Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Tusi Tapu i te Itaneti | NEW WORLD TRANSLATION (Ne `Lomi i te 1984)

Mataio 12:1-50

12  I te taimi tenā, ne olo atu ei a Iesu mo ana soko i loto i te fatoaga saito i te Sapati. Ne fia‵kai ana soko, tau ei ne latou a saito o kai.  I te laveaga ne Falesaio a te mea tenei, fai atu ei latou ki a ia: “Kilo atu! ko fai ne ou soko a te mea telā e tapu i te Sapati.”  Ne fai atu a ia ki a latou: “E a, e seki fai‵tau ne koutou a mea ne fai ne Tavita mo ana tāgata i te taimi ne fia‵kai ei latou,  i te taimi ne ulu ei a ia ki loto i te fale o te Atua kae kai ne latou a falaoa kolā ko oti ne ofo atu ki te Atua, se mea telā e se ‵tau o kai a ia ki ei mai lalo i te tulafono, e pelā foki mo ana tāgata, kae na ko faitaulaga fua?  Io me e seki fai‵tau koutou ki te Tulafono o te Sapati telā e fai mai me e se faka‵malu ne faitaulaga i te faletapu a te Sapati kae e se agasala latou?  Kae e fai atu au ki a koutou me e isi se tino i konei telā e sili atu i te faletapu.  Kae moi iloa ne koutou a te uiga o te mea tenei, ‘E tāua atu ki a au te loto fakamagalo, kae e se ko taulaga,’ penei e se taku fakamasei ne koutou a tino e se ‵tau o fakasala.  Me i te Tama a te tagata ko te Aliki o te Sapati.”  I te tiakinaga ne ia a te koga tenā, fanatu ei a ia ki loto i te lotou sunako, 10  kae ne lavea ne ia i konā se tagata e ‵mate tena lima. Fesili atu ei latou ki a ia, “E mata, e talia i te tulafono ke faka‵lei a masaki i te Sapati?” me ne ‵sala latou ki se mea ke ‵losi atu ei ki a ia. 11  Ne fai atu a ia ki a latou: “E a, e isi se tino i a koutou e tasi fua tena mamoe, kae kafai e to ki loto i se lua i te Sapati, e se puke aka ne ia ki luga? 12  I te feitu la tenei, e sili fakafia atu te tāua o te tino i lō te mamoe! Tela la, e talia i te tulafono ke fai a mea ‵lei i te Sapati.” 13  Fai atu ei a ia ki te tino tenā: “‵Fola mai tou lima.” Kae ne ‵fola atu ne ia tena lima, ko te mea eiloa ko ‵lei e pelā mo tena suā lima. 14  Ne olo ei a Falesaio ki tua kae ne fono e uiga ki a ia ko te mea ke mafai o tamate ne latou a ia. 15  Ne iloa ne Iesu te mea tenā, fano ei a ia keatea. Ne tau‵tali atu foki i a ia a tino e tokouke, kae ne faka‵lei ne ia a latou katoa. 16  Ne fakatonu malosi atu a ia ki a latou ke se fakaasi atu a mea kolā ne fai ne ia; 17  ko te mea ke mafai o fakataunu a pati kolā ne fai e auala i te pelofeta ko Isaia, ana muna: 18  “Kiloke! Tenei taku tavini telā ne filifili ne au, ko taku fagasele, telā ne talia ne au! Ka tuku ne au ki luga i a ia toku agaga kae ka fakamaina ne ia ki fenua katoa a te uiga o te fai mea tonu. 19  E se kinau a ia, io me pakalaga, io me e se lagona ne se tino tena leo i auala. 20  E se lakalaka ne ia se mouku telā ko magemage, e se tamate foki ne ia se moli telā ka fai o mate ke oko eiloa ki te taimi e fai ei ne ia ke manumalo a te fai mea tonu. 21  E tonu, ka fakamoe‵moe a tino katoa ki tena igoa.” 22  Ne avatu ei ne latou ki a ia se tagata e pukea ne se temoni, e ‵kivi kae gūgū kae ne faka‵lei ne ia, telā faipati ei kae ile a te tagata tenā. 23  Ne ofo masei a te vaitino kae fai aka olotou pati, penei: “E mata, e se ko ia tenei te Tama a Tavita?” 24  I te lagonaga ne Falesaio a te mea tenei, fai atu ei latou: “E afuli fua ne te tino tenei a temoni e auala i a Pelesepulo, ko te pule o temoni.” 25  Ne iloa ne Iesu olotou mafaufauga, fai atu ei ki a latou: “A malo katoa kolā e mavae‵vae e malepe‵lepe kae ko fa‵kai io me ko kāiga kolā e mavae‵vae e se mafai o tumau. 26  E penā foki eiloa a Satani, kafai e afuli ne ia a ia eiloa, ko tena uiga ko taua atu a ia ki a ia eiloa. E mafai la pefea o tumau tena malo? 27  E se gata i ei, kafai e afuli ne au a temoni e auala i a Pelesepulo, i o oi la te igoa ne afuli i ei ne otou tino a temoni? Tenā eiloa te pogai ka fai ei latou mo fai a famasino ki a koutou. 28  Kae kafai e afuli ne au a temoni e auala i te agaga o te Atua, ko tena uiga ko oti ne oko mai te Malo o te Atua kae e se iloa ne koutou. 29  Io me e mafai pefea o pukemālō ne se tino a kope o se tagata mafi i tena fale, vagana ke saisai muamua ne ia te tagata mafi tenā? Ko mafai ei o puke ne ia ana kope mai tena fale. 30  A te tino telā e se kau mai ki a au, e ‵teke ki a au, a ko te tino telā e se ga‵lue māua o fakamaopoopo mai a tino e faka‵kalo ne ia a tino. 31  “Ona ko te mea tenei, au e fai atu ki a koutou: A agasala mo pati fakatauemu katoa e fai ne tino ka fakamagalogina, kae ko fakatauemuga e fai ki te agaga e se mafai o fakamagalo. 32  E pelā mo te tino e muna masei ki te Tama a te tagata ka fakamagalogina, kae ko so se tino e muna masei ki te agaga tapu ka se mafai o fakamagalo a ia i te olaga tenei io me i te olaga telā ka oko mai. 33  “E mafai o fai ne koutou a te lakau ke ‵lei kae ke fua mai foki i ei a fuataga ‵lei, io me fai ne koutou se lakau ke masei kae ke ma‵sei foki ana fuataga, me e iloa fua a te lakau i ana fuataga. 34  A koutou ne tama a gata ‵poisini, e mafai pefea o fai‵pati koutou ki mea ‵lei māfai a koutou ne tino amio ma‵sei? Me e faipati mai ne te gutu a mea kolā e ‵fonu i te loto. 35  E aumai ne te tino ‵lei mai i ana koloa ‵lei a mea ‵lei, kae ko te tino masei e aumai ne ia mai i ana koloa ma‵sei a mea ma‵sei. 36  Au e fai atu ki a koutou me i pati sē aoga kolā e fai‵pati ki ei a tino, ka fakamasino eiloa latou e uiga ki ei i te Aso Fakamasino, 37  me ka taku amiotonugina koutou e auala i otou pati e fai kae ka taku fakamaseigina foki koutou e auala i otou pati.” 38  Ne fai atu a nisi failautusi mo Falesaio ki a ia: “Te Faiakoga, a matou e ma‵nako ke lavea ne matou se fakailoga mai i a koe.” 39  Ne tali atu a ia ki a latou, ana muna: “A te kautama matagā kae se fakamaoni* tenei e ‵sala faeloa ki se fakailoga. Kae ka seai eiloa se fakailoga e tuku atu ki a latou kae na ko te fakailoga e uiga ki a Iona te pelofeta. 40  Me e pelā eiloa mo Iona ne nofo atu i te tinae o se ika lasi i aso e tolu mo po e tolu, e penā foki te Tama a te tagata, ka nofo i lalo i te laukele i aso e tolu mo po e tolu. 41  Ka toe‵tu mai a tino Nineva i te fakamasinoga fakatasi mo te kautama tenei kae ka taku fakamasei ne latou te kautama tenei me ne sala‵mo a tino Nineva i mea kolā ne talai atu ne Iona, kae kiloke! e isi se tino i konei e sili atu i a Iona. 42  Ka toe fakatu mai a te tupu fafine mai i saute i te aso fakamasino fakatasi mo te kautama tenei kae ka taku fakamasei foki ne ia a tino konā; me ne vau a ia mai se koga ‵mao ‵ki ke lagona ne ia te poto o Solomona, kae kiloke! e isi se tino i konei e sili atu i a Solomona. 43  “Kafai e fano ki tua se agaga masei mai se tino, e fano a ia i loto i toafa o ‵sala se koga mo ana malōlō, kae ka se maua ne ia. 44  Ko fai ifo ei a ia penei, ‘Au ka toe foki ki te fale telā ne vau ei au,’ kae i tena okoga ki ei ne maua aka ne ia me e seai se tino e nofo i ei kae ko ‵ma ka ko oti foki ne teu fakagaligali. 45  Kae ne toe foki a ia, puke mai ei ne ia a nisi agaga e tokofitu kolā e ma‵sei atu i a ia, kae i te lotou uluga ki loto i te fale, ‵nofo ei i konā, kae ka sili atu la te masei o te ikuga o te tagata tenā i lō te taimi muamua. Tenā eiloa te mea ka tupu ki te kautama matagā tenei.” 46  A koi faipati a ia ki te vaitino, kae ko ‵nofo mai i tua a tena mātua mo ana taina kolā ne fia fai‵pati ki a ia. 47  Tela la, ne fai atu ei se tino ki a ia, penei: “Kiloke! A tou mātua mo ou taina kolā e ‵tu i tua kae e fia fai‵pati ki a koe.” 48  Ne tali atu a ia ki te tino tenā: “Ko oi toku mātua, a ko oi foki oku taina?” 49  Ne tusi atu tena lima ki ana soko kae fai atu, penei: “Kiloke! Ko toku mātua mo oku taina konei! 50  Me ko so se tino e fai ne ia te loto o toku Tamana telā i te lagi, ko ia tenā ko toku taina mo toku tuagane mo toku mātua.”

Fakamatalaga mai lalo

 I te ‵gana Eleni, ko te “mulilua.”