Mataio 27:1-66

27  I te tafataeao o te suā aso, ne fono ei a faitaulaga pule mo toeaina katoa ke tamate ne latou a Iesu.  Ne saisai ne latou ana lima kae ‵taki atu ki a Pilato, te kovana.  Kae i te laveaga ne Iuta, telā ne fakatogafiti ne ia a Iesu, i a ia ko fakasala, ne salamō masei tou tagata. Ne faka‵foki ei ne ia te tolusefulu tupe siliva ki faitaulaga pule mo toeaina,  ana muna: “Au ko agasala i te faiga o te togafiti masei ki se tino amiotonu.” Olotou muna: ‘Se a te motou fekau i te mea tenā? Faitalia atu eiloa koe!”  Tenā, ‵pei atu ne ia a tupe siliva ki te faletapu, fano ei tou tagata o noua.  Ne puke ne faitaulaga pule a tupe siliva kae fai aka penei: “E se ‵tau o lafo atu a tupe konei ki koloa o te faletapu, me ne ‵togi ki ei a toto o te tino ne tamate.”  Ne fono fakatasi latou ki ei, ‵togi ei ne latou ki ei a te manafa o tino faite ipu kele mō tanu a tino fakaa‵lofa.  Ne fakaigoa ei te koga tenā ki te Manafa o Toto ke oko mai eiloa ki aso nei.  Ne fakataunu i ei a pati ne fai mai e auala i a Ielemia te pelofeta, ana muna: “Ne puke ne latou a tupe siliva e tolusefulu, ko te aofaki o tupe kolā ne filifili ne nisi tama a Isalaelu ke ‵togi ki ei a Ia, 10  kae ne ‵togi ne latou ki ei te manafa o tino faite ipu kele, e ‵tusa mo te fakatonuga a Ieova ki a au.” 11  Ne tu atu a Iesu i mua o te kovana i te taimi tenei, ne fesili atu te kovana ki a ia: “A koe ko te Tupu o tino Iutaia? Ne tali atu a Iesu: “Tenā eiloa e fai mai ne koe.” 12  Kae i te ‵losiatuga a faitaulaga pule mo toeaina ki ei, ne seki ai sena tali ne fai. 13  Ne fai atu ei a Pilato ki a ia: “E a, e se lagona ne koe te uke o ‵losiga kolā e molimau mai latou e uiga ki a koe?” 14  Kae ne seki ai sena tali ne fai atu ki a ia, e tonu, e seai eiloa sena pati e tasi ne fai; ne ofo masei ei te kovana. 15  I aso fakamanatu takitasi, e masani o ‵tala atu ne te kovana se pagota e tokotasi ki tua i te vaitino, ko te tino telā e ma‵nako latou ki ei. 16  Ko te taimi foki eiloa tenā e ‵sai ei ne latou se pagota fakamataku e igoa ki a Palapa. 17  Tela la, i te lotou maopoopomaiga, fai atu ei a Pilato ki a latou: “Ko oi te tino e ma‵nako koutou ke ‵tala atu ne au ki a koutou, ko Palapa io me ko Iesu telā e fakaigoa ki a Keliso?” 18  Ne iloa ne Pilato me ne tuku atu fua ne latou a Iesu ki a ia ona ko te loto ma‵sei. 19  E se gata i ei, a koi nofo a ia i luga i tena nofoga fakamasino kae oko atu ki ei te fekau a tena avaga, ana muna: “Ke mo a eiloa e fai ne koe se mea masei ki te tino amiotonu tenā, ne puapuaga masei au i se moemiti i te aso tenei ona ko ia.” 20  Kae ne fakamalosi atu a faitaulaga pule mo toeaina ki te vaitino ke fai atu ke ‵tala mai a Palapa, kae ke tamate a Iesu. 21  Ne fai atu te kovana ki a latou: “Ko oi i a lāua konei e ma‵nako koutou ke ‵tala atu ne au ki a koutou?” Olotou muna: “Ko Palapa.” 22  Ne fai atu a Pilato: “Ne a la aku mea ka fai ki a Iesu telā e fakaigoa ki a Keliso?” Ne fai atu latou katoa: “‵Tuki atu a ia ki te lakau!” 23  Ne fai atu a ia: “Kaia? Se a tena mea masei ne fai?” Kae ne paka‵laga aka faeloa latou ki luga: “‵Tuki atu a ia ki te lakau!” 24  I te laveaga ne Pilato me ko seai se aoga o ana pati, kae e fanaka faeloa o lasi te ua‵te o te vaitino, ne puke tou tagata ki vai, ‵fulu ana lima i mua o tino konā, kae fai atu: “Au e ‵ma i toto o te tagata tenei. Faitalia atu la koutou.” 25  Ne tali atu a tino katoa: “Ka i luga i a matou mo omotou tama‵liki ana toto.” 26  Ne ‵tala atu ei ne ia a Palapa ki a latou, kae fakatonu atu ke ‵kini a Iesu, ko tuku atu ei ke ‵tuki ki te lakau. 27  Ne ave ne sotia a te kovana a Iesu ki loto i te palesi o te kovana kae fakamaopoopo atu a sotia katoa ki a ia. 28  Ne tapale ne latou ana gatu kae fakapei atu se gatu lanu ‵kula ki a ia. 29  Ne ‵fili ne latou se foualiki ki mea makai‵kai, fakafou atu ki tena ulu kae tuku atu te tokotoko ke puke i tena lima fakaatamai. Ne to‵tuli ifo latou i ana mua kae fakatauemu atu ki a ia, olotou muna: “Talofa, te Tupu o tino Iutaia!” 30  Ne popoki ne latou a ia; ne puke ne latou te tokotoko kae pagopago ne latou tena ulu. 31  Oti aka loa, i te otiga o olotou faifaiga fakatauemu konā, tapale ei ne latou te gatu kae toe fakapei atu ki ana gatu eiloa, kae ‵taki atu ke ‵tuki ki te lakau. 32  I te lotou auala, ne fetaui latou mo te tino Kulene e igoa ki a Simona. Ne fakatonu atu latou ki te tagata tenei ke amo ne ia te lakau fakasaua o Iesu. 33  I te lotou okoga ki te koga e igoa ki Kolokota, ko tena uiga ko te Koga o Gatiulupoko, 34  ne tuku atu ne latou ki a ia te uaina e palu tasi mo se mea ‵kona, kae i te otiga ne tami ki ei, ne seki talia ei ne ia ke inu a ia ki ei. 35  I te otiga ne ‵tuki ne latou a ia ki te lakau, tufa ei ne latou ana gatu i a latou eiloa i te faiga o se vili, 36  saga‵saga ei latou i konā o leoleo a ia. 37  Ne faka‵piki foki ne latou i te lakau mai luga i tena ulu a te ‵losiga tenei: “Ko Iesu tenei te Tupu o tino Iutaia.” 38  Kae ne ‵tuki a ia ki te lakau fakatasi mo tino kai‵soa e tokolua, e tokotasi i tena feitu fakaatamai, kae e tokotasi i tena feitu fakamaui. 39  Ne pati ma‵sei atu ki a ia a tino kolā ne faka‵sili aka i olotou tafa kae lūlū olotou ulu 40  kae fai atu: “Ko koe telā ka ofa ne koe te faletapu kae toe fakatu aka i aso e tolu, fakasao aka la koe! Kafai koe ko te Tama a te Atua, fanaifo la ki lalo mo te lakau fakasaua!” 41  E penā foki a faitaulaga pule fakatasi mo failautusi mo toeaina; ne kamata o fakatauemu atu ki a ia kae fai atu: 42  “Ne faka‵sao ne ia a nisi tino kae e se mafai o fakasao ne ia a ia eiloa! Ko ia te Tupu o tino Isalaelu; fanaifo la mai te lakau fakasaua kae ka tali‵tonu tatou ki a ia. 43  Ko talitonu a ia ki te Atua; fai la ke fakasao ne Ia a ia nei eiloa māfai e manako a Ia ki ei, me ne fai mai tou tagata, ‘Au ko te Tama a te Atua.’” 44  Ne kamata foki o fakatauemu atu ki a ia a tino kai‵soa kolā e ‵tuki fakatasi mo ia. 45  I te ono* o itula o fano ki mua, ne pouli ei te fenua kātoa, ke oko atu eiloa ki te iva* o itula. 46  Kati ko te iva o itula ne kalaga aka ei a Iesu i se leo lasi, ana muna: “Eli, Eli, lama sapakatani?” ko tena uiga, “Toku Atua, toku Atua, kaia ko tiaki ei au ne koe?” 47  I te lagonaga ne latou te mea tenei, fai aka ei a nisi tino kolā ne takatu‵tu atu i konā: “A te tagata tenei ko kalaga ki a Elia.” 48  Ne tele fakavave atu se tino i a latou, puke se omomi, ufi atu ki se uaina ‵vi, faka‵piki ki te mata o se lakau kae tuku atu ke inu a ia. 49  Kae ne fai atu a nisi tino: “Tuku malie a ia! Ke onoono aka tatou me e mata, e vau a Elia o fakasao a ia.” [[Ne puke ne te suā tino te ‵tao kae ‵velo ne ia tena feitu e tasi, ‵sali mai ei ki tua a toto mo vai.]] 50  Ne toe kalaga aka a Iesu i se leo lasi, ko te mea eiloa ko mate. 51  Kae ne masaelua te ‵pui laugatu i te faletapu, mai luga ki lalo, ne galulu te laukele kae mafa‵fa valevale a kaupapa. 52  Ne ma‵tala a tanuga kae uke a foitino o tino tapu kolā ko oti ne ‵mate ne ‵to ki tua, 53  (a ko tino kolā ne ui atu i tanuga konā i tena otiga ne toe tu aka, ne oko atu ki loto i te fa‵kai tapu), kae ne lavea ne tino e tokouke a latou. 54  Kae i te laveaga ne te ofisa o kautau mo latou kolā ne leoleo ne latou a Iesu, a te mafuie mo mea kolā ne ‵tupu, ko oko eiloa te lotou ma‵taku, olotou muna: “Tenei eiloa te Tama a te Atua.” 55  E se gata i ei, e tokouke a fāfine ne kilo‵kilo atu ki ei mai se koga tai ‵mao, ko latou kolā ne olo fakatasi mo Iesu mai Kalilaia ke tavini atu ki a ia; 56  e aofia i a latou konā ko Malia te Makatala, ko Malia te mātua o Iakopo mo Iose, mo te mātua foki o tama‵liki a Sepetaio. 57  I te afiafi, ne fanatu se tino maumea mai i Alimataia, e igoa ki a Iosefa, telā ko oti foki ne fai mo fai se soko o Iesu. 58  Ne fanatu te tagata tenei ki a Pilato kae fakamolemole atu ke tuku atu te foitino o Iesu. Ne fakatonu atu ei a Pilato ke tuku atu te foitino ki a ia. 59  Ne puke ne Iosefa te foitino kae ‵kofu ne ia ki laugatu ‵ma kae ‵gali. 60  Ne fakatakato ne ia i tena tanuga fou telā ne tuki ne ia i te papa. Kae i te otiga ne fakateka ne ia se fatu lasi ki te mataloa o te tanuga, fano ei a ia. 61  Ne ‵nofo a Malia te Makatala mo te suā Malia i konā, i mua o te tanuga. 62  I te suā aso, mai tua o te Aso Fakatoka, ne maopoopo atu ei a faitaulaga pule mo Falesaio i mua o Pilato, 63  kae fai atu: “Tou ‵malu, ko masaua ne matou a pati a te tino fakaloiloi tino tenā ne fai a koi ola ei a ia, ‘Mai tua o aso e tolu kae ka toe fakatu aka ei au.’ 64  Tela la, fakatonu atu ke ‵pui faka‵lei te tanuga ko te mea ke se olo atu ana soko o kaisoa tena foitino ko fai atu ei ki tino, ‘Ne fakatu aka a ia mai te mate!’ kae ka sili atu te masei o te tala loi tenā i lō te mea mua.” 65  Ne fai atu a Pilato ki a latou: “E isi se otou leoleo. Olo la o ‵pui faka‵lei te tanuga e pelā eiloa mo te mea e iloa ne koutou o fai.” 66  Olo ei latou o ‵pui faka‵lei a te tanuga kae faka‵tu atu a sotia i ei ke leoleo ne latou.

Fakamatalaga mai lalo

Mat 27:45  “Te ono o itula” e ‵pau mo te itula e 12 i te tutonu.
Mat 27:45  “Te iva o itula” e ‵pau mo te itula e 3 i te fakaafiafi.