Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Tusi Tapu i te Itaneti | NEW WORLD TRANSLATION (Ne `Lomi i te 1984)

Mataio 8:1-34

8  I tena fanaifoga ki lalo mai i te mauga ne tau‵tali atu i a Iesu te vaitino e tokouke.  Ne fanatu ki a ia se tagata lepela, totuli ifo i ana mua, kae fai atu: “Te Aliki, kafai e manako koe ki ei, e mafai o fai ne koe au ke ‵ma.”  Ne ‵kapa atu ei tena lima, fakapatele atu ki a ia, kae fai atu: “Au e manako ke ‵ma koe.” I konā foki eiloa ne ‵lei ei tena lepela.  Ne fai atu a Iesu ki a ia: “Ke mo a e fakailoa atu ne koe a te mea tenei ki se tino, kae fano o fakaasi atu a koe ki te faitaulaga kae ofo atu te meaalofa telā ne fakatonu mai ne Mose, ke fai mo fai se molimau ki a latou.”  I tena okoatuga ki Kapanaumi, ne fanatu ki a ia se ofisa o kautau kae ne fakamolemole atu penei,  “Tou ‵malu, a taku tavini telā e takato i te fale ona ko te mea ko ‵pili, kae ko oko eiloa i te tigaina.”  Ne fai atu a Iesu ki a ia: “Ka faka‵lei ne au a ia ma oko atu au ki konā.”  Ne tali atu te ofisa o kautau ki a ia: “Tou ‵malu, e se ‵tau o ulu koe ki loto i toku fale i a au ko tō fatauva, kae fai aka fua sau pati kae ka ‵lei ei taku tavini.  Me i a au foki se tagata e isi saku pule, o pule ki luga i sotia. E fakatonu atu au ki se sotia, ‘Fano! ko te mea eiloa ko fano, kae ki te suā sotia, ‘Vau!’ ko te mea eiloa ko vau, kae ki taku pologa, ‘Fai te mea tenei!’ ko te mea eiloa ko fai ne ia.” 10  I te lagonaga ne Iesu a pati konei, ne ofo masei a ia kae fai atu ki tino kolā ne tau‵tali atu i a ia: “Au e fai ‵tonu atu ki a koutou: E seai eiloa se tino i Isalaelu kai maua ne au, e lasi penei tena fakatuanaki. 11  Kae e fai atu au ki a koutou me e tokouke ka o‵mai mai i te saegala mo te togala kae ka ‵nofo i te taipola fakatasi mo Apelaamo, Isaako mo Iakopo i te Malo o te lagi; 12  kae ko fanau o te malo ka ‵pei ki tua i te pouliga. Ka ‵tagi mautuutu kae fai olotou lili i konā.” 13  Fai atu ei a Iesu ki te ofisa o kautau: “Fano. Me ka fai eiloa penā e ‵tusa mo te mea e talitonu koe ki ei.” Kae ne ‵lei eiloa te masaki o te tavini i te taimi tenā. 14  I te okoatuga a Iesu ki te fale o Petelu, matea ei ne ia te mātua o te avaga a Petelu e takato me e pokotia ne te fiva. 15  Tenā, puke atu ei a ia ki tena lima, ‵lei ei tena fiva. Ne tafuke aka tou fafine ki luga, fesoasoani atu ei ki a ia. 16  I te okoatuga ki te afiafi, avatu ei ki a ia a tino e tokouke kolā e pukea ne temoni. Ne afuli ne ia keatea a temoni i tena fakatonuga, kae faka‵lei ne ia a tino ma‵saki katoa, 17  ko te mea ke mafai o fakataunu a pati kolā ne fai e auala i te pelofeta ko Isaia, ana muna: “Ne amo ne ia ‵tou logo‵maega kae tauave ne ia a ‵tou masaki.” 18  I te laveaga ne Iesu te vaitino i ana tafa, fakatonu atu ei ke olo latou ki te suā feitu o te vai. 19  Ne fanatu ki a ia se failautusi kae fai atu: “Te Faiakoga, au ka tautali atu i a koe i so se koga e fano koe ki ei.” 20  Kae ne fai atu a Iesu ki a ia: “E isi ne lua o alope, a ko manu eva e isi ne olotou ofaga, ka ko te Tama a te tagata e seai sena fale mo ana nofo.” 21  Fai atu ei tena soko e tokotasi ki a ia: “Te Aliki, tuku mai mua au ke fano o tanu toku tamana.” 22  Ne fai atu a Iesu ki a ia: “Tautali mai i a au, kae tuku i ei a tino ‵mate ke tanu olotou tino ‵mate.” 23  I tena sopoga ki te poti, tau‵tali atu ei ana soko i a ia. 24  Kae ne agi te matagi kae sou te tai, ‵fonu ei te poti i te vai; kae ko Iesu e tō tena moe. 25  Ne olo atu latou o ‵fagu a ia, olotou muna: “Te Aliki, faka‵sao aka tatou, me i a tatou ko pili o ‵mate!” 26  Kae ne fai atu a ia ki a latou: “Kaia e ma‵taku ei koutou, koutou kolā e fo‵liki otou fakatuanaki?” Tu aka ei tou tagata ki luga kae ‵liko ne ia te matagi mo te tai, malū palapala ei te matagi mo te tai. 27  Ne ofo masei a tino kae fai aka: “Se a te vaegā tino tenei? E faka‵logo foki te matagi mo te tai ki a ia.” 28  I tena okoga ki te suā feitu, ki te fenua ko Katala, fetaui ei a ia mo tāgata e tokolua kolā e pukea ne temoni, ne o‵mai mai tanuga, kae ko oko eiloa i te fakama‵taku; ne seki ai eiloa se tino toa ne mafai o fano i te auala tenā. 29  Kae ne paka‵laga atu lāua penei: “Kaia e fakalavelave mai ei koe ki a māua, e te Tama a te Atua? E a, a koe ne vau o fakapuapuagatia a māua a koi tuai o oko ki te taimi tonu?” 30  Kae e isi se lafu puaka e kai‵kai i se malae e ‵mao mai i a latou. 31  Tela la, ne fakamolemole atu a temoni ki a ia, olotou muna: “Kafai e afuli matou ne koe kea‵tea, uga atu la matou ki loto i puaka konā.” 32  Fai atu ei a ia ki a latou: “Olo la!” Ne olo kea‵tea latou kae ulu atu ki loto i puaka konā, ‵tele fakavave atu ei a puaka ki te kaugutu o te mauga, ‵to ki lalo i te tai, ‵mate atu eiloa i ei. 33  Kae ne ‵tele atu a tino fagai puaka ki loto i te fa‵kai o lipoti atu a mea katoa, e aofia i ei te tala e uiga ki tāgata kolā ne pukea ne temoni. 34  Ne o‵mai a tino katoa i te fa‵kai ke fetaui latou mo Iesu, kae i te otiga ne lavea ne latou a ia, ne kinau atu latou ke fano a ia keatea mai te lotou fenua.

Fakamatalaga mai lalo