Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Tusi Tapu i te Itaneti | NEW WORLD TRANSLATION (Ne `Lomi i te 1984)

Mataio 21:1-46

21  I te lotou piliatuga ki Ielusalema kae ne oko atu eiloa latou ki Petefake i luga i te mauga o Olive, uga atu ei ne Iesu a soko e tokolua,  kae fai atu: “Olo atu ki te fa‵kai tenā i lu mua, kae ka lavea ne koulua se asini tenā e ‵sai fakatasi mo se tamā asini i ei; ‵tala, ko aumai ei ki a au.  Kae kafai e fai atu ne pati a se tino ki a koulua, fai atu fua penei, ‘E manako ki ei te Aliki.’ Ka tuku fakavave mai ei ne ia a asini konā.”  Ne fai eiloa penā ko te mea ke fakataunu aka ei a pati kolā ne faipatigina e auala i te pelofeta, ana muna:  “Fai atu ki te tama fafine a Siona: ‘Kiloke! Ko fanatu tou Tupu ki a koe, e loto maulalo, e sopo i luga i se asini, e tonu, te tama a te manu fai galuega ‵mafa.’”  Ne olo atu ei a soko konei kae ne fai eiloa ne lāua e pelā eiloa mo te fakatonuga a Iesu.  Ne avatu ne lāua te asini mo tena tama, ne ‵fola ne latou olotou gatu i luga i manu konā, kae ne sopo aka ei a Iesu ki luga i ei.  Ne ‵fola foki ne te tokoukega o tino olotou gatu i te auala, a ko nisi tino ne ‵kati ne latou a kaula o lakau kae fola atu i te auala.  A ko te vaitino, ko latou kolā e olo i ana mua mo latou kolā e o‵mai i ana tua, ne paka‵laga atu penei: “Matou e ‵talo, ke fakaola te Tama a Tavita! Ke manuia a ia telā e vau i te igoa o Ieova! Matou e ‵talo, ke fakaola a ia ne koe telā e nofo i te koga maluga!” 10  I tena okoatuga ki Ielusalema, ne ua‵te valevale ei a te fa‵kai kātoa, olotou muna: “Ko oi la te tino tenei?” 11  Ne fai atu faeloa te vaitino ki a latou: “A ia tenei ko Iesu te pelofeta, mai i Nasaleta i Kalilaia!” 12  Ne ulu atu a Iesu ki loto i te faletapu kae afuli ne ia ki tua a tino katoa kolā e fakatau kae ‵togi olotou mea i ei. Ne tuletule ne ia ki lalo a taipola a tino ‵fuli tupe kae fakatau lupe. 13  Ne fai atu a ia ki a latou: “E tusi i te tusi: ‘A toku fale ka fakaigoa ki te fale e fai i ei a ‵talo, kae ko fai ne koutou mo fai se ana o tino kai‵soa.” 14  Ne olo atu foki a tino ‵kivi mo tino vae ma‵sei ki a ia i te faletapu kae ne faka‵lei ne ia latou. 15  I te laveaga ne faitaulaga pule mo failautusi a mea fakaofoofogia kolā ne fai ne ia, mo tama‵liki e paka‵laga i te faletapu penei: “E ‵talo matou, ke fakaola te Tama a Tavita!” ne ita ei latou, 16  kae fai atu ki a ia: “E lagona ne koe a pati a latou konei?” Ne fai atu a Iesu ki a latou: “Ao, e a, e seki fai‵tau koutou ki te mea tenei: ‘E takitaki ne koe a tama‵liki mo pepe ke tuku mai ne latou ou vikiga’?” 17  Ne tiaki ne ia latou kae fano ki Petania i tua o te fa‵kai, moe ei i konā i te po tenā. 18  I tena fokiatuga ki te fa‵kai i te taeao ‵malu, ne fiakai ei a ia. 19  Ne lavea ne ia te lakau ko te mati i tafa o te auala, fanatu ei ki ei. Ne iloa aka ne ia me e se fua kae na ko ana lau fua, fai atu ei tou tagata ki ei: “Ke se toe fua mai eiloa koe ke oko ki te se-gata-mai.” Ne magemage fakavave ei te mati. 20  I te laveaga ne soko a te mea tenei, ne ofo latou, olotou muna: “Ne magemage fakavave pefea te mati tenei?” 21  Ne tali atu a Iesu ki a latou: “Au e fai ‵tonu atu ki a koutou: Kafai e fakatuanaki koutou e aunoa mo te fakalotolotolua, ka se fai fua ne koutou te mea telā ne fai ne au ki te mati tenei, kae e mafai foki o fai atu koutou ki te mauga tenei, ‘Masagi ki luga kae tō ki te tai,’ ko te mea eiloa ko fai penā. 22  Kae ko mea katoa kolā e fakamolemole atu koutou ki ei e auala i te ‵talo ona ko te fakatuanaki, ka maua eiloa ne koutou.” 23  I tena uluatuga ki te faletapu, a koi akoako atu a ia i ei, kae olo atu a faitaulaga pule mo toeaina ki a ia, kae fai atu: “I o oi te malosi e fai ei ne koe a mea konei? Kae ko oi foki ne tuku atu ne ia te malosi tenā ki a koe?” 24  Ne tali atu a Iesu ki a latou: “E isi foki saku fesili ki a koutou. Kafai e tali mai ne koutou, ko fakaasi atu foki ne au me i o oi te malosi e fai ei ne au a mea konei: 25  Ne aumai i a ai te papatisoga a Ioane? Mai te lagi io me mai i tāgata?” Ne fakatau tītī olotou manatu i a latou eiloa, kae fai aka penei: “Kafai e fai atu tatou, ‘Mai te lagi,’ kae ka fai mai a ia, ‘Kaia la ne seki tali‵tonu ei koutou ki a ia?’ 26  Kae kafai e fai atu tatou, ‘Mai tāgata,’ e ma‵taku loa tatou i te vaitino, me e tali‵tonu latou i a Ioane se pelofeta.” 27  Tela la, ne tali atu latou ki a Iesu: “E se iloa ne matou.” Ne fai atu a Iesu ki a latou: “E se fakaasi atu foki ne au me ne mafua mai i fea te malosi e fai ei ne au a mea konei. 28  “Se a te otou faka‵tau? E isi se tagata e tokolua ana tama‵liki. Ne fanatu tou tagata ki te tamaliki muamua, ana muna, ‘Taku tama, fano o galue i te togavine i te aso nei.’ 29  Ne tali atu te tamaliki, ‘Tou ‵malu, au e fano,’ kae ne seki fano ei. 30  Ne fanatu a ia ki te tokolua, kae fai atu foki penā ki ei. Ne tali atu te tamaliki tenei, ‘Au sē fano.’ Fakamuli ifo, ne salamō tou tagata, fano ei o galue. 31  Ko oi la i a lāua konei ne fai ne ia te loto o tena tamana?” Ne fai atu latou: “Ko te tokolua.” Ne fai atu a Iesu ki a latou: “Au e fai ‵tonu atu ki a koutou me ka ‵mua o ulu atu a tino ao lafoga mo fafine talitagata ki te Malo o te Atua i lō koutou. 32  Me ne vau a Ioane o fakaasi atu te mea tonu ki a koutou, kae ne seki tali‵tonu koutou ki a ia. Kae ne tali‵tonu a tino ao lafoga mo fafine talitagata ki a ia, kae e pelā mo koutou, e tiga eiloa ne matea ne koutou a te mea tenei, ne seki sala‵mo koutou fakamuli ko te mea ke tali‵tonu koutou ki a ia. 33  “Faka‵logo mai ki te suā tala fakatusa tenei: E isi se tagata, se pule, ne ‵toki tena togavine. Ne ‵pui ne ia kae keli se lua mō se mea ‵tau uaina kae fakatu foki ne ia se taoa i ei. Ne lisi ne ia te togavine ki tino fai fatoaga, fano ei a ia ki se isi fenua. 34  I te okoga ki te ‵tau e tau ei a fuagā vine, uga atu ei ne ia ana pologa ki tino fai fatoaga ke puke mai ana fuagā vine. 35  Kae ne puke ne tino fai fatoaga ana pologa, e tokotasi ne ta ne latou, a ko te suā tino ne tamate ne latou, kae peipei ne latou te suā tino ki fatu. 36  Ne toe uga atu ne ia a nisi pologa e tokouke atu, kae ne fai foki ne latou a mea konā ki a latou. 37  I te fakaotiga eiloa, uga atu ei ne ia tena tama ki a latou, kae fai aka penei, ‘Ka āva eiloa latou ki taku tama.’ 38  I te laveaga ne latou a te tama, fai aka ei a pati a tino fai fatoaga, ‘Tenei eiloa tena sui; o‵mai ke tamate ne tatou a ia, ko puke ei ma tatou te fatoaga telā e ‵tau o maua ne ia!’ 39  Tenā la, puke ei ne latou a ia, ‵pei ki tua mo te togavine, kae tamate atu ei. 40  Tela la, kafai e fanatu te tagata i o ia te togavine, ne a mea ka fai ne ia ki tino fai fatoaga konā?” 41  Ne fai atu a latou ki a ia: “Ona ko latou ne tino matagā, ka avatu foki ne ia ki a latou se fakasalaga matagā, kae ka lisi ne ia te togavine ki nisi tino fai fatoaga, kolā ka avatu ne latou ki a ia ana fuagā vine i te taimi tonu.” 42  Ne fai atu a Iesu ki a latou: “E a, e seki fai‵tau ne koutou a pati konei i Tusitusiga Tapu: ‘A te fatu telā ne tiakina ne tufuga fai fale ko ia telā ko oti ne fai mo fai te fatu tulimanu tafasili i te aoga. Ne aumai eiloa te mea tenei mai i a Ieova, kae e fakaofoofogia ki a tatou’? 43  Tenei eiloa te pogai e fai atu ei au ki a koutou, A te Malo o te Atua ka tapale keatea mai i a koutou kae tuku atu ki se fenua telā e ‵fua mai i ei a fuataga ‵lei. 44  A ko te tino foki telā e siga ki luga i te fatu tenei e malukuluku valevale tena foitino. A ko te tino telā e siga ki luga i ei te fatu tenei ka palapala valevale tena foitino.” 45  I te lagonaga ne faitaulaga pule mo Falesaio ana tala fakatusa konei, iloa ei ne latou me ne faipati eiloa a ia e uiga ki a latou. 46  Kae e tiga eiloa te lotou ma‵nako ke puke fakapagota ne latou a ia, ne ma‵taku latou i te vaitino, me ne tali‵tonu latou i a Iesu se pelofeta.

Fakamatalaga mai lalo