Te Tusi Muamua ki te Kau Kolinito 9:1-27

  • Te fakaakoakoga a Paulo e pelā me se apositolo (1-27)

    • “E se ‵tau mo koe o ‵sai te gutu o se pulumakau tagata” (9)

    • ‘Kalofa eiloa i a au māfai e se talai ne au te tala ‵lei!’ (16)

    • Fai mea katoa kolā e fai ne tino katoa (19-23)

    • Te loto pulea i te fakatau‵telega ki te ola (24-27)

9  E a, au e se saoloto? E a, au e sē se apositolo? E a, e seki lavea ne au a Iesu te ‵tou Aliki?+ E a, a koutou e se ko fua o aku galuega kolā ne fai i te Aliki?  Kafai foki au e sē se apositolo ki nisi tino, kae ko au se apositolo eiloa ki a koutou! Me i a koutou ko te fakailoga mautinoa e fakamaoni ei taku galuega fakaapositolo mō te Aliki.  Konei aku pati e ‵pulu ei au ki a latou kolā e fakamasino ne latou au:  E a, e se saoloto tatou ke ‵kai kae inu?  E a, e se saoloto tatou ke olo fakatasi mo se avaga fafine talitonu,*+ e pelā eiloa mo nisi apositolo mo taina o te Aliki,+ e pelā foki mo Kefa?*+  Io me ko māua fua mo Panapa+ e se saoloto ke fakagata te ga‵lue i galuega ‵togi?  Ko oi te sotia e galue kae e ‵togi ne ia a ia eiloa? Ko oi e ‵toki ne ia se togavine kae e se kai ki fuataga mai i ei?+ Io me ko oi te tausi mamoe e se inu ki susu mai te lafu mamoe?  E a, e fai atu ne au a mea konei mai te kilokiloga a tāgata? E a, e se fai mai foki a mea konei i te Tulafono?  Me e tusi mai penei i te Tulafono a Mose: “E se ‵tau mo koe o ‵sai te gutu o se pulumakau tagata i te taimi e lakalaka ei ne ia saito.”+ E mata, ko pulumakau e manavase ki ei te Atua? 10  Io me ne fai mai eiloa ana pati mō te ‵lei o tatou? Ne tusi eiloa a mea konei mō te ‵lei o tatou, me i te tino fakamalū laukele mo te tino telā e ‵kini ne ia a saito, e fai ne lāua a mea konā mo te fakamoemoega ke maua ne lā tusaga mai i ei. 11  Kafai ko oti ne ‵toki ne matou a mea faka-te-agaga i loto i a koutou, e a, e masei māfai e tau foki ne matou a mea faka-te-foitino mai i a koutou?+ 12  Kafai e isi se saolotoga e maua ne nisi tino i luga i a koutou, e a, e se sili fakafia atu la matou? E tiga te feitu tenā, e seki fakaaoga aka eiloa ne matou te saolotoga tenei,+ me e kufaki ne matou a mea katoa, ko te mea ke se fakalavelave ne matou a te tala ‵lei e uiga ki te Keliso i so se auala.+ 13  E a, e se iloa ne koutou me e kai ne tāgata kolā e fai te taviniga tapu a meakai i loto i te faletapu, kae ko latou kolā e tavini faeloa i te fatafaitaulaga e maua olotou tusaga mai te fatafaitaulaga?+ 14  I te auala foki tenei ne fakatonu mai ei te Aliki ki a latou kolā e folafola atu te tala ‵lei, ke ola e ‵tusa mo te tala ‵lei.+ 15  Kae ne seki fakaaoga aka eiloa ne au se fakatokaga e tasi i mea konei.+ E se tusi atu ne au a mea konei ko te mea ke fai ne koutou a mea konei ki a au, me e ‵lei atu ki a au ke mate​—ka seai ei se tino ke tapale ne ia mai i a au a te pogai e fakamatamata ei au!+ 16  Me kafai e folafola atu ne au te tala ‵lei, e seai se pogai ke fakamatamata ei au, me se mea eiloa e ‵tau o fai ne au. Kae kalofa eiloa au māfai e se folafola atu ne au a te tala ‵lei!+ 17  Kafai e fai ne au a te mea tenei i toku lotomalie, e isi soku taui; kae kafai e fai fitoi ne au, koi maua eiloa ne au te galuega fakasituati telā ne tuku mai ki a au.+ 18  Se a la toku taui? Me kafai e folafola atu ne au te tala ‵lei e tuku atu ne au te mea tenā e aunoa mo se ‵togi, ko te mea ke se fakaaoga ‵se ne au toku saolotoga ke talai atu te tala ‵lei. 19  Me e tiga eiloa e saoloto au mai i tino katoa, ko oti ne fai ne au a au eiloa mo pologa ki tino katoa, ko te mea ke maua ne au a tino e tokouke. 20  Ki tino Iutaia e fai au e pelā me se tino Iutaia ko te mea ke maua ne au a tino Iutaia;+ ki tino kolā e ‵nofo mai lalo i te tulafono, e fai au e pelā me se tino e nofo mai lalo i te tulafono, e tiga eiloa e se nofo au mai lalo i te tulafono, ko te mea ke maua ne au a latou kolā e ‵nofo mai lalo i te tulafono.+ 21  Ki tino kolā e se ‵nofo mai lalo i te tulafono, e fai au e pelā me se tino e se nofo mai lalo i te tulafono, faitalia me e nofo au mai lalo i te tulafono a te Atua kae e nofo foki au mai lalo i te tulafono a Keliso,+ ko te mea ke maua ne au a latou kolā e se ‵nofo mai lalo i te tulafono. 22  E fai au e pelā me se tino vāivāi ki tino vāi‵vai, ko te mea ke maua ne au a tino vāi‵vai.+ E fai eiloa ne au a mea katoa kolā e fai ne vaegā tino kese‵kese katoa, ko te mea ke mafai o faka‵sao ne au a nisi o latou i so se auala. 23  Kae e fai ne au a mea katoa mō te tala ‵lei, ko te mea ke mafai o talai atu ne au te mea tenā ki nisi tino.+ 24  E a, e se iloa ne koutou me i tino e ‵tele i se fakatau‵telega e ‵tele katoa, kae e tokotasi fua e maua ne ia te failoga? ‵Tele la i se auala telā ka maua ei ne koutou te failoga.+ 25  A tino katoa kolā e fakatau‵fai i se fakatau‵telega, e fakagalue ne latou te loto pulea i mea katoa. E tonu, e fai ne latou te mea tenei ke maua ei se foualiki telā e pala,+ kae ko tatou ko te foualiki telā e se mafai o pala.+ 26  Tela la, a te auala e tele ei au e se tele valevale fua au i ei;+ e penā foki māfai ko fusu au, e se fusu atu fua au ki te matagi; 27  kae e ‵kini ne au toku foitino+ kae takitaki atu e pelā me se pologa, ko te mea kafai ko oti ne talai atu au ki nisi tino, ke se taku fakamaseigina au i mua o te Atua.

Fakamatalaga mai lalo

Io me “se tuagane telā se avaga fafine.”
E fakaigoa foki ki a Petelu.