Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Tusi Tapu i te Itaneti | NEW WORLD TRANSLATION (Ne `Lomi i te 1984)

Mataio 24:1-51

24  Ne tiakina ne Iesu te faletapu, fano ei ki tua, kae ne olo atu ana soko o fakaasi atu ki a ia a vaega katoa o te faletapu.  Ne fai atu a ia ki a latou: “E se lavea ne koutou a mea katoa konei? Au e fai ‵tonu atu ki a koutou, E seai se fatu ka moe i luga i te suā fatu kae e se ‵pei katoa ki lalo.”  A koi sagasaga a ia i luga i te Mauga o Olive, ne olo atu ana soko ki a ia, ko latou aka eiloa, kae fai atu: “Fai mai aka ki a matou, Ka ‵tupu mafea a mea konei, kae se a foki te fakailoga o tou fakatasi* mai mo te taimi o te gataga o te olaga tenei?”  Ne tali atu a Iesu ki a latou: “Fakaeteete ke se faka‵se koutou ne se tino,  me e tokouke a tino ka o‵mai i toku igoa kae fai mai, ‘Au ko te Keliso,’ kae ka faka‵se ne latou a tino e tokouke.  Ka lagona ne koutou a taua mo tala o taua; ke mo a e ma‵taku koutou. Me e ‵tau eiloa o ‵tupu a mea konei, kae e seki oko mai te gataga.  “Me ka fai taua te suā atufenua ki te suā atufenua, mo te suā malo ki te suā malo. Ka oko mai a oge meakai mo mafuie ki koga katoa.  A mea katoa konei ko te kamataga o puapuaga.  “Ka fakapuapuaga koutou ne tino kae tamate foki. Ka takalia‵lia a fenua katoa ki a koutou ona ko toku igoa. 10  E se gata i ei, ka pa‵ku* a tino e tokouke kae fakatogafiti ne te suā tino a te suā tino kae ka takalialia te suā tino ki te suā tino. 11  Ka ‵sae aka a pelofeta ‵loi e tokouke kae takitaki ‵se ne latou a tino e tokouke. 12  Ona ko te gasolo aka o amioga solitulafono ko gasolo ifo ei te sē a‵lofa o tino. 13  Kae ko te tino telā e lotomau ke oko ki te gataga ka sao eiloa a ia. 14  A ko te tala ‵lei tenei o te Malo ka talai atu ki te lalolagi nofoaki kātoa mo fai se molimau ki atufenua katoa; ko oko mai ei te gataga. 15  “Tela la, kafai ko lavea ne koutou a te mea fakatakalialia telā e ofa ne ia a mea, e pelā mo te mea ne faipati ki ei te pelofeta ko Tanielu, ko tu i se koga tapu, (ke na malamalama la te tino faitau), 16  ke na ‵tele atu la a latou kolā e ‵nofo i Iuta ki luga i mauga. 17  Ko te tino i luga i te tuafale ke se fanaifo o puke se mea mai tena fale, 18  ko te tino i te fatoaga ke se toe foki ki te fale o puke sena gatu i ei. 19  Kalofa eiloa i fāfine fai‵tama mo fāfine kolā koi faū olotou pepe māfai ko oko mai a aso konā! 20  ‵Talo faeloa ko te mea ke se ‵tele koutou i te taimi o te ‵tau ‵moko, io me ko te Sapati; 21  me ko te taimi eiloa tenā ka tupu i ei te ‵toe fakalavelave lasi telā e seki tupu aka eiloa talu mai te kamataga o te lalolagi ke oko atu eiloa ki te aso tenei, kae ka se toe tupu eiloa se mea penā. 22  A te ‵tonuga loa, moi se fakamu‵tana a aso konā, e seai eiloa se tino e sao, kae ona ko tino filifilia, ka fakamu‵tana ei a aso konā. 23  “Kafai e fai mai se tino ki a koutou, ‘Kiloke! Tenei a te Keliso,’ io me, ‘Telā i ko!’ sa tali‵tonu ki ei. 24  Me ka ‵sae mai a Keliso ‵loi mo pelofeta ‵loi kae ka fai ne latou a fakailoga ‵lasi mo mea fakaofoofogia ke takitaki ‵se ei a tino, ke oko foki loa ki tino filifilia. 25  Kiloke! Ko fakailoa atu muamua ne au a mea konei ki a koutou. 26  Tela la, kafai e fai atu a tino ki a koutou, ‘Kiloke! A ia telā i te koga lavaki,’ sa olo ki ei; ‘Kiloke! A ia tenā i loto i te potu,’ sa tali‵tonu ki ei. 27  Me e pelā eiloa mo te ‵lapa mai o te uila mai te saegala kae maina atu ki te togala, e penā foki te fakatasi mai o te Tama a te tagata. 28  Ko te koga telā e takato i ei se foitino mate, ka mumu atu foki ki ei a aeto. 29  “Mai tua malie faeloa o te fakalavelave i aso konā, ka pouli te la, kae ka se maina te masina, ka ta‵tela ifo a fetū mai te lagi, kae ka ga‵lulu a mea ma‵losi o te lagi. 30  Kae ka lavea atu ei a te fakailoga o te Tama a te tagata i te lagi, kae ka ‵tagi fanoa‵noa a matakāiga katoa o te lalolagi, kae ka lavea ne latou a te Tama a te tagata e vau i kaumana o te lagi mo tena ‵mana mo tena ‵malu sili. 31  Ko uga atu ei ne ia ana agelu fakatasi mo ‵tagi o pu, kae ka fakamaopoopo ne latou ana tino filifilia mai feitu e fa o te lalolagi, mai te suā kapakapalagi ke oko ki te suā kapakapalagi. 32  “Ke mafaufau ki te akoakoga mai te tala fakatusa e uiga ki te lakau ko te mati: I te taimi e toe ola aka ei ana kaula kae ko kamata o ‵somo aka ana lau, ko iloa ei ne koutou me ko pili mai te ‵tau ‵vela. 33  Kafai foki ko lavea ne koutou a mea katoa konei, ko iloa ei ne koutou me ko tu pili atu a ia ki otou mataloa. 34  Au e fai ‵tonu atu ki a koutou me ka se palele atu te kautama tenei seiloga ke fakataunu a mea katoa konei. 35  Ka ‵galo atu a te lagi mo te lalolagi, kae ka se mafai o ‵galo aku muna. 36  “E uiga ki te aso mo te itula tenā, e seai se tino e iloa ne ia, ke oko eiloa ki agelu o te lagi mo te Tama, kae na ko te Tamana fua. 37  Me e pelā eiloa mo aso o Noa, ka penā foki te fakatasi mai o te Tama a te tagata. 38  Me e pelā eiloa mo aso mai mua o te Lolo, a tino e ‵saga faeloa o ‵kai kae inu, kae fakatau a‵vaga foki, ke oko eiloa ki te aso ne ulu ei a Noa ki loto i te vaka. 39  Ne seki fia ‵saga atu latou ki ei ke oko eiloa ki te taimi ne poko ei te Lolo, tapea‵pea atu ei latou keatea, kae ka penā foki a te fakatasi mai o te Tama a te tagata. 40  E tokolua tāgata ka ‵nofo i te fatoaga: E tokotasi e ave kae tiaki te suā tino; 41  e tokolua fāfine e tuki saito i te koga tuki saito: E tokotasi e ave kae tiaki te suā tino. 42  Tela la, ke tumau i te matapula‵pula, me e se iloa ne koutou a te aso e vau ei te otou Aliki. 43  “Ke iloa ne koutou te mea tenei: Moi fai e iloa ne te pule o te fale a te taimi e vau ei te tino kaisoa, penei ka alaala faeloa a ia ke mo a eiloa e ulu atu se tino ki tena fale. 44  I te feitu la tenei, e ‵tau foki mo koutou o toka faeloa, me i te Tama a te tagata e vau i te itula telā e seki fakamoe‵moe koutou ki ei. 45  “Ko oi la te tavini fakamaoni kae poto telā ne fili ne tena Matai ke tausi atu ki ana nisi tavini, kae ke fakasoa atu olotou meakai i te taimi tonu? 46  E fiafia eiloa te tavini tenā māfai e oko mai tena Matai kae lavea ne ia me e fai eiloa ne ia a te mea tenā! 47  Au e fai ‵tonu atu ki a koutou: Ka ‵tofi eiloa ne ia te tavini tenā ke pule i ana kope katoa. 48  “Kae kafai e fai ifo te tavini masei tenā ki a ia eiloa i tena loto, ‘Ko tuai mai toku Matai,’ 49  kae kamata o ‵ta ne ia a nisi tavini kae ‵kai kae inu fakatasi mo tino ko‵na, 50  ka fanatu ei te Matai o te tavini tenā i te aso e seki fakatalitali a ia ki ei mo te itula e se iloa ne ia, 51  kae ka fakasala ne ia ki te ‵toe sala ‵mafa eiloa kae ka tuku atu foki tou tagata ke ‵kau fakatasi mo tino ‵loi. Tenā eiloa te koga ka tagi mautuutu kae fai ana lili i ei.

Fakamatalaga mai lalo

 Ke onoono ki te Mataupu Fakaopoopo e 5.
 Io me “‵to keatea mai te lotu.”