tino Filisitia kae olo o ‵nofo i Sunema.+ Tenā ne fakamaopoopo ei ne Saulo a Isalaelu kātoa, kae olo atu o ‵nofo i Kilipoa.+  I te taimi ne lavea ei ne Saulo a te kautau a tino Filisitia, ne mataku a ia kae ne tuki malosi tena fatu.+  E tiga eiloa ne ‵sala atu a Saulo ki a Ieova,+ kae ko Ieova ne seki tali mai eiloa ki a ia i moemiti io me i te Ulima+ io me e auala i te kau pelofeta.  Fakamuli loa, ne fai atu a Saulo ki ana tavini: “‵Sala mai aka se fafine telā e fesokotaki mo agaga,+ ke fano au o faipati ki ei.” Ne tali atu ana tavini: “Kiloke! E isi se fafine e fesokotaki mo agaga i Enetolo.”+  Tenā ne pei a Saulo ki gatu kolā e fai ei ke se iloa a ia ne tino kae olo atu mo ana tāgata e tokolua ki te fafine tenā i te po. Ana muna: “Fakamolemole, fakaaoga aka au mea fakataulaitu o fesokotaki atu ki agaga+ kae fakatu mai te tino telā e manako au ke fakatu mai ne koe.”  Kae ne fai atu te fafine ki a ia: “E ‵tau o iloa ne koe te mea ne fai ne Saulo, ne afuli kea‵tea ne ia a tino e fesokotaki mo agaga mo tino fakamatala mea ‵tupu mai te fenua.+ Kaia e taumafai ei koe o malei au ke tamate?”+ 10  Tenā ne tauto atu ei a Saulo ki a ia i te igoa o Ieova, ana muna: “E pelā eiloa mo Ieova e ola, ka se fakasala koe i te faiga o te mea tenei!” 11  Ne fai atu a te fafine: “Ko oi te tino e manako koe ke fakatu aka ne au?” Ne tali atu a ia: “Fakatu mai a Samuelu ki a au.” 12  I te laveaga ne te fafine a “Samuelu”*+ ne pakalaga tou fafine kae fai atu ki a Saulo: “Kaia ne fakatogafiti ei ne koe au? A koe ko Saulo!” 13  Ne fai atu te tupu ki te fafine: “Sa mataku, kae fai mai me se a tau mea e lavea?” Ne tali atu te fafine ki a Saulo: “Ne lavea ne au se mea pelā me se atua e fanaka mai te laukele.” 14  Ne fesili atu tou tagata: “E pefea ana foliga?” kae ne tali mai tou fafine: “Se toeaina matua kae pei ki se gatu ‵loa.”+ I konā ne iloa ei ne Saulo me ko “Samuelu,” tenā ne punou ifo ei a ia kae ifo ki te laukele. 15  Ne fai atu a “Samuelu” ki a Saulo: “Kaia ne fakalavelave mai ei koe ki a au o toe fakatu aka au?” Ne tali atu a Saulo: “Au nei ko puapuaga valevale. A tino Filisitia ko o‵mai o taua mai ki a au, kae ko te Atua ko oti ne tiakina ne ia au kae ko se tali mai foki ki a au e auala i te kau pelofeta io me i moemiti;+ kae tenā te pogai ko kalaga atu ei au ki a koe ke iloa ne au te mea e ‵tau o fai.”+ 16  Kae ne fai atu a “Samuelu”: “Kaia ne ‵sala mai ei koe ki a au i te taimi nei me ko oti koe ne tiaki ne Ieova+ kae ko fai a ia mo ou fili? 17  Ka fai eiloa ne Ieova a mea ne folafola atu ne ia e auala i a au: Ka ‵fao kea‵tea ne Ieova a te malo mai i ou lima kae tuku atu ki se tagata e tokotasi a koe, ko Tavita.+ 18  Me i a koe e seki fakalogo ki te leo o Ieova kae seki fakaoko foki ne koe tena kaitaua telā e ‵ka pelā me se afi ki tino Amaleka,+ tenā te pogai ko fai ei ne Ieova te mea tenei ki a koe i te aso nei. 19  Ka tuku atu foki ne Ieova a tino Isalaelu fakatasi mo koe ki lima o tino Filisitia,+ kae i te aso taeao a koe+ mo au tama tāgata+ ka ‵nofo fakatasi mo au. Ka tuku atu foki ne Ieova a te kautau a Isalaelu ki lima o tino Filisitia.”+ 20  I konā eiloa, ne siga ifo a Saulo kae takato i te laukele kae ko oko eiloa i te mataku i pati a “Samuelu.” Kae ko seai se malosi koi ‵toe i loto i a ia, me e seki kai eiloa a ia ki ne meakai i te aso kātoa mo te po kātoa tenā. 21  I te vauga a te fafine ki a Saulo kae lavea ne ia me ko oko loa i ana manavase, ana muna: “A tau tavini ne fakalogo eiloa ki au pati, kae ne talia ne au ke tu toku ola i se tulaga fakamataku+ ke fai te mea telā ne fai mai ei koe ki a au ke fai. 22  Nei la, fakamolemole fakalogo mai ki pati ka fai atu ne tau tavini. Ka fakatoka ne au ne falaoa i ou mua, ko kai ei koe ke maua ne koe te malosi ke mafai koe o fano i tau malaga.” 23  Ne ita tou tagata kae fai atu: “Au e se kai.” Kae ne fai atu faeloa ana tavini mo te fafine tenā ke kai a ia. Fakamuli loa, ne fakalogo a ia ki a latou, tu aka ei a ia mai te laukele kae sagasaga ki luga i te moega. 24  E isi se tamā pulumakau putaputa a te fafine i tena fale, tenā ne tamate fakavave ne ia kae puke a falaoa ‵mata ko oti ne palu, tao ei ne ia ke maua a falaoa seki faka‵fete. 25  Ne laulau atu ne ia a meakai ki a Saulo mo ana tavini, kae ne ‵kai ei latou. Mai tua ifo i konā, ne ‵tu aka latou kae olo i te po eiloa tenā.+

Fakamatalaga mai lalo

Epelu, “e pelā me se tino e tausi toku ulu i aso katoa.”
Io me “ko te mea telā e fakafoliga mai pelā me ko Samuelu.”