Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Tusi Tapu i te Itaneti | NEW WORLD TRANSLATION (Ne `Lomi i te 1984)

Mataio 23:1-39

23  Ne faipati atu ei a Iesu ki te vaitino mo ana soko, ana muna:  “Ko oti ne fakasaga‵saga ne failautusi mo Falesaio a latou eiloa ki luga i te nofoga o Mose.  Tela la, a mea katoa kolā e fai atu ne latou ki a koutou, fai kae faka‵logo ki ei, kae sa fai ne koutou a mea kolā e fai ne latou, me e fai fua olotou pati kae se tau‵tali i ei.  E saisai ne latou a amoga ‵mafa kae tuku atu ke amo ne tāgata i olotou tuauma, kae e se mafai lele eiloa ne latou o fakapatele atu se matikao e tasi ki amoga konā.  A galuega katoa kolā e fai ne latou e fai fua ke lavea ne tino, me e fakalauefa atu ne latou a mea kolā e tuku ei a tusitusiga tapu kae e ‵sai ki luga i olotou foitino mo fai se puipuiga, kae faka‵loa foki ne latou a fele o olotou gatu.  E ma‵nako ke ‵nofo latou i toe koga ma‵luga i ‵kaiga i afiafi mo nofoga tafa ki mua i sunako.  E ma‵nako foki ke fakatalofa atu a tino ki a latou i maketi kae ke fakaigoa latou ne tino ki Faiakoga.*  A ko koutou, ke mo a e fakaigoa koutou ki Faiakoga, me e tokotasi fua te otou Faiakoga, a ko koutou ne taina katoa.  E se gata i ei, ke mo a e fakaigoa ne koutou se tino i te lalolagi ki te otou tamana, me e tokotasi fua te otou Tamana, ko Ia telā i te lagi. 10  Ke se taku foki ne koutou a koutou ki takitaki, me e tokotasi fua te otou Takitaki, ko Keliso. 11  Kae ko te ‵toe tino sili i a koutou e ‵tau o fai mo fai te otou tavini. 12  So se tino e fakamaluga ne ia a ia eiloa ka fakamalalogina, a ko te tino telā e fakamalalo ne ia a ia eiloa ka fakamalugagina. 13  “Kalofa eiloa i a koutou failautusi mo Falesaio, koutou ne tino ‵loi! me e ‵pono ne koutou te Malo o te lagi i mua o tino, me e se ulu foki koutou ki loto i ei, kae e se talia foki ne koutou a latou kolā e olo atu ki ei ke ulu ki ei. 14*  —— 15  “Kalofa eiloa i a koutou failautusi mo Falesaio, koutou ne tino ‵loi! me e ma‵laga fakatamilomilo koutou i te tai mo te laukele ke maua ei se tino talitonu e tokotasi, kae kafai ko maua, e fai fua ne koutou ke sili fakalua atu tena malaia i Kena i lō koutou. 16  “Kalofa eiloa i a koutou, takitaki ‵kivi kolā e fai mai, ‘Kafai e tauto se tino i te faletapu e se afaina, kae kafai e tauto se tino i te aulo o te faletapu, e ‵tau eiloa o tausi ki ei.’ 17  Tino va‵lea kae ‵kivi! Tefea te mea e sili atu, ko te aulo io me ko te faletapu telā e fakatapu ne ia te aulo? 18  E fai mai foki koutou, ‘So se tino e tauto i luga i te fatafaitaulaga, e se afaina, kae kafai e tauto se tino i te taulaga telā i luga i ei, e ‵tau eiloa o tausi ki ei.’ 19  Tino ‵kivi! Tefea te mea e sili atu, ko te taulaga io me ko te fatafaitaulaga telā e fakatapu ne ia te taulaga? 20  Tela la, a te tino telā e tauto i luga i te fatafaitaulaga e tauto eiloa e uiga ki ei kae tauto foki ki mea katoa kolā i luga i ei, 21  a ko te tino telā e tauto i te faletapu e tauto eiloa e uiga ki ei kae e tauto foki ki a ia telā e nofo i ei, 22  a ko ia telā e tauto ki te lagi e tauto i luga i te nofogaaliki o te Atua e pelā foki mo ia telā e sagasaga i luga i ei. 23  “Kalofa eiloa i a koutou failautusi mo Falesaio, koutou ne tino ‵loi! me e tuku atu ne koutou te tasi-vae-sefulu o toe fuagā lakau fo‵liki e pelā mo te mili, te pekano mo te kumina, kae ko oti ne fakaseaoga ne koutou a vaega o te Tulafono kolā e tāua atu, e pelā mo te fai mea tonu, te loto fakamagalo mo te fakamaoni. Ne ‵tau o fai ne koutou a mea katoa konei, kae mo a foki e tiakina a nisi mea. 24  Takitaki ‵kivi, e faka‵ma keatea ne koutou a namu kae e folo ne koutou te kamela! 25  “Kalofa eiloa i a koutou failautusi mo Falesaio, koutou ne tino ‵loi! me e ‵fulu ne koutou te tua o te ipu mo tifa, kae i loto i ei e ‵fonu i te kaimanako mo faifaiga sē ‵lei. 26  Falesaio ‵kivi, ‵fulu mua te ipu mo te tifa i loto, ko te mea ke mafai foki o ‵ma i tua. 27  “Kalofa eiloa i a koutou failautusi mo Falesaio, koutou ne tino ‵loi! me e ‵pau eiloa koutou mo tanuga kolā e ‵kena pakipaki kae e foliga ‵gali i tua kae i loto i ei e ‵fonu i ivi o tino ‵mate mo vaegā mea lai‵lai katoa. 28  E penā foki koutou, e ‵kilo atu a tino ki otou foliga i tua i a koutou ne tino amio‵tonu, kae i loto i a koutou e ‵fonu i te ‵pelo mo amioga solitulafono. 29  “Kalofa eiloa i a koutou failautusi mo Falesaio, koutou ne tino ‵loi! me e faite ne koutou a tanuga o pelofeta kae e teu fakagali‵gali ne koutou a tanuga o tino amio‵tonu, 30  kae fai mai koutou, ‘Moi ne ‵nofo atu matou i aso o omotou tupuga, penei e se pisipisia matou i toto o pelofeta konā.’ 31  Tela la, e molimau mai eiloa koutou e uiga ki a koutou i a koutou ko tama a latou kolā ne tamate ne latou a pelofeta. 32  Fakaoti la ne koutou te galuega a otou tupuga. 33  “A koutou ne gata, ko tama a gata ‵poisini, e mafai pefea o ‵sao koutou mai te fakasalaga i Kena? 34  Ko te pogai eiloa tenei ka uga mai ei ne au ki a koutou a pelofeta, tino ‵poto mo faiakoga o tino katoa. Ka tamate kae ‵tuki ki te lakau ne koutou a nisi i a latou, a ko nisi ka ‵ta fakamasei ne koutou i loto i otou sunako kae ka fakasaua atu ki a latou mai te fa‵kai e tasi ki te suā fa‵kai, 35  ko te mea ke i luga i a koutou a toto o tino amio‵tonu katoa kolā ne ma‵ligi i luga i te lalolagi, mai te toto o te tino amiotonu ko Apelu ki te toto o Sakalia te tama a Palakaio, telā ne tamate ne koutou i te va o te faletapu mo te fatafaitaulaga. 36  Au e fai ‵tonu atu ki a koutou: a mea katoa konei ka oko mai eiloa ki luga i te kautama tenei. 37  “Ielusalema, Ielusalema, ne tamate ne koe a pelofeta kae peipei ne koe ki fatu a latou kolā ne uga mai ki a koe. Ko oko eiloa i te uke o taimi ne manako ei au o fakapulupulu au tama‵liki e pelā me se moa fafine e fakapulupulu ne ia ana punuā moa mai lalo i ana kapa‵kau! Kae ne seki ma‵nako koutou ki ei. 38  Kiloke! A koutou ka afuli keatea mai te otou fale. 39  Me e fai atu au ki a koutou: Ka se toe lavea ne koutou au mai te taimi nei ke oko ki te taimi ka fai aka ei koutou penei, ‘Ke manuia a ia telā e vau i te igoa o Ieova!’”

Fakamatalaga mai lalo

 I te ‵gana Eleni, “se Lapi.”
 Ke onoono ki te fakamatalaga mai lalo i te Mat 17:21.