Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Tusi Tapu i te Itaneti | NEW WORLD TRANSLATION (Ne `Lomi i te 1984)

Maleko 9:1-50

9  E se gata i ei, ne fai atu a Iesu ki a latou: “Au e fai ‵tonu atu ki a koutou me e isi ne tino i konei ka se ‵mate seiloga ke lavea muamua ne latou te Malo o te Atua ko oko mai i tena ‵mana.”  E ‵tusa mo ana pati konā, i aso e ono mai tua ifo, puke ei ne Iesu a Petelu, Iakopo mo Ioane kae olo aka ki luga i se mauga maluga ‵ki. Ne ‵fuli ana foliga i mua o latou,  a ko ana gatu ne malapu‵lapu kae ‵kena pakipaki, kae e sili atu tena ‵kena i lō so se gatu e ‵ta ne se tino i te lalolagi.  Ne lavea atu foki ne latou a Elia mo Mose e sau‵tala fakatasi mo Iesu.  Ne fai atu a Petelu ki a Iesu: “Te Faiakoga,* ko ‵lei aka eiloa ke ‵nofo matou i konei, tela la ka faka‵tu ne matou i konei a faleie e tolu, e tasi mō koe, e tasi mō Mose, kae e tasi mō Elia.”  E tonu, ne se iloa ne Petelu me ne a ana mea e ‵tau o fai, me ko oko eiloa te lotou ma‵taku.  Ne fakatu aka se kaumana kae faka‵lava i luga i a latou, kae faipati mai se leo i loto i ei penei: “Tenei eiloa taku Tama, ko taku fagasele; faka‵logo ki a ia.”  Ne fakatau kilo‵kilo fakavave latou kae ko seai se tino e lavea atu ne latou kae na ko Iesu fua.  I te lotou oloifoga mai luga i te mauga, ne tuku atu ne ia se fakatonuga ‵mafa ke mo a ma fakailoa atu ki se isi tino a te mea ne lavea ne latou seiloga ke toe fakatu aka te Tama a te tagata mai te mate. 10  Ne taofi ‵mau ne latou ana pati i olotou loto, kae ne sau‵tala loa latou ki te uiga o te toetu mai te mate. 11  Ne fesili atu latou ki a ia, olotou muna: “Kaia e fai mai ei a failautusi me e ‵tau o vau muamua a Elia?” 12  Ana muna ki a latou: “E vau muamua eiloa a Elia o toe faka‵tonu a mea katoa, kae ne mafai pefea o tusi mai e uiga ki te Tama a te tagata me e ‵tau o oko atu ki a ia a logo‵maega e uke kae fakatauemu atu ki ei? 13  Kae e fai atu au ki a koutou: A Elia ko leva ne vau kae ne fai fua ne latou ki a ia a mea kolā ne ma‵nako latou ki ei, e pelā eiloa mo te mea ne tusi mai e uiga ki a ia.” 14  I te lotou okoatuga ki nisi soko, lavea ei ne latou se vaitino e mumu atu i olotou tafa mo failautusi e kinau mo latou. 15  I te laveaga eiloa ne te vaitino a Iesu, ne ‵poi masei latou. Ne ‵tele atu ei latou kae fakatalofa atu ki a ia. 16  Ne fesili atu a ia ki a latou: “Se a te mea e kinau ei koutou mo latou?” 17  Ne tali atu se tino e tokotasi mai te vaitino: “Te Faiakoga, ne aumai ne au taku tamaliki ki a koe me e nofo i ei se agaga telā e fai ne ia a ia ke gūgū. 18  I so se koga e ulufia ei a ia, e ‵pei ne tou tagata a ia ki lalo i te laukele, ‵sali ana suavale kae ū ana nifo kae galo atu ei tena malosi. Ne fai atu au ki ou soko ke afuli aka te agaga tenā keatea kae ne seki mafai ne latou.” 19  Ne tali atu a ia ki a latou: “Te kautama sē fakatuanaki tenei, ka pefea te leva e fesoasoani atu ei au ki a koutou? Ka pefea te leva e fa‵ki ei au i a koutou? Aumai ki a au te tamaliki tenā.” 20  Ne avatu ne latou te tamaliki ki a ia. Kae i te laveaga ne te agaga a Iesu, ne fai fakavave ne ia ke pole te tamaliki kae i tena sigaga ki lalo i te laukele, takafilifili valevale ei a ia kae ‵sali ana suavale. 21  Kae ne fesili atu a ia ki tena tamana: “Ko pefea te leva ne tupu ei te mea tenei ki a ia?” Ana muna: “Talu mai te taimi koi foliki ei a ia, 22  e ‵pei sāle ne te agaga a ia ki loto i te afi e pelā foki mo te vai ke tamate ei a ia. Kae kafai e mafai o fai ne koe se mea ki ei, a koe ke alofa kae fesoasoani mai ki a matou.” 23  Ne fai atu a Iesu ki a ia: “Kaia e fai mai ei koe, ‘Kafai e mafai ne koe’? Me i te tino telā e fakatuanaki e mafai o fai ne ia a mea katoa.” 24  Ne pakalaga fakavave atu te tamana o te tamaliki kae fai atu: “Au e fakatuanaki! Fesoasoani mai ke fakamalosi aka toku fakatuanaki!” 25  I te laveaga ne Iesu me ko ‵tele katoa atu te vaitino ki a latou, ‵liko ei ne ia te agaga sē ‵ma kae fai atu ki ei: “Te agaga gūgū kae ‵tuli, au e fakatonu atu ki a koe, fano keatea mai i a ia kae e tapu koe e toe foki ki ei.” 26  I te otiga ne pakalaga kae pole i taimi e uke fano ei te agaga ki tua, a ko te tamaliki ko pelā eiloa me ko mate, me ne fai mai te tokoukega o tino: “A ia ko mate!” 27  Ne puke atu a Iesu ki tena lima, fakatu aka ki luga, tu aka ei tou tagata. 28  Kae i tena uluga ki loto i se fale, ne fesili atu ana soko ki a ia i a latou aka eiloa: “Kaia ne seki mafai ei ne matou o afuli te agaga tenā?” 29  Ne fai atu a ia ki a latou: “A te vaega tenei e mafai fua o fano ki tua e auala i te ‵talo.” 30  Ne tiakina ne latou te koga tenā kae olo atu i loto i Kalilaia, kae ne seki manako a ia ke iloa ne se tino te mea tenā. 31  Ne akoako ne ia ana soko kae fai atu ki a latou: “E ‵tau o tuku atu te Tama a te tagata ki lima o tāgata kae ka tamate ne latou a ia, kae faitalia tena mate, ka toetu aka a ia fakamuli i te tolu o aso.” 32  Ne seki malamalama latou i ana pati kae ne ma‵taku latou ma fesili atu ki a ia. 33  Kae ne oko atu latou ki Kapanaumi. I tena nofoga i loto i te fale, fesili atu ei a ia ki a latou: “Se a te mea ne kinau ei koutou i te auala?” 34  Ne ‵nofo filemu latou, ona ko latou ne kinau i te auala me ko oi e sili i a latou. 35  Ne sagasaga a ia ki lalo kae kalaga atu ki te toko sefululua kae fai atu ki a latou: “Kafai se tino e manako ke sili a ia, e ‵tau o fai a ia mo fai te ‵toe tino malalo eiloa, kae ke fai foki mo tavini a tino katoa.” 36  Ne puke mai ne ia se tamaliki foliki, fakatu atu i olotou mua, ‵sai mai ne ia ki ana lima kae fai atu ki a latou: 37  “So se tino e talia ne ia se tamaliki penei ona ko toku igoa ka talia foki ne ia au, kae ko so se tino e talia ne ia au e se talia fua ne ia au kae ko ia foki telā ne uga mai ne ia au.” 38  Ne fai atu a Ioane ki a ia: “Te Faiakoga, ne lavea ne matou se tagata e afuli ne ia a temoni i tou igoa kae ne taumafai matou o ‵vao a ia, me ne seki tautali mai i a matou.” 39  Kae ne fai atu a Iesu: “Sa taumafai o ‵vao a ia, me e seai se tino e mafai o fai ne ia a galuega ‵mana i toku igoa, kae fakamasei fakavave ne ia au, 40  me ko so se tino telā e se ‵teke ki a tatou e kau mo tatou. 41  Me ko so se tino e tuku atu ne ia ki a koutou se ipu vai ke inu ona ko koutou ko tino o Keliso, au e fai ‵tonu atu ki a koutou, ka se mafai o seai sena taui. 42  Kae ko so se tino e fakavāivāi ne ia se tino i tino fatauva konei kolā e tali‵tonu ki a au, e ‵lei atu moi ne ‵sai tena ua ki se fatu solo saito telā e toso ne asini kae ‵pei atu ki te moana. 43  “Kafai ko tou lima e fakaagasala* ne ia koe, ‵kati ke tō; e sili atu ke maua ne koe te ola e aunoa mo se lima i lō tou ‵pei atu mo ou lima e lua ki Kena, ki loto i te afi telā e se mafai o tamate. 44*  —— 45  Kae kafai ko tou vae e fai ne ia koe ke siga,* ‵kati ke tō; e sili atu ke maua ne koe te ola mo te vae e tasi i lō tou ‵pei mo ou vae e lua ki loto i Kena. 46*  —— 47  Kafai ko tou mata e fai ne ia koe ke siga, ‵pei keatea; e sili atu ke ulu koe ki loto i te Malo o te Atua mo tou mata e tasi i lō tou ‵pei atu mo ou mata e lua ki Kena, 48  telā e seai se ilo e mafai o mate i ei mo te afi telā e se mafai o tamate. 49  “Me e ‵tau o fakamasima a tino katoa ki te afi. 50  E ‵lei te masima kae kafai ko galo te ‵kona o te masima, se a la te mea e mafai o toe faka‵kona ki ei? Ke i a koutou te masima, kae tausi te filemu i va o koutou.”

Fakamatalaga mai lalo

 I te ‵gana Epelu, ko te “Lapi.”
 Io me “fakapakū.”
 Ke onoono ki te fakamatalaga mai lalo i te Mat 17:21.
 Io me “fakaagasala” ne ia koe.
 Ke onoono ki te fakamatalaga mai lalo i te Mat 17:21.