Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Tusi Tapu i te Itaneti | NEW WORLD TRANSLATION (Ne `Lomi i te 1984)

Mataio 9:1-38

9  Ne sopo a Iesu ki te poti kae fanatu ei ki tena fa‵kai i te suā feitu.  I konā loa, ne avatu ne latou ki a ia i luga i se moega se tagata e ‵mate tena foitino. I te laveaga ne ia te lotou fakatuanaki, fai atu ei a Iesu ki te tagata masaki: “Taku Tama, ke malosi tou loto! Au agasala ko magalo.”  Kae ne fai aka a nisi failautusi ki a latou eiloa: “Ko muna masei tou tagata ki te Atua.”  Ne iloa ne Iesu olotou mafaufauga, fai atu ei a ia: “Kaia e mafau‵fau ei koutou ki mea ma‵sei i otou loto?  Se a te mea e faigofie atu, ko te fai atu, ‘Au agasala ko magalo,’ io me, ‘Tu ki luga o sasale’?  Kae ko te mea ke iloa ne koutou me e isi se malosi o te Tama a te tagata o fakamagalo a agasala i te lalolagi—” fai atu ei a ia ki te tino e ‵mate tena foitino: “Tu ki luga, puke tou moega, kae fano ki tou fale.”  Ne tu tou tagata ki luga, fano ei ki tena fale.  I te laveaga ne te vaitino a te mea tenei, ma‵taku ei latou, kae ‵viki atu latou ki te Atua telā ne avatu ne ia te malosi tenā ki tino.  I tena fanatuga mai konā, lavea ei ne Iesu se tagata e igoa ki a Mataio e sagasaga i te ofisa ao lafoga, kae fai atu ki a ia: “Tautali mai i a au.” Ne tu aka ei tou tagata kae tautali atu i a ia. 10  Fakamuli ifo, i te taimi ne sagasaga ei a Iesu i te taipola i te fale o kai, ne olo atu ki a ia a tino ao lafoga mo tino agasala e tokouke kae ne ‵kai fakatasi latou mo Iesu mo ana soko. 11  Kae i te laveaga ne Falesaio a te mea tenei, fai atu ei latou ki ana soko: “Kaia e ‵kai fakatasi ei te otou faiakoga mo tino ao lafoga mo tino agasala?” 12  I te lagonaga ne ia olotou pati, fai atu ei tou tagata: “A tino kolā e malosi ‵lei e se ma‵nako ki se tokita, kae na ko tino ma‵saki fua. 13  Olo kae fai ke iloa ne koutou te uiga o te mea tenei: ‘E tāua atu ki a au te loto fakamagalo, kae e se ko taulaga.’ Me i a au ne vau o kalaga ki tino agasala, kae e se ki tino amio‵tonu.” 14  Ne olo atu a soko o Ioane ki a ia kae fesili atu, penei: “Kaia e fakaliki‵liki sāle ei matou mo Falesaio kae e se ko ou soko?” 15  Ne fai atu a Iesu ki a latou: “E mata, e isi se pogai ke fanoa‵noa ei a taugasoa o te tamataene telā ka fakaipoipo i te taimi koi ‵nofo fakatasi ei latou? Kae ka oko mai te aso e ave ei keatea te tamataene ka fakaipoipo mai i a latou, ko fakaliki‵liki ei latou. 16  E seai se tino e ‵sui ne ia se potu laugatu fou ki se gatu mago, me e se ‵pau lā malosi kae ka ‵sae ne te laugatu fou a te gatu mago kae ka lasi atu tena masaega. 17  E se mafai foki o utu ne tino te uaina fou ki loto i taga uaina mua. Kafai e fai penā ka ma‵pa ei a taga konā, maligi te uaina ki tua, kae ma‵sei a taga konā. Kae e utu ne tino a te uaina ‵fou ki loto i taga uaina fou kae ka se mafai ei o ma‵sei a mea e lua konā.” 18  A koi faipati atu a ia ki a latou e uiga ki mea konei, kae ne fanatu se tino pule e tokotasi o ifo atu ki a ia, ana muna: “I te taimi tenei kāti ko oti ne mate taku tamaliki fafine, kae vau o tuku aka ou lima ki luga i a ia, ko toe ola ei a ia.” 19  Ne tu aka ei a Iesu ki luga o tautali atu i a ia, kae ne tau‵tali atu foki ana soko. 20  Kae ne fanatu i ana tua se fafine telā ne ‵tafe tena sua i tausaga e sefululua kae fakapatele atu ki te kapa o tena gatu, 21  me ne fai ifo faeloa tou fafine ki a ia, penei: “Ke patele fua au ki tena gatu, ko ‵lei ei au.” 22  Ne mafuli atu Iesu kae ne lavea ne ia te fafine, kae fai atu: “Taku Tama, ke malosi tou loto! Ko ‵lei tou masaki ona ko tou fakatuanaki.” Kae ne ‵lei ei te masaki o te fafine i te taimi eiloa tenā. 23  I tena okoatuga ki te fale o te pule ne lavea ei ne ia a tino faka‵tagi pu mo te logoa o leo o te vaitino fanoa‵noa, 24  fai atu ei a Iesu: “Olo ki tua me i te tamaliki tenei e seki mate kae e moe fua.” Ona ko ana pati konei, ne ‵kata fakatauemu atu ei a latou ki a ia. 25  I te ologa o te vaitino ki tua, ulu atu ei a ia ki loto, puke ki tena lima, tu aka ei te tamaliki ki luga. 26  Ne salalau atu eiloa te tala e uiga ki te mea tenei i te koga kātoa tenā. 27  I te fanatuga a Iesu mai konā, ne tau‵tali atu i a ia a tāgata ‵kivi e tokolua, kae paka‵laga atu, penei: “Te Tama a Tavita, a koe ke alofa mai ki a māua.” 28  I tena uluatuga ki loto i te fale, olo atu ei te tokolua tāgata konei ki a ia, kae ne fesili atu a Iesu ki a lāua: “E mata, e tali‵tonu koulua me e mafai ne au o fai te mea tenei?” Ne tali atu lāua, “Ao, e te Aliki.” 29  Fakapatele atu ei a ia ki lā mata, kae fai atu: “Ke fai eiloa penā, e ‵tusa mo te mea e tali‵tonu koulua ki ei.” 30  Kae ne ‵pula ei a lā mata. E se gata i ei, ne fakatonu atu a Iesu ki a lāua, ana muna: “Ke mo a eiloa e taku atu a te mea tenei ki se tino.” 31  Kae i te lā ologa ki tua, ne fakasalalau atu ne lāua a te tala tenā e uiga ki a ia i te koga kātoa tenā. 32  I te lā ologa keatea, ne avatu ei ne tino ki a ia se tagata gūgū kae pukea ne se temoni. 33  I te otiga ne afuli keatea te temoni, faipati ei te tagata tenā. Ne ofo masei te vaitino kae fai atu: “E seki ai eiloa se mea penei kai lavea atu i Isalaelu.” 34  Kae ne fai atu a Falesaio penei: “E afuli ne ia a temoni mai te malosi o te pule o temoni.” 35  Ne faimalaga atu a Iesu i fa‵kai ‵lasi mo fa‵kai fo‵liki katoa, o akoako i loto i olotou sunako kae talai atu te tala ‵lei o te Malo kae faka‵lei ne ia a vaegā masaki katoa. 36  I te laveaga ne ia o te vaitino, lagona ei ne ia tena alofa ki a latou me ko pa‵ka kae tuku tiaki latou e pelā me ne mamoe kolā e seai se lotou tino tausi. 37  Ne fai atu ei tou tagata ki ana soko: “E tonu, e uke a fuataga e ‵tau o tau, kae e mu‵tana a te kau faigaluega. 38  Tela la, fakamolemole atu ki te Matai o te galuega ke uga mai ne tino ga‵lue e tokouke ki te katiga o saito.”

Fakamatalaga mai lalo