Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Tusi Tapu i te Itaneti | NEW WORLD TRANSLATION (Ne `Lomi i te 1984)

Mataio 22:1-46

22  Ne toe faipati atu a Iesu ki a latou i tala fakatusa, ana muna:  “A te Malo o te lagi e fakatusa ki se tagata, se tupu telā e fakatoka ne ia te ‵kaiga o te avaga a tena tama.  Ne uga atu ne ia ana pologa ke ka‵laga atu ki tino kolā ne ‵kami ki te ‵kaiga o te avaga, kae ne seki fia olo atu latou.  Ne toe uga atu ne ia a nisi pologa, ana muna, ‘Fai atu ki tino ‵kami: “Ko oti ne fakatoka ne au taku ‵kaiga, ko oti ne ‵ta aku pulumakau mo aku manu puta‵puta, kae ko toka a mea katoa. O‵mai ki te ‵kaiga o te avaga.”’  Kae ne seki fia ‵saga atu a latou ki ei, olo ei keatea, e tokotasi te tino ki tena fatoaga, a ko te suā tino ki tena pisinisi;  a ko nisi tino, ne puke ne latou ana pologa, ‵ta fakamasei kae tamate atu.  “Ne kaitaua te tupu, uga atu ei tena kautau o tamate a tino tatino konā kae ‵sunu foki te lotou fa‵kai.  Fai atu ei a ia ki ana pologa, ‘Ko toka te ‵kaiga o te avaga, kae ko se ‵tau o ‵mai a tino kolā ne ‵kami.  Tela la, olo atu koutou ki auala katoa o te fa‵kai, kae ‵kami mai so se tino e fetaui mo koutou ki te ‵kaiga o te avaga.’ 10  Ne olo atu ei a pologa konā ki auala katoa kae fakamaopoopo mai a tino katoa kolā ne maua ne latou i konā, tino ma‵sei mo tino ‵lei; kae ne ‵fonu eiloa te koga telā e fai i ei te avaga i tino kolā e saga‵saga o ‵kai i te taipola. 11  “I te vauga a te tupu o iloilo a tino ‵kami ne lavea ei ne ia se tagata e se pei ki gatu e ‵tau mō te avaga. 12  Fai atu ei a ia ki ei, ‘Toku tagata, ne ulu mai pefea koe ki loto nei e aunoa mo gatu e ‵tau o pei ki te avaga?’ Ne nofo ‵mu fua tou tagata. 13  Fai atu ei te tupu ki ana tavini, ‘Saisai ana lima mo ana vae kae ‵pei atu ki tua i te pouliga. Tenā eiloa te koga ka tagi mautuutu kae fai ana lili i ei.’ 14  “Me e tokouke a tino e ‵kami, kae ne nai tino fua e fili aka.” 15  Ne olo ei a Falesaio o fono ki se auala ke malei ne latou a ia i ana pati. 16  Ne uga atu ei ne latou ki a ia olotou soko, fakatasi mo te kau a Helota, kae fai atu: “Te Faiakoga, e iloa ne matou i a koe e faipati ki te mea tonu kae e akoako foki ne koe te mea tonu e uiga ki auala o te Atua, kae e se fia saga atu koe ki manatu o nisi tino, me e se kilo atu koe ki foliga o tino i tua. 17  Tela la, fai mai aka ki a matou, ‘Se a tau faka‵tau? E mata, e saoloto i te tulafono ke ‵togi atu a lafoga foitino ki a Kaisala io me ikai?” 18  Kae ko leva ne iloa ne Iesu olotou mafaufauga ma‵sei, fai atu ei: “Kaia e tofotofo ei ne koutou au, koutou tino ‵loi? 19  Fakaasi mai ki a au te tupe o te lafoga foitino.” Ne avatu ei ne latou se tenali e tasi ki a ia. 20  Ne fai atu a ia ki a latou: “I o oi te ata mo te igoa tenei?” 21  Ne fai atu latou: “I o Kaisala.” Muna atu ei a ia ki a latou: “Toe ‵togi atu a mea a Kaisala ki a Kaisala, a ko mea a te Atua ki te Atua.” 22  I te lagonaga ne latou a te mea tenā, ne ofo masei latou, tiaki ei ne latou a ia kae olo kea‵tea. 23  I te aso tenā, ne olo atu ki a ia a te kau Satukaio, kolā e fai mai me e seai se toetu, kae fesili atu: 24  “Te Faiakoga, ne fai mai a Mose, ‘Kafai e mate se tagata kae seai ne ana tama‵liki, e ‵tau o avaga tena taina mo tena avaga ko te mea ke maua ne tama‵liki ma tena taina.’ 25  E isi ne tautaina e tokofitu e ‵nofo matou; ne avaga te toekimua kae mate kae seai sena tamaliki, tuku atu ei tena avaga ki tena taina. 26  Ne penā foki ki te tokolua mo te tokotolu ke oko eiloa ki te tokofitu. 27  Fakamuli ifo, mate ei te fafine. 28  Tela la, i te taimi o te toetu, ko oi te tino mai te tokofitu konei ka fai mo fai te avaga a tou fafine? Me ne a‵vaga katoa a latou mo ia.” 29  Ne tali atu a Iesu ki a latou: “A koutou e ‵se, me e se iloa ne koutou a te Tusi Tapu io me ko te ‵mana o te Atua, 30  me i te taimi o te toetu a tāgata ka se a‵vaga e pelā foki mo fāfine, kae ka fai latou e pelā mo agelu i te lagi. 31  Kae e pelā mo te toe‵tuakaga o tino ‵mate, e a, e seki fai‵tau koutou ki muna kolā ko oti ne fai atu ne te Atua ki a koutou, 32  ‘Au ko te Atua o Apelaamo, ko te Atua o Isaako mo te Atua o Iakopo’? A ia e se ko te Atua o tino ‵mate, a ko te Atua o tino ola.” 33  I te lagonaga ne te vaitino a pati konā, ne ofo masei ei latou i ana akoakoga. 34  I te ‵logoga a Falesaio me ne fakafilemu aka ne ia a gutu o Satukaio, olo fakatasi atu ei latou ki a ia. 35  Kae ne fesili tofotofo atu se tokotasi o latou, telā e poto i te Tulafono: 36  “Te Faiakoga, se a te ‵toe fakatonuga sili i te Tulafono?” 37  Ne fai atu a Iesu ki tou tagata: “‘E ‵tau mo koe o alofa ki a Ieova tou Atua mo tou loto kātoa mo tou foitino kātoa mo tou mafaufau kātoa.’ 38  Tenei te ‵toe fakatonuga sili kae tu muamua. 39  E penā foki te lua o fakatonuga: ‘E ‵tau mo koe o alofa ki tou tuakoi e pelā mo koe ki a koe eiloa.’ 40  A fakatonuga e lua konei e fakavae ki ei a te Tulafono kātoa, penā foki mo te kau Pelofeta.” 41  A koi maopoopo a Falesaio i konā ne fesili atu a Iesu ki a latou: 42  “Se a te otou faka‵tau e uiga ki te Keliso? A ia ko te tama a ai?” Ne fai atu latou ki a ia: “I a Tavita.” 43  Ana muna ki a latou: “Kaia la ne fakaosofia ei a Tavita ke fakaigoa ne ia te Keliso ki te Aliki, 44  ‘Ne fai atu a Ieova ki toku Aliki: “Nofo i toku feitu fakaatamai ke oko ki te taimi e tuku ei ne au ou fili mai lalo i ou vae”’? 45  Tela la, kafai ne fakaigoa ne Tavita a te Keliso ki te Aliki, i te feitu fea e fai ei te tino tenā mo fai tena tama?” 46  E seai eiloa se tino ne mafai o tali atu ki a ia, kae talu mai te aso tenā o fano ki mua, ne seki ai eiloa se tino ne loto toa o toe fesili atu ki a ia.

Fakamatalaga mai lalo