Te Muamua Samuelu 2:1-36
2 Tenā ne fai atu ei a Hana i tena ‵talo:
“A toku loto e fiafia ki a Ieova;+Ne tuku mai ne Ieova te malosi* ki a au.
A toku gutu ko fakamaga o ‵teke atu ki oku fili,Me e fiafia au ki au faifaiga faka‵sao tino.
2 E seai se tino e ‵malu pelā mo Ieova,E seai aka foki kae na ko koe,+Kae seai se kaupapa e pelā mo te ‵tou Atua.+
3 Ke mo a ma fai‵pati fakamatamata faeloa;Ke seai ne pati fia ‵sili e ‵to mai i otou gutu,Me i a Ieova ko te Atua o te poto,+Kae faka‵tonu aka ne ia a mea e fai ne tino.
4 A kausana a tāgata ‵mafi ko fati‵fati,Kae ko latou kolā e ‵siga e tuku atu ki ei te malosi.+
5 A tino ‵kai ma‵kona e ‵tau o ‵togi atu a latou eiloa ke maua ne meakai,Kae ko tino fia‵kai ko se toe fia‵kai.+
A te fafine sē afu ne fanau mai ne ia a tama‵liki e tokofitu,+Kae ko ia telā ne tokouke ana tama‵liki tāgata ko seai ne ana tama.*
6 A Ieova e ‵ta ne ia a tino, kae faka‵sao ne ia a ola;E tuku ifo ne ia ki te Tanuga,* kae faka‵tu aka ne ia.+
7 A Ieova e fakama‵tiva ne ia tino, kae fakamau‵mea ne ia;+E fakama‵lalo ne ia tino, kae fakama‵luga aka ne ia.+
8 E faka‵tu aka ne ia a tino ma‵lalo mai te ‵pefu;E avaka ne ia a tino ma‵tiva mai te fakaputuga o lefu,*+Ke fakasaga‵saga latou fakatasi mo pelenise,Kae tuku atu ki a latou a nofoga ‵malu.
I o Ieova a pou lagolago o te lalolagi,+Kae ne tuku atu ne ia ki luga i ei a te laukele ola ‵lei.
9 E puipui ne ia a vae o ana tino fakamaoni,+Kae ko tino amio ma‵sei ka fakaseai atu i te tanuga pouli,+Me i te tagata e se manumalo i tena malosi eiloa.+
10 Ka fakatakavale ne Ieova a latou kolā e taua atu ki a ia;*+A tena kaitaua ki a latou ka ‵pa e pelā me se fa‵tili mai te lagi.+
Ka fakamasino ne Ieova a te lalolagi kātoa,+Kae ka tuku atu ne ia te malosi ki tena tupu+Kae fakamaluga aka te sau* o tena tino fakaekegina.”+
11 Tenā ne fano ei a Elekana ki tena fale i Lama, kae ko te tamaliki tagata ne tavini atu eiloa ki a Ieova+ mai lalo i te takitakiga a Eli te faitaulaga.
12 Kae ko tama tāgata a Eli ne tāgata ma‵sei;+ e se āva lāua ki a Ieova.
13 Tenei te mea ne fai ne lāua ki vaega kolā e ‵tau o maua ne faitaulaga mai i tino:+ I so se taimi e ofo atu ei ne se tagata se taulaga, e vau a te tavini a te faitaulaga mo se foka matatolu i tena lima i te taimi ko ‵tunu ei a ‵kano o te manu,
14 ko ‵suki ei ne ia ki loto i te pesini, te ulo e lua ana kau, te ulo lasi, io me ko te ulo e tasi tena kau. So se mea e ‵piki i te foka e puke ne te faitaulaga ma ia. Tenā te mea e fai ne lāua i Sailo ki tino Isalaelu katoa kolā e olo atu ki konā.
15 Kae koi tuai foki o ‵sunu te gako+ ne te tino i a ia te taulaga, e vau te tavini a te faitaulaga kae fai atu ki ei: “Tuku mai a ‵kano manu a te faitaulaga ke tao. E se manako a ia ki ‵kano manu ne saka mai i a koe, e manako fua ki ‵kano manu ‵mata.”
16 Kae kafai e fai atu a te tagata ki a ia: “Faka‵tali mua ke oti ne ‵sunu a te gako+ ko puke ei ne koe a te mea telā e manako koe ki ei,” kae e fai atu a ia: “Ikai, tuku mai eiloa i te taimi nei; kafai e se tuku mai ne koe, ka ‵fao mālō ne au!”
17 Tela la, ne gasolo eiloa o lasi a te agasala a tavini konā i mua o Ieova,+ me ne seki āva a tāgata konā ki taulaga kolā e ofo atu ki a Ieova.
18 Kae ko Samuelu ne tavini+ atu eiloa i mua o Ieova, kae pei ki se efota lino,+ kae ko ia koi tamaliki eiloa.
19 Ne faite foki ne tena mātua se gatu foliki e seai ne lima mō ia, kae ne avatu ne tou fafine ki a ia i tausaga takitasi e olo atu ei lāua mo tena avaga o ofo a te taulaga o te tausaga.+
20 Kae ne fakamanuia ne Eli a Elekana mo tena avaga kae fai atu: “Ke tuku atu ne Ieova se tamaliki ma koe i tau avaga tenei ke sui ei a te tamaliki telā ko oti ne tuku atu ki a Ieova.”+ Kae ne ‵foki ei lāua ki te fale.
21 Ne saga atu a Ieova ki a Hana, tenā ne mafai ei o faitama a ia;+ kae ne fanau ne ia a tama‵liki tāgata e tokotolu mo tama‵liki fāfine e tokolua. Kae ne tupu aka eiloa a te tamaliki tagata ko Samuelu i mua o Ieova.+
22 A Eli i te taimi nei ko toeaina ‵ki eiloa, kae ne logo a ia i mea katoa kolā ne fai ne ana tama tāgata+ ki tino Isalaelu katoa mo te auala ne ‵moe sāle ei lāua mo fāfine kolā e tavini atu i te mataloa o te faleie o maopoopoga.+
23 Ne fai sāle atu a ia ki a lāua: “Kaia e fai faeloa i ei ne koulua a mea konei? Ko oko loa i te ma‵sei a tala e lagona ne au mai i tino e uiga ki a koulua.
24 Ikai e aku tama, a tala konei e lagona ne au e fai ne tino o Ieova e se ‵lei.
25 Kafai se tagata e agasala ki te suā tagata, e mafai ne se tino o fakatagi atu ki a Ieova mō ia; kae kafai e agasala se tagata ki a Ieova,+ ko oi e mafai o ‵talo atu mō ia?” Kae ne seki fia faka‵logo lāua ki te lā tamana, me ko oti ne fakaiku aka ne Ieova ke tamate lāua.+
26 I te taimi tenā, ne gasolo aka eiloa o tupu malosi a te tamaliki tagata ko Samuelu kae ne alofagina a ia ne Ieova e pelā foki mo tino.+
27 Ne vau se tagata o te Atua ki a Eli kae fai atu ki ei: “Konei a pati a Ieova ne fai mai: ‘E a, e seki fakaasi faka‵lei atu ne au a au eiloa ki tupuga o tou tamana i te taimi koi ‵nofo ei latou i Aikupito e pelā me ne pologa i te fale o te Falao?+
28 Kae ne filifili aka a tou tupuga mai matakāiga katoa o Isalaelu+ ke tavini mai e pelā me ko taku faitaulaga kae ke fanaka ki taku fatafaitaulaga+ o ofo mai a taulaga, o ofo mai a mea ma‵nogi,* kae ke pei ki se efota i oku mua; kae ne tuku atu ne au ki te kāiga o tou tupuga a taulaga katoa kolā e ofo atu i luga i se afi a tino Isalaelu.+
29 Kaia e se āva ei koutou ki taku taulaga mo mea kolā e ofo mai ki a au kolā ne fakatonu atu ne au i te koga e nofo au i ei?+ Kaia e faka‵malu faeloa ei ne koe au tama tāgata i lō au mai te fakaputa‵puta o koutou ki toe mea ‵lei mai taulaga katoa a oku tino Isalaelu?+
30 “‘Tenā te pogai ne fai mai ei a Ieova te Atua o Isalaelu: “Au ko oti ne fai atu me i tou kāiga mo te kāiga o tou tupuga ka sa‵sale faeloa i oku mua.”+ Kae nei la, ko folafola mai a Ieova: “E se taitai eiloa o fai ne au se mea penā, me i tino kolā e faka‵malu ne latou au ka faka‵malu au ki ei,+ kae ko latou kolā e se āva mai ki a au ka fakamasiasigina.”
31 Kiloke! E oko mai a aso ka ‵kati kea‵tea ei ne au tou malosi* mo te malosi o te kāiga o tou tupuga, ko te mea ke seai se tagata i tou kāiga e ola ki te taimi ko toeaina ei.+
32 Kae ka lavea ne koe se fili i toku koga nofo faitalia a mea ‵lei katoa ne fai i Isalaelu,+ kae ka se toe ai eiloa se toeaina matua i tou kāiga.
33 A te tagata o tou kāiga telā ka se ‵kati ne au kea‵tea mai te taviniga i taku fatafaitaulaga ka fai ne ia ou mata ke ‵kivi kae ka aumai ne ia ki a koe te fanoanoa lasi, kae ko te tokoukega o tino i tou kāiga ka tamate ne tino ki te pelu.+
34 Kae ko mea kolā ka ‵tupu ki au tama tāgata e tokolua, ko Hofeni mo Fineaso, ka fai pelā me se fakailoga ki a koe: Ka ‵mate eiloa lāua i te aso e tasi.+
35 Tenā ka fakatu aka ei ne au se faitaulaga fakamaoni+ mō oku. Ka fai eiloa ne ia a mea e loto au ki ei; kae ka faite ne au se fale mō ia ke tumau, kae ka sasale faeloa a ia i mua o taku tino fakaekegina.
36 So se tino e ‵toe i tou kāiga ka vau o ifo ki lalo i a ia ke maua ne tupe mo se falaoa, kae ka fai atu a ia: “Fakamolemole ‵tofi aka au ke galue e pelā me se faitaulaga ke mafai ne au o kai ki ne mu falaoa.”’”+
Fakamatalaga mai lalo
^ Epelu, “ko magemage.”
^ Io me kāti, “koga ‵pei kaiga.”
^ Io me kāti, “A latou kolā e ‵teke atu ki a Ieova ka ma‵taku.”
^ Io me kāti, “ke fai ke fanaka te au mai se taulaga.”
^ Epelu, “lima.”
