Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Tusi Tapu i te Itaneti | NEW WORLD TRANSLATION (Ne `Lomi i te 1984)

Mataio 17:1-27

17  I te ono o aso mai tua ifo, puke ei ne Iesu a Petelu, Iakopo mo Ioane, tena taina, kae olo aka ki luga i se mauga maluga ‵ki.  Ne ‵fuli ei ana foliga i mua o latou, kae ne ‵pula mai ana mata e pelā mo te la, a ko ana gatu ne ‵kena pakipaki e pelā mo te mainaga.  Kae ne lavea atu ne latou a Mose mo Elia e sau‵tala fakatasi mo ia.  Ne fai atu a Petelu ki a Iesu: “Te Aliki, ko ‵lei aka eiloa ke ‵nofo matou i konei. Kafai e ‵lei ki a koe, ka faka‵tu ne au i konei a faleie e tolu, e tasi mō koe, e tasi mō Mose, kae e tasi mō Elia.”  A koi faipati a ia kae ne fanaifo se kaumana ‵kena ki luga i a latou, kae faipati mai se leo i loto i ei penei: “Tenei eiloa taku Tama, ko taku fagasele telā ko oti ne talia ne au; faka‵logo ki a ia.”  I te lagonaga ne soko a te mea tenei, faka‵siga ifo ei latou ki lalo me ko oko eiloa i te lotou ma‵taku.  Ne fanatu a Iesu, fakapatele atu ki a latou, kae fai atu: “‵Tu ki luga kae sa ma‵taku.”  I te lotou ‵kiloakaga ki luga, e seai se tino e lavea atu ne latou kae na ko Iesu fua.  I te lotou oloifoga mai te mauga, ne fakatonu atu a Iesu ki a latou, ana muna: “Ke mo a e fakailoa atu te fakaasiga tenei ki se isi tino ke oko eiloa ki te taimi e toe fakatu aka ei te Tama a te tagata mai te mate.” 10  Ne fesili atu ana soko ki a ia: “Kaia e fai mai ei a failautusi me e ‵tau o vau muamua a Elia?” 11  Ne tali atu a ia: “A Elia e vau eiloa, kae ka toe faka‵tonu ne ia a mea katoa. 12  Kae e fai atu au ki a koutou i a Elia ko leva ne vau kae ne seki lavea ne latou a ia kae ne fai fua ne latou ki a ia a mea kolā ne ma‵nako latou ki ei. Tenei foki te mea ka fai ne latou ki te Tama a te tagata, ka fakapuapuagatia ne latou. 13  Ne fatoa iloa ei ne ana soko i a ia ne faipati e uiga ki a Ioane te Papatiso. 14  I te lotou okoatuga ki te vaitino, ne fanatu se tagata, totuli ifo ki lalo, kae fai atu ki a ia: 15  “Te Aliki, a koe ke alofa ki taku tama, a ia e masaki kae pole sale, me e siga sale ki luga i te afi e pelā foki mo te vai, 16  ne ave ne au a ia ki ou soko, kae seki mafai ne latou o faka‵lei tena masaki.” 17  Ne tali atu a Iesu: “Te kautama sē fakatuanaki kae fai mea piko‵piko tenei, ka pefea te leva e fesoasoani atu ei au ki a koutou? Ka pefea te leva e fa‵ki ei au i a koutou? Aumai ki a au te tamaliki tenā.” 18  Ne ‵liko atu a Iesu ki te temoni fano ei keatea, kae ne ‵lei ei te tamaliki i te taimi eiloa tenā. 19  Ne olo atu ana soko ki a Iesu, ko latou aka eiloa kae fai atu: “Kaia ne seki mafai ei ne matou o afuli te temoni tenā?” 20  Ne fai atu a ia ki a latou: “Ona ko te foliki o te otou fakatuanaki. Au e fai ‵tonu atu ki a koutou: Kafai te otou fakatuanaki e pelā mo te lasi o te fuaga o te sinapi, e fai atu koutou ki te mauga tenei, ‘Masiki mai i konei ki te koga telā,’ ko te mea eiloa ko fai penā, kae ka seai eiloa se mea e se mafai ne koutou o fai. 21*  —— 22  I te lotou maopoopoga i Kalilaia, fai atu ei a Iesu ki a latou: “E ‵tau o tuku atu te Tama a te tagata ki lima o tāgata faitogafiti, 23  kae ka tamate ne latou a ia, kae ka toe fakatu aka a ia i te tolu o aso.” Ne fanoa‵noa malosi latou ona ko te mea tenā. 24  I te lotou okoatuga ki Kapanaumi, ne olo atu ei te tokolua tāgata o ‵tae lafoga* ki te faletapu kae fesili atu ki a Petelu: “E a, e ‵togi ne te otou faiakoga a te lafoga e taki lua tupe siliva?” 25  Ne tali atu a Petelu: “Ao.” Kae i tena uluatuga ki loto i te fale, a ko leva ne iloa ne Iesu a te mea tenā, fesili atu ei a ia: “Simona, se a tau faka‵tau, ko oi a tino e ‵togi ne latou a tiute io me ko lafoga foitino ki tupu o te lalolagi? Ko olotou tama io me ko tino fakaa‵tea?” 26  Ne fai atu a Petelu: “Ko tino fakaa‵tea.” Ne fai atu ei a Iesu ki a ia: “Tela la, a tama a te tupu e se ‵togi lafoga. 27  Kae ko te mea ke se fakaitaita atu tatou ki a lāua, fano o ‵lafo atu se kafilo ki te tai, a ko te ika muamua telā e lave, fakamaga tena gutu, kae ka maua ne koe i ei se tupe siliva, ko ave ei ne koe ki a lāua mō tāua tokolua.”

Fakamatalaga mai lalo

 E maua a te fuaiupu tenei i nisi ‵fuliga o te Tusi Tapu, kae e se maua i te Tusi Tapu Eleni a Westcott mo Hort, telā e tai ‵pau eiloa tena ‵fuliga mo tusitusiga mua i te ‵gana Eleni.
 Te lafoga o te tino Iutaia e tokotasi i te tausaga telā kāti ko te peofuga o te tino i aso e lua.