Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Tusi Tapu i te Itaneti | NEW WORLD TRANSLATION (Ne `Lomi i te 1984)

Mataio 13:1-58

13  I te tiakinaga ne Iesu a te fale i te aso tenā, ne sagasaga ei a ia i te tafatai,  kae ne olo atu ki a ia se vaitino e tokouke, sopo ei a ia ki te poti, sagasaga ki lalo, kae ne ‵tu atu a tino katoa i te tafatai.  Kae ne fai atu ne ia ki a latou a mea e uke e auala i tala fakatusa, ana muna: “E isi se tino ‵toki lakau ne fano o ‵toki a fuaga.  I te taimi ne ‵toki ei ana fuaga, ne ta‵tela atu a nisi fuaga i tafa o te auala. Ne o‵mai a manu eva, kai ei ne latou.  Ne ‵to atu a nisi fuaga ki koga fatufatua kolā e se uke a one i ei, kae ne ‵somo fakavave aka a fuaga konā ona ko te manifi o te one.  Kae i te ‵kasamaiga o te la, velasia ei latou, kae ona ko te mea e seai ne olotou aka ne ‵mate ei latou.  Ne ‵to atu foki a nisi fuaga i va o lakau makai‵kai kolā ne ola aka, ola sai‵tia ei a fuaga konā.  A ko nisi fuaga ne ‵to atu ki luga i te laukele ola ‵lei kae ne kamata o ‵fua mai, i taki selau, taki onosefulu, mo te taki tolusefulu.  A te tino telā e isi ne ana taliga ke na fakalogo la ki ei.” 10  Ne olo atu ana soko kae fai atu ki a ia: “Kaia e faipati ei koe ki a latou e auala i tala fakatusa?” 11  Ne tali atu a ia: “Ko oti ne talia ke malamalama koutou i mea ‵funa kae tapu o te Malo o te lagi, kae e se ko tino konā. 12  Me ko so se tino telā e isi ne ana mea ka toe tuku atu ki ei a nisi mea, ko te mea ke uke ana mea, kae ko te tino telā e seai ne ana mea ka tapale foki mai i a ia a nai mea kolā ne maua ne ia. 13  Tenei te pogai e faipati ei au ki a latou e auala i tala fakatusa, me e ‵kilo atu fua, kae e se lavea ne latou, e fakalogo‵logo kae e se lagona ne latou, e se iloa foki ne latou te uiga o mea konā. 14  Ko latou konā e fakataunu ki ei a te valoaga a Isaia, ana muna: ‘Ka lagona ne koutou kae e se iloa ne koutou tena uiga, ka ‵kilo atu koutou, kae ka se lavea ne koutou. 15  Me ko oti ne gasolo o ma‵keke a loto o tino konei, ko oti ne lagona ne latou ki olotou taliga e aunoa mo te ‵saga atu ki ei, kae ko oti ne ‵moe olotou mata, ko te mea ke se lavea ne latou. E lagona ne latou, kae e se iloa ne latou tena uiga, ko te mea ke toe ‵fuli mai ko faka‵lei ei ne au a latou.’ 16  “Kae e fia‵fia otou mata me e lavea ne koutou, a ko otou taliga me e lagona ne koutou. 17  Me e fai ‵tonu atu au ki a koutou: E tokouke a pelofeta mo tino amio‵tonu ne fia lavea ne latou a mea kolā ko lavea ne koutou, kae seki lavea ne latou kae ke lagona foki ne latou a mea kolā ko lagona ne koutou, kae seki lagona ne latou. 18  “Tela la, faka‵logo mai ki te tala fakatusa e uiga ki te tagata ‵toki fuaga. 19  Kafai e lagona ne se tino a te muna e uiga ki te Malo kae e se iloa ne ia a tena uiga, e vau a te tino masei, ave ei ne ia keatea a mea kolā ne ‵toki i tena loto; tenei eiloa te fuaga telā ne ‵toki i tafa o te auala. 20  A ko te fuaga telā ne ‵toki i koga fatufatua, tenei eiloa te tino telā ne lagona ne ia te muna kae ne talia fakavave ne ia mo te fiafia. 21  Kae e seai ne ana aka ne ‵lave ki lalo. Ne ola aka te tino tenā i se taimi toetoe, kae i te okomaiga o fakalavelave mo fakasauaga ona ko te muna, ne pakū fakavave ei a ia. 22  A ko te fuaga telā ne ‵toki i va o lakau makai‵kai, tenei eiloa te tino telā ne lagona ne ia te muna kae ne ola sai‵tia te muna tenā i loto i a ia ona ko te manavase ki mea o te olaga tenei mo te ‵gali fakaloi‵loi o koloa, telā ko seai ei ne ana fuataga. 23  A ko te fuaga telā ne ‵toki i luga i te laukele ola ‵lei, tenei eiloa te tino telā ne lagona ne ia te muna, kae ne iloa ne ia tena uiga, ko ia telā e fua mai i taki selau, taki onosefulu, mo taki tolusefulu.” 24  Ne fai atu ne ia ki a latou a te suā tala fakatusa, ana muna: “A te Malo o te lagi e pelā me se tagata telā ne ‵toki ne ia a fuaga ‵lei i tena fatoaga. 25  I te taimi ne ‵moe ei a tino i te po, ne fanatu tena fili, ‵toki ne ia a mouku i va o saito, fano ei keatea. 26  I te taimi ne ola aka ei a lakau kae ‵fua mai, ne ola aka foki a mouku. 27  Tela la, ne olo atu a pologa a te pule o te fatoaga kae fai atu ki a ia, ‘Te Matai, e se ko fuaga ‵lei fua kolā ne ‵toki ne koe i te fatoaga? Kae ne ola aka pefea a mouku i ei?’ 28  Ne fai atu a ia ki a latou, ‘Ko te fili, se tagata ne fai ne ia te mea tenei.’ Olotou muna ki a ia, ‘E manako la koe ke olo matou o unu kea‵tea a mouku?’ 29  Ana muna, ‘Ikai, me kafai e unu ne koutou a mouku, ka unu foki ne koutou mo saito. 30  Tuku ke ola fakatasi aka latou ke oko ki te taimi e ‵kati ei a saito, kae i te ‵tau e ‵kati ei a saito; ko fai atu ei au ki tino ‵kati saito: Unu muamua aka a mouku, saisai ko ‵sunu atu ei, ka oti ko ‵luku mai ei a saito ki loto i toku fale saito.’” 31  Ne fai atu ne ia ki a latou te suā tala fakatusa, ana muna: “A te Malo o te lagi e pelā me se fuaga o te sinapi, telā ne ‵toki ne se tagata i tena fatoaga. 32  A te fuaga tenā ko te ‵toe fuaga foliki eiloa i fuaga katoa, kae kafai e ola aka, ko fai ei mo fai te ‵toe lakau lasi eiloa i lakau katoa. E olo atu a manu eva o te lagi o fai olotou ofaga i ana kaula.” 33  Ne toe fai atu foki ne ia a te suā tala fakatusa: “A te Malo o te lagi e fai pelā me ne mu mea faka‵fete, kolā ne ‵funa* ne se fafine i loto i palugā falaoa ‵lasi e tolu* ke oko ki te taimi ne ‵fete ei a te paluga kātoa.” 34  Ne fai atu ne Iesu a mea katoa konei ki te vaitino e auala i tala fakatusa. E tonu, e se mafai o faipati atu a ia ki a latou e aunoa mo se tala fakatusa, 35  ko te mea ke mafai o fakataunu a pati konei a te pelofeta: “Ka faipati atu au e auala i tala fakatusa. Ka fakasalalau ne au a mea kolā ne ‵funa talu mai te kamataga.” 36  I te otiga ne olo te vaitino, fanatu ei a ia ki loto i te fale. Kae ne olo atu ana soko ki a ia kae fai atu, penei: “Fakamatala mai ki a matou te tala fakatusa e uiga ki mouku i te fatoaga.” 37  Ne tali atu a ia penei: “A te tino ‵toki lakau telā ne ‵toki ne ia a fuaga ‵lei ko te Tama a te tagata; 38  a te fatoaga ko te lalolagi. A ko fuaga ‵lei ko fanau o te Malo; a ko mouku ko fanau a te tino masei, 39  a ko te fili telā ne ‵toki ne ia latou ko te Tiapolo. A te ‵katiga o saito ko te vaitaimi o te gataga o te olaga tenei, a ko tino ‵kati saito ko agelu. 40  Tela la, e pelā eiloa mo mouku kolā ka unu kae ‵sunu ki te afi, e penā foki te mea ka fai i te vaitaimi o te gataga o te olaga tenei. 41  Ka uga atu ne te Tama a te tagata ana agelu, kae ka unu kea‵tea ne latou mai tena malo a mea katoa kolā e fakavāi‵vai ne latou a tino e pelā foki mo tino solitulafono, 42  kae ka ‵pei ne latou ki loto i te afi ‵ka ulaula. Tenā eiloa te koga ka ‵tagi mautuutu kae fai olotou lili i ei. 43  I te taimi tenā, ka maina mai i ei a tino amio‵tonu e pelā mo te la i te Malo o te lotou Tamana. A te tino telā e isi ne ana taliga ke na fakalogo la ki ei. 44  “A te Malo o te lagi e pelā me se koloa e ‵funa i te laukele kae telā ne maua ne se tagata, kae ne toe ‵funa ei ne ia, kae ona ko tena fiafia, fano ei o fakatau atu ana mea katoa kae ‵togi ne ia te laukele tenā. 45  “E se gata i ei, a te Malo o te lagi e pelā me se tino faipisinisi faimalaga telā e salasala ki penina ‵gali. 46  I te mauaga ne ia se penina ‵togi ‵mafa, fano ei o fakatau fakavave atu ana mea katoa kae ‵togi ne ia te penina tenā. 47  “E se gata i ei, a te Malo o te lagi e pelā me se tili telā ne ‵pei ki te tai kae ne ‵tu i ei a ika valevale. 48  I te taimi ne ‵fonu ei te tili, ‵futi aka ei ne latou ki te tafatai, saga‵saga ki lalo kae ‵fao ne latou a ika ‵lei ki loto i tapola, a ko ika ma‵sei ne ‵pei keatea. 49  Tenā eiloa te mea ka fai i te vaitaimi o te gataga o te olaga tenei: Ka olo atu a agelu kae ‵vae keatea ne latou a tino amio ma‵sei mai tino amio ‵lei 50  kae ka ‵pei atu latou ki loto i te afi ‵ka ulaula. Tenā eiloa te koga ka ‵tagi mautuutu kae fai olotou lili i ei. 51  “E a, e iloa ne koutou te uiga o mea katoa konei?” Ne fai atu latou ki a ia: “Ao.” 52  Fai atu ei a ia ki a latou: “Ona ko te mea tenā, kafai e akoako atu ne se faiakoga a mea e uiga ki te Malo o te lagi, ko fai ei a ia e pelā me se pule o te kāiga telā e aumai ne ia mai tena fale koloa a mea ‵fou mo mea mua.” 53  I te otiga o tala fakatusa a Iesu, tiaki ei ne ia a te koga tenā. 54  Kae i tena okoatuga ki tena fenua, kamata ei o akoako atu ki a latou i loto i olotou sunako. Ne ofo masei latou kae fai aka penei: “Ne maua i fea ne te tagata tenei a te poto mo galuega ‵mana konei? 55  E se ko ia tenei te tama a te kamuta? E se ko tena mātua ko Malia, a ko ana taina ko Iakopo mo Iosefa mo Simona mo Iuta? 56  E se ko ana tuagane katoa konei e ‵nofo mo tatou? Tela la, tefea te koga ne maua ei ne te tagata tenei a mea katoa konei?” 57  Ne ‵teke atu ei latou ki a ia. Kae ne fai atu a Iesu ki a latou: “A te pelofeta e ‵malu i koga katoa kae na ko tena fenua tonu mo tena kāiga tonu.” 58  Kae ne seki toe fai ne ia a galuega ‵mana e uke i konā ona ko te sē lava o te lotou fakatuanaki.

Fakamatalaga mai lalo

 Io me “ne palu fakatasi.”
 Io me “kāti e 20 pauna te ‵mafa.”