Te Tusi Muamua ki te Kau Kolinito 1:1-31

  • Alofaaga (1-3)

  • Fakafetai atu Paulo ki te Atua mō te kau Kolinito (4-9)

  • Fakamalosiga ke ‵kau fakatasi (10-17)

  • Keliso, te ‵mana mo te poto o te Atua (18-25)

  • Ke faipati fakamatamata fua e uiga ki a Ieova (26-31)

1  Ko au ko Paulo, telā ne kalagagina mo fai te apositolo+ a Keliso Iesu e auala i te loto o te Atua, mo Sosene te ‵tou taina  ki te fakapotopotoga a te Atua i Kolinito,+ ki a koutou kolā ko oti ne fakatapu ke ‵kau fakatasi mo Keliso Iesu,+ ke fai mo tino tapu fakatasi mo tino i koga katoa kolā e ka‵laga ki te igoa o te ‵tou Aliki ko Iesu Keliso,+ ko te lotou Aliki mo te ‵tou Aliki.  Ke i luga i a koutou te alofa tauanoa mo te filemu mai te Atua te ‵tou Tamana mo te Aliki ko Iesu Keliso.  E fakafetai atu faeloa au ki toku Atua mō koutou ona ko te alofa tauanoa o te Atua telā ne tuku atu ki a koutou i a Keliso Iesu;  me ko mau‵mea koutou i mea katoa ona ko ia, kae e mafai o fai‵pati atu koutou mo te iloa telā e katoatoa,+  e pelā mo te molimau e uiga ki te Keliso+ telā ko oti ne faka‵mautakitaki i a koutou,  ko te mea ke se ma‵tiva koutou i meaalofa katoa, kae koi fakatali‵tali koutou mo te loto naunau ki te fakaasimaiga o te ‵tou Aliki ko Iesu Keliso.+  Ka faka‵mautakitaki foki ne ia koutou ke oko ki te gataga ko te mea ke seai se mea e ‵losi atu ki a koutou i te aso o te ‵tou Aliki ko Iesu Keliso.+  E fakamaoni te Atua+ telā ne kalaga ne ia koutou ke ‵kau fakatasi mo tena Tama ko Iesu Keliso te ‵tou Aliki. 10  Nei la, ko fakamalosi atu au ki a koutou, e taina, e auala i te igoa o te ‵tou Aliki ko Iesu Keliso, me e ‵tau o fealofani koutou i otou pati e fai kae e se ‵tau o isi ne mavae‵vaega i a koutou,+ kae ke tasi koutou i otou mafaufau mo otou manatu.+ 11  Me e isi ne tino mai te kaufale o Keloe ne fakailoa mai ki a au e uiga ki a koutou, e oku taina, i a koutou e ‵nofo mavae‵vae. 12  Tenei te mea e fakauiga au ki ei, me e fai mai a koutou taki tokotasi: “Au e kau ki a Paulo,” “Kae ko au ki a Apolo,”+ “Kae ko au ki a Kefa,”* “Kae ko au ki a Keliso.” 13  E a, ko mavaevae a te Keliso? E mata, ne tamate a Paulo i luga i te pou mō koutou? Io me e mata, ne papatiso koutou i te igoa o Paulo? 14  E fakafetai au ki te Atua me ne seki papatiso ne au se tino i a koutou kae na ko Kilipo+ fua mo Kaio,+ 15  ko te mea ke seai se tino i a koutou e fai mai i a ia ne papatiso i toku igoa. 16  Ao, ne papatiso foki ne au a tino i te kaufale o Setefana.+ E pelā mo te ‵toega o koutou, e se iloa tonu ne au me e isi aka foki se tino ne papatiso ne au. 17  Me ne seki uga au ne Keliso ke fano o papatiso, kae ke fano o folafola atu te tala ‵lei;+ e se i te poto i te faipati,* ko te mea ke se fakaseaoga i ei a te pou fakasaua* o Keliso. 18  Me i te talaiga e uiga ki te pou fakasaua* se mea valea ki a latou kolā ka fakaseai,+ kae ki a tatou kolā ko ‵sao ko te ‵mana tenā o te Atua.+ 19  Me konei a pati i te tusi: “Ka fakaseai ne au a te poto o tāgata ‵poto, kae ko te atamai o tino atamai ka ‵teke ne au.”*+ 20  Tefea te tagata poto? Tefea te failautusi?* Tefea te tino kinau e uiga ki mea masani o te olaga tenei? E a, e seki fai ne te Atua a te poto o te lalolagi e pelā me se mea valea? 21  Ona ko te poto o te Atua, ne seki mafai o iloa ne te lalolagi a te Atua+ e auala i olotou poto,+ kae ko te Atua ne fiafia i te mea valea+ telā ne talai atu ke faka‵sao i ei a tino tali‵tonu. 22  Me ne fakamolemole mai a tino Iutaia ki ne fakailoga+ kae ko tino Eleni ne ‵sala ki te poto; 23  kae e talai atu ne tatou i a Keliso ne tamate i luga i te pou, se mea telā e ‵teke ki ei a tino Iutaia kae se mea valea fua ki tino o fenua fakaa‵tea.+ 24  E tiga te feitu tenā, e fakaasi mai te ‵mana mo te poto o te Atua e auala i a Keliso+ ki a latou kolā ne kalagagina, ko tino Iutaia mo tino Eleni. 25  Me i te mea valea a te Atua e poto atu i tāgata, kae ko te mea vāivāi a te Atua e malosi atu i tāgata.+ 26  E lavea ne koutou, e oku taina, me e se tokouke a tino mai i a koutou kolā ne kalagagina e ‵poto i mea faka-te-lalolagi,+ e se tokouke mai i ei ne tino pule, e se tokouke foki ne o‵mai mai i kaigā aliki,+ 27  kae ne filifili ne te Atua a mea va‵lea o te lalolagi ke fakamasiasi i ei a tino ‵poto; kae ne filifili ne te Atua a mea vāi‵vai o te lalolagi ke fakamasiasi i ei a mea ma‵losi;+ 28  kae ne filifili ne te Atua a mea sē tāua o te lalolagi mo mea kolā e ‵kilo fatauva ki ei, ko mea e se tāua ki tāgata ke fakaseai ne ia a mea kolā e tāua ki a latou,+ 29  ko te mea ke seai se tino e mafai o faipati fakamatamata i mua o te Atua. 30  Kae ona ko ia ko ‵kau fakatasi ei koutou mo Keliso Iesu, telā ko oti ne fai mo fai te poto mai te Atua ki a tatou, e pelā foki mo te amiotonu+ mo te fakatapuga+ mo te fakasaolotoga e auala i te togiola,+ 31  ko te mea ke fai eiloa e pelā mo muna i te tusi: “A te tino telā e faipati fakamatamata, ke faipati fakamatamata a ia e uiga ki a Ieova.”+

Fakamatalaga mai lalo

E fakaigoa foki ki a Petelu.
Io me “pati fia poto.”
Onoono ki te FP.
Onoono ki te FP.
Io me “fakatafa kea‵tea.”
Telā se tino poto i te Tulafono.