Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Tusi Tapu i te Itaneti | NEW WORLD TRANSLATION (Ne `Lomi i te 1984)

Maleko 8:1-38

8  I aso konā, ne toe mumu atu se vaitino kolā ne seki ai ne olotou meakai, kae ne aumai ne Iesu ana soko kae fai atu ki a latou:  “Ko oko eiloa i toku alofa ki tino konei, me ko tolu nei aso ne fakatasi ei au mo latou kae e seai eiloa ne olotou mea ne kai.  Kafai e uga ne au latou ki olotou fale mo te fia‵kai, e mafai o mata‵po latou i te auala kae ko nisi o latou ne o‵mai mai koga ‵mao.”  Ne tali atu ana soko ki a ia: “Ko te koga fea i se koga ‵mao penei e mafai ei ne se tino o fagai a tino konei ke ma‵kona i falaoa?”  Ne fesili atu a ia ki a latou: “E fia otou falaoa faka‵fete? Olotou muna: “E fitu.”  Ne fakatonu atu a ia ke saga‵saga te vaitino ki lalo. Ne puke ne ia a falaoa e fitu, fai te fakafetai, tofitofi, kae tuku atu ki ana soko ke tufa atu, tufa atu ei ne latou ki te vaitino.  Ne isi foki ne olotou tamā ika; kae i te otiga o te fakafetai, ne fai atu foki a ia ke tufa atu ne latou.  Ne ‵kai kae ma‵kona a latou katoa, a ko meakai kolā ne ‵toe ne faka‵fonu ki ei a tapola ‵lasi e fitu.  Kāti e nofo pelā ki se toko 4,000 tāgata i konā. Oti aka loa, uga ei ne ia latou ke olo. 10  Ne sopo fakavave a ia ki te poti fakatasi mo ana soko kae olo atu ki se kogā koga i Talamanuta. 11  Ne olo atu a Falesaio o kinau mo ia i konā, me ne ma‵nako latou ke fakaasi atu ne ia se fakailoga mai te lagi, ke tofotofo aka ei a ia. 12  Ne ‵pusi tena manava i te lasi o tena fanoanoa, kae fai atu: “Kaia e ‵sala ei te kautama tenei ki se fakailoga? Au e fai ‵tonu atu ki a koutou, E seai eiloa se fakailoga e tuku atu ki te kautama tenei.” 13  I konā loa, tiakina ei ne ia latou, sopo ki te poti, kae fanatu ki te suā feitu o te vai. 14  Ne puli i a latou ke ave ne falaoa kae na ko te falaoa fua e tasi kae e seai aka foki se isi mea i te poti. 15  Kae ne fakatonu faka‵lei atu a ia ki a latou, kae fai atu: “Ke matapula‵pula koutou; kae fakaeteete i te mea faka‵fete a Falesaio mo te mea faka‵fete a Helota.” 16  Ne fakatau kinau latou ona ko te mea e seai ne olotou falaoa ne ave. 17  Ne iloa ne Iesu a te mea tenei, fai atu ei ki a latou: “Kaia e kinau ei koutou ona ko te mea e seai ne falaoa? E a, e seki malamalama loa koutou i tena uiga? E a, koi pouli loa otou mafaufau? 18  E tiga eiloa e isi ne otou mata, e a, e se lavea ne koutou, e tiga eiloa e isi ne otou taliga, e a, e se lagona ne koutou?’ E a, e se masaua ne koutou 19  i te tofitofiga ne au o falaoa e lima mō te toko 5,000 tāgata, e fia tapola ne faka‵fonu ne koutou ki toegā meakai?” Ne fai atu latou ki a ia: “E sefululua.” 20  “I te taimi ne tofitofi ei ne au a falaoa e fitu mō tagata e toko 4,000, e fia tapola ne faka‵fonu ne koutou ki toegā meakai?” Ne fai atu latou ki a ia: “E fitu.” 21  Fai atu ei a ia ki a latou: “E a, e seki maina loa koutou i te uiga o mea konā?” 22  Ne olo atu latou ki Petesaita. Ne avatu ne tino ki a ia i konā se tino ‵kivi, kae fakatagi atu ke fakapatele atu a ia ki ei. 23  Ne puke ne ia te tino ‵kivi i tena lima, ‵taki ne ia ki tua o te fa‵kai. Ne pōki atu ki ana mata, tuku atu ana lima ki luga i a ia kae fesili atu: “E isi sau mea e lavea?” 24  Ne kilo aka te tagata ki luga kae fai atu: “E lavea ne au a tino, me e lavea ne au a mea pelā me ne lakau, kae e olo sale.” 25  Ne toe tuku atu ana lima ki luga i mata o te tagata tenā, lavea faka‵lei ei ne te tagata tenā a mea, kae ne ‵lei foki a ia me ko lavea faka‵lei ne ia a mea katoa. 26  Ne uga atu ne ia te tagata tenā ke fano ki tena fale, ana muna: “Sa toe foki ki te fa‵kai.” 27  Ne olo atu a Iesu mo ana soko ki fa‵kai fo‵liki o Kaisaleia Filipi, kae i te lotou auala, ne fakafesilisili ne ia ana soko, ana muna: “Ne a muna a tino me ko oi au?” 28  Ne fai atu latou ki a ia: “Ko Ioane te Papatiso; a ko nisi tino ko Elia; kae e fai mai foki a nisi tino me se tokotasi o pelofeta.” 29  Fesili atu ei a ia ki a latou: “A ko koutou la, se a te otou mau me ko oi au?” Ne tali atu a Petelu ki a ia: “A koe ko te Keliso.” 30  Ne fakatonu malosi atu a ia ke mo a ma fakaasi atu ki se isi tino a te mea tenā e uiga ki a ia. 31  Ne kamata foki o akoako atu ki a latou me e ‵tau o logo‵mae te Tama a te tagata i mea e uke kae ka ‵teke atu ki a ia a toeaina mo faitaulaga pule mo failautusi kae ka tamate foki a ia, kae ka toetu aka i te tolu o aso mai tua ifo. 32  E tonu, ne fakamalamalama faka‵lei atu ne ia te mea tenā. Kae ne fakatafa aka ne Petelu a ia ki se feitu kae ‵liko atu ki ei. 33  Ne mafuli aka tou tagata, kilo atu ki ana soko kae ‵liko ne ia a Petelu, ana muna: “Fano keatea, e Satani! me ia koe e se mafaufau e pelā mo te Atua kae e pelā mo tāgata.” 34  Ne kalaga atu a ia ki te vaitino mo ana soko ke olo atu ki a ia kae fai atu ki a latou: “So se tino e fia tautali mai i a au, ke se toe mafaufau ki a ia eiloa, amo tena lakau fakasaua* kae tautali mai faeloa i a au. 35  Me ko so se tino e manumanu ki tena ola, ka se maua ne ia a ko so se tino e galo tena ola ona ko au mo te tala ‵lei e toe maua ne ia. 36  Kae se a te aoga ki se tino māfai e maua ne ia te lalolagi kātoa kae galo tena ola? 37  Se a te mea e mafai o tuku atu ne se tino ke sui ei tena ola? 38  Me ko so se tino telā e mā i a au mo aku pati i te kautama sē fakamaoni kae agasala tenei, ka mā foki a te Tama a te tagata i a ia i te taimi e vau ei a ia i te ‵malu o tena Tamana fakatasi mo ana agelu tapu.”

Fakamatalaga mai lalo

 Ke onoono ki te Mataupu Fakaopoopo e 7.