Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Tusi Tapu i te Itaneti | NEW WORLD TRANSLATION (Ne `Lomi i te 1984)

Mataio 14:1-36

14  Ko te taimi eiloa tenā ne logo ei a Helota, te pule o te kogā fenua tenā, i te tala e uiga ki a Iesu.  Kae ne fai atu a ia ki ana tavini: “A te tino tenei ko Ioane te Papatiso. Ko oti ne fakatu aka a ia mai te mate, kae tenā eiloa te pogai e fai ei ne ia a galuega ‵mana konā.”  Me ko oti ne puke fakapagota ne Helota a Ioane, saisai, kae ‵pei atu ki te falepuipui ona ko Helotia, te avaga a tena taina ko Filipo.  Me ko oti ne fai sāle atu a Ioane ki a Helota: “E se talia i te tulafono ke fai a ia mo fai tau avaga.”  Kae e tiga eiloa ne manako a Helota ke tamate ne ia a Ioane, ne mataku loa a ia i te vaitino me ne tali‵tonu latou i a Ioane se pelofeta.  Kae i te fakamanatuga o te aso fanau o Helota, ne saka ei i konā a te tama fafine a Helotia kae ne fiafia malosi i ei a Helota.  Ne tauto atu a Helota ke tuku atu ki tou fafine so se mea telā e manako a ia ki ei.  Kae ona ko te fakamalosiga a tena mātua, fai atu ei a tou fafine: “Aumai nei eiloa ki a au a te ulu o Ioane te Papatiso i luga i se telē.”  E tiga eiloa ne fanoanoa a Helota i ei, ne fakatonu atu eiloa a ia ke fai te mea tenā ona ko tena tautoga ko oti ne fai i mua o tino ‵kami. 10  Ne uga atu ei ne ia se tino ke ‵kati te ua o Ioane i te falepuipui. 11  Kae ne aumai tena ulu i luga i se telē, tuku atu ki te tamafine, a ko te tamafine ki tena mātua. 12  Oti aka loa, o‵mai ei ana soko, puke tena foitino, kae ave o tanu, olo atu ei latou o fakailoa ki a Iesu. 13  I te lagonaga ne Iesu a te mea tenei, fano ei a ia i te poti ke ‵mao atu keatea mai i a latou. Kae i te lagonaga ne te vaitino i fa‵kai konā me ko fano a ia, tau‵tali atu ei latou i a ia. 14  I tena fanakaga ki uta, lavea ei ne Iesu se vaitino e tokouke. Ne alofa malosi a ia ki a latou, faka‵lei ei ne ia olotou tino ma‵saki. 15  I te okoga ki te afiafi, olo atu ei ana soko kae fai atu ki a ia: “A te koga tenei e ‵mao ‵ki kae ko pili o po; ke na uga atu te vaitino ke olo ki fa‵kai ko te mea ke mafai o ‵togi ne olotou meakai i ei.” 16  Kae ne fai atu a Iesu ki a latou: “E se ‵tau o olo latou; tuku atu ne koutou ne meakai ke ‵kai ei latou.” 17  Ne fai atu latou ki a ia: “E seai ne motou meakai i konei kae na ko falaoa fua e lima mo ika e lua.” 18  Ana muna: “Aumai a mea konā ki a au.” 19  Ne fakatonu atu a ia ki te vaitino ke saga‵saga ki lalo i mouku. Ne puke ne ia a falaoa e lima mo ika e lua, kilo aka ki te lagi o fai te fakafetai, tofitofi ei ne ia a falaoa kae tufa atu ki ana soko, a ko ana soko ki te vaitino. 20  Tela la, ne ‵kai kae ma‵kona a tino katoa, a ko meakai kolā ne ‵toe ne faka‵fonu ki ei a tapola e sefulu lua. 21  A ko tino kolā ne ‵kai e nofo pelā ki se 5,000 tagata, kae e se lau i ei a fafine mo tama‵liki. 22  Ne fakatonu fakavave atu a ia ki ana soko ke ‵sopo ki te poti kae ke ‵mua atu latou ki te suā feitu, ko te mea ke uga atu mua ne ia te vaitino ke olo. 23  Fakamuli ifo, i te ologa o te vaitino, ne fanaka ei a ia ki luga i te mauga o ‵talo i ei. Ko leva te po, kae ne nofo tokotasi eiloa a ia i konā. 24  I te taimi tenei, a te poti ko ‵mao ‵ki mai te fenua kae ko logo‵fio eiloa ne tuki ne peau ‵fati me e ‵pono tonu mai eiloa te matagi i olotou mua. 25  I te taeao ‵malu,* sasale atu ei a ia i luga i te vai i tena auala ki a latou. 26  I te laveaga ne ana soko i a ia e sasale i luga i te vai, ne ma‵taku latou, kae fai aka: “Tapa! A te mea tenei se aitu!” Kae ne paka‵laga latou i te lotou ma‵taku. 27  Ne faipati fakavave atu a Iesu ki a latou: “Ke loto ‵toa koutou! Ko au fua tenei; sa ma‵taku.” 28  Ne tali atu a Petelu ki a ia: “Te Aliki, kafai ko koe eiloa tenā, fakatonu mai ke fanatu au ki a koe i luga i te vai.” 29  Ana muna: “Vau la!” Tenā sopo ifo ei a Petelu mai te poti kae sasale atu ki a Iesu i luga i te vai. 30  Kae i tena kiloatuga ki te kaumatagi, mataku ei a ia, kae i tena kamataga o pulu, kalaga atu ei tou tagata: “Te Aliki, fakasao aka au!” 31  Ne ‵kapa fakavave atu te lima o Iesu, puke ki a ia kae fai atu: “Ko oko eiloa te foliki o tou fakatuanaki, kaia ne fakalotolotolua ei koe?” 32  I te lā otiga ne ‵sopo ki te poti, malū ei te kaumatagi. 33  Ne ifo atu a latou kolā i te poti ki a ia, olotou muna: “Ko koe eiloa ko te Tama a te Atua.” 34  Ne faima‵laga atu ei latou ki te fenua ko Kenesaleta. 35  I te laveaga ne tino i konā a ia, fakailoa atu ei ne latou ki tino i te fenua kātoa tenā, kae ne avatu ne tino i konā a tino ma‵saki katoa ki a ia. 36  Kae ne fakamolemole atu latou ki a ia ke fakapa‵tele fua latou ki te kapa o tena gatu, kae ko tino katoa kolā ne fakapa‵tele ki ei ne ‵lei katoa latou.

Fakamatalaga mai lalo

 Ko tena uiga ko te ‵tuga i te fa.