Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Tusi Tapu i te Itaneti | NEW WORLD TRANSLATION (Ne `Lomi i te 1984)

Mataio 2:1-23

2  Mai tua o te fanauga o Iesu i Peteleema i Iuta, i aso o Helota te tupu, ne olo atu ei ki Ielusalema a tino iloilo fetū* mai te Saegala,  kae fai atu: “Tefea te tupu o Iutaia telā ko oti ne fanau mai? Me ne lavea ne matou tena fetū a koi ‵nofo atu matou i te feitu ki te Saegala, kae ko o‵mai nei matou o ifo ki a ia.”  I te lagonaga ne te tupu ko Helota a te mea tenei, ne manavase valevale a ia e pelā foki mo tino katoa i Ielusalema.  Ne fakamaopoopo ne ia a faitaulaga ‵sili fakatasi mo failautusi kae fesili atu me tefea te koga e ‵tau o fanau i ei te Keliso.  Ne fai atu latou ki a ia: “I Peteleema i Iuta, me konei a pati ne tusi e auala i te pelofeta:  ‘A ko koe e Peteleema i te fenua o Iuta, e se ko koe te ‵toe fa‵kai fatauva i tino pule o Iuta, me ka vau mai i a koe se takitaki telā ka tausi ne ia oku tino Isalaelu.’”  Ne ‵kami ‵funa ne Helota a tino iloilo fetū konā kae ne fakamautinoa mai i a latou te taimi ne sae aka ei te fetū tenā.  I te taimi ne uga atu ei ne ia latou ke olo ki Peteleema, ne fai atu a ia penei: “Olo o salasala faka‵lei te tamaliki, kae kafai ko maua ne koutou fakailoa mai ki a au ko te mea ke fano foki au o ifo ki a ia.”  I te otiga ne lagona ne latou a pati a te tupu, olo ei latou, kae kiloke! a te fetū telā ne matea ne latou a koi ‵nofo atu latou i te Saegala e fano i olotou mua, kae ne tu tonu eiloa i luga i te fale telā e nofo ei te tamaliki. 10  I te mateaga ne latou a te fetū ne fia‵fia malosi eiloa latou. 11  Kae i te taimi ne ulu atu ei latou ki loto i te fale ne matea ne latou te tamaliki mo Malia tena mātua, kae to‵tuli o ifo atu ki a ia. Ne ‵tala foki olotou koloa tāua kae tuku atu a meaalofa, ko aulo mo pulu lipano mo pulu mulo. 12  Kae ona ko te fakatonuga a te Atua e auala i se moemiti ke mo a ma toe ‵foki ki a Helota, ne ‵foki ei latou ki te lotou fenua i se isi auala. 13  I te lotou ologa keatea ne fakasae atu te agelu a Ieova i se moemiti ki a Iosefa, ana muna: “Tu ki luga, puke te tamaliki mo tena mātua kae ‵tele ki Aikupito kae ‵nofo eiloa i konā ke oko ki te taimi e toe fai atu ei au ke toe ‵foki koutou, me i a Helota ko pili o ‵sala atu ke tamate ne ia te tamaliki.” 14  Tela la, ne tu aka tou tagata puke te tamaliki mo tena mātua kae ‵sola atu ki Aikupito i te po. 15  Ne nofo eiloa a ia i konā ke oko ki te taimi ne mate ei a Helota. Ne fakataunu i ei a pati a Ieova e auala i tena pelofeta, ana muna: “Ne kalaga ne au taku tamaliki tagata ke vau mai Aikupito.” 16  I te iloaga ne Helota me ko oti ne fakaloiloi a ia ne tino iloilo fetū konā, ne kaitaua masei tou tagata kae ne fakatonu atu ke tamate a tama‵liki tāgata katoa i Peteleema mo kogā koga i ana tafa, mai te lua tausaga o fano ki lalo e ‵tusa mo te taimi telā ne fakamautinoa aka ne ia mai i tino iloilo fetū. 17  Ne fakataunu ei i konā a pati kolā ne fai mai e auala i te pelofeta ko Ielemia, ana muna: 18  “E isi se leo ne lagona atu i Lama, e tagi lotulotu kae tagi mautuutu. Ko tagi a Lasela ona ko ana tama‵liki, kae e se talia ne ia se fakamafanafanaga, me ko ‵galo atu latou.” 19  I te matega a Helota, ne fakasae atu te agelu a Ieova ki a Iosefa i Aikupito i se moemiti, 20  kae fai atu: “Tu ki luga, puke te tamaliki mo tena mātua kae olo ki te fenua o Isalaelu, me ko oti ne ‵mate a latou kolā ne salasala ke tamate te tamaliki.” 21  Tela la, ne tu a ia ki luga, puke te tamaliki mo tena mātua kae olo atu ki te fenua o Isalaelu. 22  Kae i tena logoga me ko pule a Alekilao e pelā me ko te tupu i Iuta i lō tena tamana ko Helota, ne mataku tou tagata ma ‵nofo latou i konā. E se gata i ei, ona ko te fakatonuga a te Atua e auala i se moemiti ne olo ei latou ki Kalilaia. 23  Ne ‵nofo ei latou i te fa‵kai ko Nasaleta, ko te mea ke fakataunu a pati ne fai e auala i pelofeta: “Ka taku a ia se tino Nasaleta.”

Fakamatalaga mai lalo

 Io me ko “tino fakataulaitu ki fetu.”