Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Tusi Tapu i te Itaneti | NEW WORLD TRANSLATION (Ne `Lomi i te 1984)

Maleko 7:1-37

7  Ne mumu atu ki tafa o Iesu i te taimi tenā a Falesaio mo nisi failautusi kolā ne olo atu mai Ielusalema.  I te laveaga ne latou a nisi o ana soko e ‵kai mo olotou lima e lai‵lai, kae seki ‵fulu—  me e se mafai o ‵kai a Falesaio mo tino Iutaia katoa seiloga ke ‵fulu olotou lima ke oko eiloa ki tulilima, e ‵tusa mo tuu masani a tino i aso mua.  Kae kafai ko ‵foki mai latou i te maketi, e se mafai o ‵kai seiloga ke faka‵ma latou mai te apiapiatuga o vai, kae e uke aka foki a nisi tuu kolā ne tuku atu kae puke ‵mau latou ki ei, e pelā mo te papatisoga o ipu, sioki, mo mea e faite ki kopa.—  Ne fesili atu a Falesaio mo failautusi ki a ia: “Kaia e se tau‵tali ei ou soko ki tuu a tino i aso mua, kae e ‵kai latou mo olotou lima e lai‵lai?”  Ne fai atu a ia ki a latou: “Ne fakasino tonu eiloa ki a koutou, tino ‵loi, a te valoaga a Isaia, e pelā eiloa mo ana muna ne tusi: ‘A tino konei e āva mai fua ki a au i olotou gutu, a ko olotou loto e ‵mao ‵ki mai i a au.  E seai se aoga e tapuaki mai ei latou ki a au, me e akoako atu ne latou a akoakoga a tāgata.’  Ne tiakina ne koutou a tulafono a te Atua, kae puke ‵mau koutou ki tuu a tāgata.”  E se gata i ei, ne fai atu a ia ki a latou: “Ko ‵poto fāka koutou o tiaki a tulafono a te Atua ko te mea ke tausi ne koutou otou tuu masani. 10  E pelā mo te mea tenei, ne fai atu penei a Mose, ‘Āva ki tou tamana mo tou mātua,’ a ko ‘Te tino telā e taku fakamasei ne ia tena tamana io me ko tena mātua e ‵tau o tamate.’ 11  Kae e fai mai koutou, ‘Kafai e fai atu se tino ki tena tamana io me ko tena mātua: “So se mea a aku telā e mafai o aoga ki a koulua, a te mea tenā se kopani (ko tena uiga, ko taku meaalofa tenā ki te Atua—),’” 12  ko fai ei ne koutou te tino tenā ke se fai ne ia se mea e tasi mō tena tamana io me ko tena mātua. 13  Tela la, ko fakaseaoga ne koutou a te muna a te Atua ona ko otou tuu kolā ne tuku fakasolo mai ki a koutou. Kae e fai foki ne koutou a mea e uke kolā e tai ‵pau mo te mea tenei.” 14  Ne kalaga atu tou tagata ke toe olo atu te vaitino ki a ia, kae fai atu ki a latou: “Faka‵logo mai ki a au, koutou katoa, kae fai ke maina koutou. 15  E seai se mea e ulu ki loto i se tagata e mafai o fakalailai atu ki a ia, kae ko mea kolā e ‵to mai ki tua i se tagata, konā mea e fakalailai atu ki te tagata tenā.” 16*  —— 17  I tena uluatuga ki se fale e tai ‵mao mai te vaitino, ne fesilisili atu ana soko ki a ia e uiga ki tena tala fakatusa. 18  Fai atu ei a ia ki a latou: “E a, e se malamalama foki koutou e pelā mo tino konā? E se iloa ne koutou me e seai se mea mai tua e ulu atu ki loto i se tagata e mafai o fakalailai atu ki te tagata tenā, 19  ona ko te mea e se fanatu te mea tenā ki tena loto, kae i loto i tena tinae ko fano ei ki tua?” Ne fakaasi mai ne ia i konā me e ‵ma a meakai katoa. 20  Ne toe fai atu a ia: “A ko te mea telā e tō mai ki tua mai se tagata ko ia tenā e fakalailai ne ia te tagata, 21  me e olo ifo ki tua mai te loto o te tagata a mafaufauga ma‵sei, ko amioga fakatauavaga sē ‵tau, te kaisoa, te tatino, 22  te mulilua, te kaimanako, faifaiga matagā, te faitogafiti, te amio matafatu mo te sē āva, matakanokano, te pati masei, te fakamatamata, mo uiga faiga‵ta. 23  Ko mea ma‵sei katoa konei e o‵mai mai te loto kae e fakalailai ei te tagata.” 24  Ne tu aka a ia ki luga kae fanatu ki te kogā fenua o Tulo mo Saitonu. Ne ulu atu a ia ki loto i se fale kae ne seki manako ke iloa ne se tino te mea tenā, kae ne seki sao a ia i tino. 25  Ne logo fakavave se fafine e pukea tena tamaliki fafine ne se agaga masei e uiga ki a ia, fanatu ei tou fafine kae totuli ifo i ana vae. 26  A te fafine tenā se tino Eleni mai Foinikia, kae ne fakatagi atu faeloa tou fafine ki a ia ke afuli aka keatea te temoni mai tena tama. 27  Kae ne fai atu a ia ki tou fafine: “E ‵tau o ma‵kona muamua a tama‵liki, me e se ‵tau o ‵pei atu a falaoa a tama‵liki ki tamā kuli.” 28  Ne tali atu te fafine tenā ki a ia: “Tou ‵Malu, e tonu koe, kae ko tamā kuli mai lalo o te taipola e ‵kai foki ki mea kolā e ma‵tutu ifo mai tama‵liki konā.” 29  Ona ko te mea tenā, fai atu ei a ia ki te fafine: “Me ne fai mai ne koe a pati konā, fano la; ko oti ne fano keatea te temoni mai tau tama.” 30  Ne fano ei te fafine ki tena fale kae ne maua atu ne ia a tena tama i luga i te moega kae ko oti ne fano keatea te temoni mai i a ia. 31  I te fokiatuga a Iesu mai Tulo, ne ui atu i Saitonu mo te Vai i Kalilaia ki te kogā fenua ko Tekapoli. 32  Ne avatu ne tino i konā ki a ia se tagata taliga ‵tuli kae gūgū, kae ne fakatagi atu latou ke tuku atu fua ana lima ki luga i a ia. 33  Ne ave ne ia te tagata tenei keatea mai te vaitino, ‵soka atu ana maikao ki ana taliga, pōki atu, kae fakapatele atu ki tena alelo. 34  Ne kilo aka ana mata ki te lagi, ‵pusi tena manava kae fai atu ki a ia: “Efata,” ko tena uiga, “Ke ma‵tala.” 35  Ne ma‵tala ana taliga kae ne ‵lei foki i konā te ‵lave o tena alelo, kae ne kamata o faipati mai tou tagata e pelā eiloa mo te masani. 36  Kae ne fakatonu atu a Iesu ki a latou ke mo a e fakailoa atu te mea tenā ki se isi tino; kae ko te uke o ana fakatonuga e fai atu ko te uke foki o fakasalalauga e fai ne latou e uiga ki ei. 37  E tonu, ne ofo masei eiloa a latou kae fai aka olotou pati: “Ko oti ne fai ne ia a mea katoa ke ‵lei. Ke oko ki tino taliga ‵tuli ko ‵logo mo tino gūgū ko fai‵pati faka‵lei.”

Fakamatalaga mai lalo

 Ke onoono ki te fakamatalaga mai lalo i te Mat 17:21.