Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Tusi Tapu i te Itaneti | NEW WORLD TRANSLATION (Ne `Lomi i te 1984)

Mataio 11:1-30

11  I te otiga ne tuku atu ne Iesu a fakatonuga ki ana soko e toko sefululua, fanatu ei a ia o akoako kae talai i loto i olotou fa‵kai.  A ko te logoga a Ioane i loto i te falepuipui e uiga ki galuega a Keliso, uga atu ei ne ia ana soko  kae fesili atu ki ei: “A koe ko te Tino telā ka vau, io me koi faka‵tali matou ki se isi tino?”  Ne tali atu a Iesu ki a lāua: “Olo o fakailoa atu ki a Ioane a mea kolā ko lagona kae lavea ne koulua:  Ko ‵pula a mata o tino ‵kivi a ko tino ‵pili ko sa‵sale. Ko faka‵magina a lepela a ko tino ‵tuli ko ‵logo olotou taliga. Ko toetu mai a tino ‵mate, kae ko folafola atu te tala ‵lei ki tino ma‵tiva,  kae ka fiafia a te tino telā e se pakū ona ko au.”  I te ologa a lāua konei, ne faipati atu ei a Iesu ki te vaitino e uiga ki a Ioane: “Se a te mea ne fia lavea ne koutou i te koga lavaki? E mata, se mouku loa telā e agi valevale ne te matagi?  Se a la te mea ne fia lavea ne koutou? E mata, se tagata e pei ki gatu ‵gali? A tino e ‵pei ki gatu ‵gali e ‵nofo i fale o tupu.  Se a la te mea ne fia lavea ‵tonu ne koutou? Se pelofeta? E tonu, au e fai atu ki a koutou, a ia tenā e sili fakafia atu i se pelofeta. 10  Ko ia eiloa tenei ne tusi mai e uiga ki ei: ‘Kiloke! Ka uga atu ne au taku avefekau ke mua i a koe, telā ka mua atu o fakatoka tou auala!’ 11  Au e fai ‵tonu atu ki a koutou: E seai se tino i tino kolā ko oti ne fa‵nau mai e sili atu i a Ioane te Papatiso, kae ko te ‵toe tino malalo i te Malo o te lagi e sili atu i a ia. 12  Kae talu mai i aso o Ioane te Papatiso ke oko mai ki aso nei, a te Malo o te lagi ko te fakamoemoega telā e kausaki ki ei a tino, a ko tino kolā e maua ne latou ka taofi ‵mau eiloa ki ei. 13  Me ne ‵valo mai a Pelofeta katoa mo te Tulafono ke oko ki a Ioane, 14  kae kafai e fia tali‵tonu koutou ki ei: A Ia tenā ko ‘Elia telā ka fai o vau.’ 15  A te tino telā e isi ne ana taliga ke na fakalogo la ki ei. 16  “Ka fakatusa ne au ki a ai a te kautama tenei? A latou konei e pelā me ne tama‵liki fo‵liki e saga‵saga i te maketi kae ka‵laga atu ki olotou taugasoa, 17  olotou muna: ‘Ne fakatagi ne matou te pu mō koutou, kae e se ‵saka koutou; ne ‵tagi mautuutu matou, kae e se ‵tagi fanoa‵noa koutou.’ 18  E penā foki te vauga a Ioane, e se kai kae se inu, kae fai mai a tino, ‘E isi se temoni i a ia.’ 19  I te vauga a te Tama a te tagata, ne kai kae inu, kae fai mai a tino, ‘Kiloke! A te tagata tenei se tino gafula kae inu uaina, se taugasoa o tino ao lafoga mo tino agasala.’ Kae e fakatalitonugina te poto o te tagata e auala i ana galuega amio‵tonu.” 20  Kae ne kamata o taku fakamasei ne Iesu a fa‵kai kolā ne fai i ei te ukega o ana galuega ‵mana, me ne seki sala‵mo latou: 21  “Kalofa eiloa i a koe e Koasini! Kalofa eiloa i a koe e Petesaita! moi ne fai i Tulo mo Saitonu a galuega ‵mana kolā ne fai i a koutou, penei ko leva ne sala‵mo latou kae ‵pei ki gatu lautaga kae nini olotou ulu ki lefu. 22  Tela la, au e fai atu ki a koutou: ka māmā atu a te fakasalaga o Tulo mo Saitonu i te Aso Fakamasino i lō koutou. 23  A ko koe e Kapanaumi, e mata, ka fakamaluga aka koe ke oko ki te lagi? A koe ka ‵pei ‵tuki ki lalo i te Tanuga* me moi ne fai i Sotoma a galuega ‵mana kolā ne fai i loto i a koe, penei koi tumau eiloa te fa‵kai tenā ke oko mai ki aso nei. 24  Tela la, au e fai atu ki a koutou: Ka māmā atu a te fakasalaga o te fenua o Sotoma i te Aso Fakamasino i lō koutou.” 25  Ne fai aka ei a Iesu i te taimi tenā: “E tavae ne au a koe i mua o tino katoa, e toku Tamana, te Aliki o te lagi mo te lalolagi, me ko oti ne ‵funa ne koe a mea konei mai i tino ‵poto mo tino mai a‵koga ma‵luga kae ne fakaasi atu ki pepe. 26  E tonu, e toku Tamana, me tenā eiloa te mea e loto koe ki ei. 27  Ko oti ne tuku mai ki a au a mea katoa ne toku Tamana, kae e seai se tino e iloa tonu ne ia a te Tama kae na ko te Tamana. E seai foki se tino e iloa tonu ne ia a te Tamana kae na ko te Tama, mo ia foki telā e manako te Tama o fakaasi ki ei. 28  O‵mai ki a au, a koutou katoa kolā e fi‵ta kae ‵mafa otou amoga, me ka tuku atu ne au ki a koutou se malosi fou. 29  Ke puke ne koutou taku amo kae fakaakoako mai ki a au, me i a au e agamalu kae loto maulalo, kae ka maua ne koutou i ei se malosi fou. 30  Me e māmā taku amo, kae amogofie foki taku amoga.”

Fakamatalaga mai lalo

 I te ‵gana Eleni, “ko Heitisi.” Ke onoono ki te Mataupu Fakaopoopo e 8.