Te Muamua Nofoaiga Tupu 29:1-30

  • Meaalofa mō te faletapu (1-9)

  • Te ‵talo a Tavita (10-19)

  • Ko fia‵fia a tino; te pulega fakatupu a Solomona (20-25)

  • Te mate o Tavita (26-30)

29  Ne fai atu a te Tupu ko Tavita ki te fakapotopotoga kātoa: “A taku tama ko Solomona, telā ne filifili ne te Atua,+ koi foliki kae e se lasi tena mea e iloa,+ kae ko te galuega e lasi ‵ki, me e sē se faletapu* mō tāgata kae mō Ieova te Atua.+  Kae ne fakaoti eiloa oku mafi o fakatoka a mea mō te fale o toku Atua, o fakatoka a aulo mo fai a mea ki aulo, a siliva mo fai a mea ki siliva, a kopa mo fai a mea ki kopa, a fiti mo fai a mea ki fiti,+ a laupapa+ mo fai a mea ki laupapa, fatu onika, mo fatu ke faka‵piki ki mouta, ko fatu fo‵liki mō fakagaligali, mo fatu tāua valevale, mo fatu alapasa e uke ‵ki.  E se gata i ei, ona ko toku fiafia ki te fale o toku Atua,+ e isi foki soku potu ‵teu koloa totino+ e tuku i ei a aulo mo siliva kae ka avatu ne au ki te fale o toku Atua, ke fakaopoopo atu ki mea katoa kolā ne fakatoka ne au mō te fale tapu,  e aofia i ei a taleni* aulo e 3,000 mai Ofeila+ kae 7,000 taleni o siliva ‵ma mo pēni a ‵pui o potu kese‵kese,*  ko aulo mo fai a mea ki aulo mo siliva mo fai a mea ki siliva, mo galuega katoa kolā e ‵tau o fai ne tufuga faite mea. Nei la, ko oi te tino e volenitia ke vau ki mua i te aso nei mo tena meaalofa i tena lima ma Ieova?”+  Tenā ne volenitia ei a pelenise o kāiga i olotou tamana, ko pelenise o matakāiga o Isalaelu, ko takitaki o taki tokoafe mo taki tokoselau,+ mo takitaki o nisi galuega a te tupu.+  Kae ne tuku atu ne latou ki te taviniga i te fale o te Atua tonu: e 5,000 taleni aulo, 10,000 taleki,* 10,000 taleni siliva, 18,000 taleni kopa, kae 100,000 taleni fiti.  So se tino e isi ne ana fatu tāua, e tuku atu ne ia ki te fale ‵teu koloa i te fale o Ieova, mai lalo i te takitakiga a Ieielu+ te tino Kelesona.+  Ne fia‵fia a tino o fai olotou taulaga mo te lotomalie, me ne fai ne latou olotou taulaga o te lotomalie ki a Ieova mo te loto kātoa,+ kae ne fiafia malosi foki a Tavita te tupu. 10  Tenā ne ‵viki atu ei a Tavita ki a Ieova i mua o te fakapotopotoga kātoa. Muna a Tavita: “Ke vikia koe e Ieova te Atua o Isalaelu te motou tamana, ke oko eiloa ki te se-gata-mai.* 11  I o koe e Ieova te tulaga sili+ mo te malosi+ mo te taulekaleka mo te gali mo te tulaga ‵malu,+ me i a koe a mea katoa i te lagi mo te lalolagi.+ I o koe a te malo, e Ieova.+ Ko koe te Atua telā e fakamaluga ne koe a koe eiloa ke fai mo ulu o mea katoa. 12  A koloa mo te ‵malu e maua mai i a koe,+ kae e pule koe i mea katoa,+ kae e maua eiloa te ‵mana+ mo te malosi+ i ou lima, kae e mafai ne tou lima o fai a mea fakaofoofogia+ kae avatu te malosi ki tino katoa.+ 13  Kae nei la, e te motou Atua, e fakafetai kae ‵viki atu matou ki tou igoa gali. 14  “Kae ko oi au, kae ko oi foki oku tino ke mafai ne matou o fai a taulaga o te lotomalie penei? Me i mea katoa ne maua mai i a koe, kae ko tuku atu ne matou ki a koe a mea e maua mai i ou lima. 15  Me i a matou ne tino fakaa‵tea i ou mua kolā ne o‵mai o ‵nofo i konei, e pelā eiloa mo omotou tupuga+ katoa. Me i omotou aso i te lalolagi e pelā fua me se ata+​—e seai se fakamoemoega.  16  Ieova te motou Atua, a koloa katoa konei ne fakatoka ne matou mo faite se fale mō koe mo tou igoa tapu ne maua mai i ou lima, kae i a koe katoa a mea konā. 17  E iloa ‵lei ne au e toku Atua, me e sukesuke ne koe a loto+ kae e fiafia koe ki te fakamaoni.*+ Ne ofo atu ne au a mea katoa konei mo toku loto fakamaoni, kae e fiafia malosi au ke lavea atu ou tino konei e ofo atu olotou taulaga mo te lotomalie ki a koe. 18  Ieova te Atua o Apelaamo, Isaako mo Isalaelu, ko omotou tupuga, ke fakatumau ne koe a manakoga mo mafaufauga konei i loto o ou tino ki te se-gata-mai, kae takitaki atu olotou loto ki a koe.+ 19  Kae tuku atu ki taku tama ko Solomona se loto katoatoa,+ ko te mea ke fakalogo a ia ki au fakatonuga,+ au fakamasauaga, mo au tulafono kae fai a mea katoa konei kae faite te faletapu* telā ko oti ne fai ne au a fakatokaga ki ei.”+ 20  Tenā ne fai atu ei a Tavita ki te fakapotopotoga kātoa: “Ke ‵viki atu nei ki a Ieova te otou Atua.” Kae ne ‵viki atu eiloa a te fakapotopotoga kātoa ki a Ieova te Atua o olotou tupuga kae pu‵nou ki lalo o ifo ki a Ieova fakatasi mo te tupu. 21  Kae ne tumau eiloa latou i te ofo atu o taulaga ki a Ieova kae ofo atu a taulaga ‵sunu+ ki a Ieova i te aso mai tua ifo, e 1,000 tamā pulumakau, e 1,000 mamoe, e 1,000 tamā mamoe tāgata, mo olotou taulaga meainu;+ ne ofo atu ne latou a taulaga e uke mō tino Isalaelu katoa.+ 22  Ne tumau latou i te ‵kai kae inu i mua o Ieova i te aso tenā kae fia‵fia,+ kae ne toe fai ne latou i te lua o taimi a Solomona te tama tagata a Tavita mo fai te tupu kae fakaeke a ia i mua o Ieova ke fai mo takitaki,+ kae ko Satoka ke fai foki e pelā me se faitaulaga.+ 23  Kae ne sagasaga a Solomona i te nofogaaliki+ o Ieova e pelā me ko te tupu e sui ei a Tavita tena tamana, kae ne manuia a ia, kae ko tino Isalaelu katoa ne faka‵logo ki a ia. 24  A pelenise+ mo toa ‵mafi katoa,+ e pelā foki mo tama tāgata katoa a te Tupu ko Tavita+ ne faka‵logo ki a Solomona te tupu. 25  Kae ne fai ne Ieova a Solomona ke tafasili i te maluga i mua o tino Isalaelu katoa kae tuku atu ki luga i a ia a te ‵malu fakatupu telā e seki maua aka eiloa ne se tupu o Isalaelu i aso mai mua atu i ei.+ 26  Kae ko Tavita te tama tagata a Iese ne pule atu ki Isalaelu kātoa, 27  kae ko te leva* o tena pulega i Isalaelu e 40 tausaga. Ne pule a ia i Hepelona i tausaga e 7,+ kae ne pule a ia i Ielusalema i tausaga e 33.+ 28  Ne mate a ia i te taimi ko toeaina ei,+ kae ne lotomalie ki tena olaga loa, ana koloa mo tena ‵malu; kae ko tena tama tagata ko Solomona ne fai mo tupu e sui ei a ia.+ 29  Kae ko te tala fakasolopito o te Tupu ko Tavita, mai te kamataga ki te fakaotiga, e tusi katoa i tusi a Samuelu te tagata e lavea ne ia a fakaasiga, Natano+ te pelofeta mo Kato+ te tino fakamatala fakaasiga, 30  fakatasi mo tena pulega fakatupu kātoa, tena malosi, mo mea ne ‵tupu i ana taimi mo Isalaelu mo malo katoa i ana tafa.

Fakamatalaga mai lalo

Io me “fale malosi; palesi.”
A te taleni e ‵pau mo te 34.2 kk. Onoono ki te MF E14.
Epelu, “‵pui o fale.”
A te taleki se tupe aulo mai Pelesia. Onoono ki te MF E14.
Io me “mai te se-gata-mai ki te se-gata-mai.”
Io me “amio ‵lei; amiotonu.”
Io me “fale malosi; palesi.”
Epelu, “aso.”