Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Tusi Tapu i te Itaneti | NEW WORLD TRANSLATION (Ne `Lomi i te 1984)

Mataio 20:1-34

20  “Me i te Malo o te lagi e fakatusa ki se tagata, te pule o te togavine, telā ne alausu i te vaveao o ‵sala ne tino ke ga‵lue i tena togavine.  I te taimi ne lotomalie ei a ia fakatasi mo tino ga‵lue ke ‵togi latou ki se tenali e tasi i te aso, uga atu ei ne ia ki tena togavine.  Ne fanatu a ia i te tolu* o itula, kae ne lavea ne ia a nisi tino i te maketi kolā e seai ne olotou galuega.  Ne fai atu ei a ia ki a latou, ‘Olo foki koutou o ga‵lue i te togavine, kae ka ‵togi ne au koutou ki se ‵togi ‵lei.’  Ne olo ei latou. Ne toe fanatu foki a ia kāti i te ono* o itula mo te iva* o itula kae e penā foki te mea ne fai ne ia.  Ne toe fanatu foki a ia i te sefulutasi* o itula kae ne maua atu ne ia a nisi tino e takatu‵tu fua. Ana muna ki a latou, ‘Kaia e takatu‵tu ei koutou kae sē ga‵lue?’  Ne fai atu latou ki a ia, ‘Me e seai se tino e fakagalue ne ia matou.’ Ne fai atu tou tagata ki a latou, ‘Olo atu foki la koutou o ga‵lue i te togavine.’  “I te okoatuga ki te afiafi, fai atu ei te matai o te togavine ki te pule o te kau faigaluega, ‘Kalaga atu ki tino ga‵lue ke o‵mai o puke olotou peofuga, e kamata mai i a latou kolā ne ga‵lue fakamuli ke oko ki a latou kolā ne ga‵lue muamua.’  Ne o‵mai a tāgata kolā ne ga‵lue i te sefulutasi o itula, kae ne peofu latou ki tenali e taki tasi. 10  Kae i te oloatuga a tino kolā ne ga‵lue muamua, ne mafau‵fau latou me ka uke atu olotou mea e maua, kae ne ‵togi foki latou ki se tenali e tasi. 11  I te mauaga o olotou peofuga ne kamata ei o mui‵mui latou ki te pule o te togavine 12  kae fai atu, ‘E tasi fua te itula ne ga‵lue ei a latou konei fakamuli, kae e ‵pau eiloa olotou peofuga mo matou kolā ne fi‵ta i te ga‵luega i te aso kātoa mai lalo i te ‵vela o te la!’ 13  Kae i tena tali ki se tokotasi o latou, ne fai atu a ia, ‘Toku tagata, e seai soku ‵se. E a, ne seki lotomalie koe ke galue mō se tenali e tasi? 14  Puke tou peofuga kae fano. E manako au o tuku atu ki te tino tenei ne fakamuli a te ‵togi foki tenā ne maua ne koe. 15  E a, e tapu māfai e fai ne au a te mea e manako au ki ei i aku mea katoa? Io me e loto masei* fua koe ona ko au e ‵lei?’ 16  I te feitu la tenei, ko latou kolā ne ‵mua ka faka‵muli, a ko latou kolā ne faka‵muli ka ‵mua.” 17  I te lotou faiga o olo ki Ielusalema, ne faipati atu a Iesu ki ana soko e toko sefululua i a latou aka eiloa i te auala: 18  “Kiloke! A tatou e olo ki Ielusalema kae ka tuku atu a te Tama a te tagata ki te kau faitaulaga mo failautusi. Ka fakasala ne latou a ia ki te mate, 19  Kae ka tuku atu ne latou a ia ki tino o fenua fakaa‵tea ke fakatauemu kae fakasaua kae ‵tuki foki ki te lakau, kae ka toe fakatu aka a ia i te tolu o aso.” 20  Ne fanatu te mātua o tama a Sepetaio ki a ia fakatasi mo ana tama. Ne ifo tou fafine i ana mua kae fai atu tena fakamolemole ki a ia. 21  Ne fai atu a Iesu ki tou fafine: “Se a te mea e manako koe ki ei?” Ne fai atu tou fafine: “Fai mai aka sau pati ke ‵nofo aku tama e tokolua konei i ou feitu, e tokotasi i tou feitu fakaatamai kae tokotasi i tou feitu fakamaui i tou Malo.” 22  Ne tali atu a Iesu: “E se iloa ne koulua a te mea telā ne fakamolemole mai koulua ki ei. E a, e mafai ne koulua o inu a te ipu telā ko pili o inu ne au?” Ne tali atu lāua: “E mafai ne māua o inu ki ei.” 23  Ne fai atu a ia ki a lāua: “Ka inu eiloa a koulua i taku ipu, kae e seai saku pule ki te tino ka nofo i toku feitu fakaatamai mo toku feitu fakamaui, me i koga konei e ‵nofo fua i ei a tino kolā ko oti ne fakatoka ne toku Tamana mō latou.” 24  I te ‵logoga a nisi soko e tokosefulu i te mea tenei, ne ita latou ki te tautaina konei. 25  Kae ne kalaga atu a Iesu ke o‵mai latou ki a ia, ana muna: “E iloa ne koutou me i takitaki o malo e fai pelā me ne aliki ki luga i tino kae e pule fakasaua foki ne tāgata takutakua a latou. 26  A ko koutou e se ‵tau o fai penā, kae ko so se tino i a koutou e manako ke sili a ia, e ‵tau o fai mo fai te otou tavini, 27  a ko so se tino e fia muamua i a koutou e ‵tau o fai mo fai te otou pologa. 28  E pelā mo te Tama a te tagata, ne seki vau ke tavini mai a tino ki a ia, kae ke tavini atu ki tino kae tuku atu foki tena ola e pelā me se togiola mō tino e tokouke.” 29  I te lotou ologa keatea mai i Ieliko ne tau‵tali atu ei se vaitino e tokouke i a ia. 30  Kae i te ‵logoga a tāgata ‵kivi e tokolua kolā e saga‵saga i tafa o te auala i a Iesu e sasale atu i lā tafa, ka‵laga atu ei lāua, penei: “Te Aliki, te Tama a Tavita, ke alofa mai koe ki a māua!” 31  Ne ‵liko atu te vaitino ki a lāua ke se uā; kae ne gasolo o paka‵laga malosi eiloa lāua, kae fai atu: “Te Aliki, te Tama a Tavita, ke alofa mai koe ki a māua!” 32  Ne tu a Iesu, kalaga atu ki a lāua kae fai atu: “Se a te mea e ma‵nako koulua ke fai ne au mō koulua?” 33  Ne tali atu lāua: “Te Aliki, fai aka ke ‵kite mā mata.” 34  Ona ko tena alofa, ne fakapatele atu a Iesu ki lā mata, i konā foki eiloa ‵kite lā mata, tau‵tali atu ei i a ia.

Fakamatalaga mai lalo

 “Te tolu o itula” e ‵pau mo te itula e 9 i te taeao.
 “Te ono o itula” e ‵pau mo te itula e 12 i te tutonu.
 “Te iva o itula” e ‵pau mo te itula e 3 i te fakaafiafi.
 “Te sefulutasi o itula” e ‵pau mo te itula e 5 i te afiafi.
 I te ‵gana Eleni, “ou mata e kilo faeloa ki mea ma‵sei?”