Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Tusi Tapu i te Itaneti | NEW WORLD TRANSLATION (Ne `Lomi i te 1984)

Maleko 6:1-56

6  Ne tiaki ne ia te koga tenā kae fanatu ki tena fenua, kae ne tau‵tali atu ana soko i a ia.  I te okoga ki te Sapati, ne akoako atu ei a ia i loto i te sunako; kae ne ofo masei te tokoukega o tino kolā ne fakalogo‵logo ki a ia kae fai aka penei: “Ne maua i fea ne te tagata tenei a mea konei? Kae kaia ne tuku atu ei te poto tenei ki a ia, ke fai ne ia a galuega ‵mana konei?  E se ko ia tenei te kamuta, te tama tagata a Malia a ko te taina o Iakopo, Iosefa, Iuta mo Simona? A ko ana tuagane konei e ‵nofo mo tatou?” Ne ‵teke atu latou ki a ia.  Kae ne fai atu a Iesu ki a latou: “A te pelofeta e ‵malu i koga katoa kae na ko tena fenua tonu mo tena kāiga tonu.”  Ne seki mafai ne ia o fai se galuega ‵mana i konā kae na ko te fakaeke atu fua o ana lima ki nai tino ma‵saki o faka‵lei latou.  E tonu, ne ofo a ia i te sē lava o te lotou fakatuanaki. Kae ne malaga fakatamilo atu a ia i fa‵kai fo‵liki o akoako atu i ei.  Ne fakamaopoopo mai ne ia te toko sefululua kae kamata o uga atu latou taki tokolua kae tuku atu foki ki a latou te ‵mana ke pule atu ki luga i agaga ma‵sei.  Ne fakatonu atu foki a ia ki a latou ke seai se mea e ave i te malaga kae na ko te tokotoko fua—e seai se falaoa, se taga meakai, e seai ne tupe i olotou taga tupe.  Kae ke pei olotou taka, kae ke mo a ma ave* ne gatu e lua. 10  E se gata i ei, ne fai atu a ia ki a latou: “I so se fale e ulu koutou ki ei, ‵nofo i konā ke oko eiloa ki te taimi e tiaki ei ne koutou te koga tenā. 11  Kae i so se koga e se talia ei koutou io me e se fia faka‵logo atu ki a koutou, tuetue atu la a ‵pefu i otou vae i taimi e olo ei koutou keatea, ke fai mo molimau ki a latou.” 12  Ne olo atu ei latou o talai ko te mea ke mafai o sala‵mo a tino. 13  Ne afuli ne latou keatea a temoni e tokouke kae milimili ne latou a tino ma‵saki ki te sinu kae faka‵lei atu latou. 14  Ne logo te Tupu ko Helota me ko salalau valevale te igoa o Iesu i koga katoa, kae ne fai aka a tino penei: “A Ioane te Papatiso ko oti ne toe fakatu aka mai te mate, kae tenā eiloa te pogai e fai ei ne ia a galuega ‵mana konā.” 15  Kae e fai mai a nisi tino: “A ia ko Elia.” A ko nisi tino e fai mai: “A ia e pelā me se pelofeta i aso mua.” 16  Kae i te lagonaga ne Helota a te mea tenei, fai aka ei ana muna: “Ko Ioane eiloa telā ne ‵kati ne au tena ua, ko ia tenā ko oti ne toe fakatu aka.” 17  Me ne puke fakapagota ne Helota a Ioane kae ‵pei atu ki te falepuipui ona ko Helotia, te avaga a tena taina ko Filipo, telā ko avaga mo ia. 18  Me ne fai atu faeloa a Ioane ki a Helota: “E se talia i te tulafono ke fai te avaga a tou taina mo fai tau avaga.” 19  Kae ne nofo faeloa a Helotia mo tena loto masei ki a Ioane mo te fia tamate ki a ia, kae ne seki mafai ne ia. 20  Me ne puipui ne Helota a Ioane ona ko tena mataku me e iloa ne ia i a Ioane se tagata amiotonu kae ‵malu. I tena otiga ne fakalogologo ki a Ioane, ne ‵numi masei a Helota i te mea ka fai ne ia ki a Ioane, kae ne fakalogologo atu faeloa ki a ia mo te fiafia. 21  Kae ne maua ne tou fafine te avanoaga i te faiga o te ‵kaiga o te aso fanau o Helota i te afiafi mō ana ofisa ma‵luga mo takitaki o tena kautau mo toe tāgata ma‵luga i Kalilaia. 22  Ne fanatu ki loto te tama fafine a Helotia o saka kae ne fia‵fia i ei a Helota mo tino kolā ne ‵kai fakatasi mo ia i te taipola. Fai atu ei te tupu ki te tamafine tenā: “Taku mai ki a au so se mea e manako koe ki ei, kae ka tuku atu ne au ki a koe.” 23  E tonu, ne tauto atu tou tagata ki a ia: “So se mea e manako koe ki ei mai i a au, ka tuku atu eiloa ne au ki a koe, ke oko ki te āfa o toku malo.” 24  Ne fano tou fafine ki tua kae fai atu ki tena mātua: “Se a te mea ka taku atu ne au?” Muna a tena mātua: “Ko te ulu o Ioane te Papatiso.” 25  Ne fanatu fakavave a ia ki te tupu kae fakaasi atu tena manakoga, ana muna: “Au e manako ke tuku mai ne koe ki a au nei eiloa te ulu o Ioane te Papatiso i luga i se telē.” 26  E tiga eiloa ne fanoanoa malosi tou tagata i ei, ne seki manako te tupu ke se saga atu ki te fakamolemole a tou fafine, ona ko tena tautoga ko oti ne fai i mua o tino kolā ne ‵kai fakatasi mo ia i te taipola. 27  Ne uga fakavave atu ne te tupu se leoleo kae fakatonu atu ke puke mai te ulu o Ioane. Ne fano ei tou tagata o ‵kati te ua o Ioane i te falepuipui 28  kae aumai tena ulu i luga i se telē. Ne tuku atu ki te tamafine, kae tuku atu ne ia ki tena mātua. 29  I te lagonaga ne ana soko te mea tenā, olo atu ei latou o puke tena foitino kae tuku atu ne latou ki loto i se tanuga. 30  Ne maopoopo atu a apositolo i mua o Iesu kae fakamatala atu ki a ia a mea katoa kolā ko oti ne fai kae akoako atu ne latou. 31  Ne fai atu a ia ki a latou: “O‵mai ‵tou olo o malo‵lo malie aka i se koga, i a tatou aka eiloa.” Me ne tokouke a tino e solo mai, kae ko seai se lotou taimi malo‵lo kae seai foki se avanoaga ke ‵kai ei latou. 32  Olo ei latou i te poti ki se isi koga, ko latou aka eiloa. 33  Ne lavea kae ne iloa foki ne tino e tokouke te lotou ologa, kae ne ‵tele fakatasi atu a tino mai fa‵kai katoa kae ne ‵mua atu i a latou. 34  I tena fanaifoga mo te poti, lavea ne ia se vaitino e tokouke, kae ne alofa malosi a ia ki a latou me ko fai latou e pelā me ne mamoe e seai se lotou tausi. Ne kamata ei o akoako atu ne ia a mea e uke ki a latou. 35  I te okoatuga ki te fakaafiafi, olo atu ei ana soko ki a ia kae fai atu: “E ‵mao te koga tenei kae ko pili o po. 36  Uga atu latou ke olo ki maketi io me ko fa‵kai fo‵liki kolā e tai ‵pili mai o ‵togi ne meakai ma latou i ei.” 37  Ne fai atu a Iesu ki a latou: “Tuku atu ne koutou ne meakai ke ‵kai ei latou.” Kae ne fai atu latou ki a ia: “E a, ka olo matou o ‵togi mai ne falaoa kolā e mafai o maua i te 200 tenali ko tuku atu ei ke ‵kai a tino i ei?” 38  Ana muna ki a latou: “E fia otou falaoa? Onoono aka!” I te iloaga ne latou te aofaki, fai atu ei: “E lima, mo ika e lua.” 39  Ne fakatonu atu a ia ki tino katoa ke saga‵saga ki lalo i mouku i potukau. 40  Kae ne saga‵saga latou ki lalo i potukau e taki toko selau mo taki toko limasefulu. 41  Ne puke ne ia a falaoa e lima mo ika e lua, kilo aka ki te lagi o fai te fakafetai. Ne tofitofi ne ia a falaoa kae tuku atu ki ana soko ko te mea ke tuku atu ki mua o tino kae ne vaevae foki ne ia a ika e lua mō latou katoa. 42  Ne ‵kai latou katoa kae ne ma‵kona, 43  ne faka‵fonu ne latou a tapola e sefululua ki toegā falaoa, kae e se aofia i ei a ika kolā ne ‵toe. 44  A latou kolā ne ‵kai ki falaoa e ‵tusa mo te toko 5,000 tāgata. 45  Ne fakatonu fakavave atu a ia ki ana soko ke ‵sopo ki te poti kae ke ‵mua atu i a ia ki Petesaita i te suā feitu o te vai, a ko ia koi nofo ke olo katoa a te vaitino. 46  Kae i tena otiga ne fakatofa ki a latou, fanaka ei a ia o ‵talo i luga i se mauga. 47  I te okoga ki te afiafi po, ne nofo atu te poti i te kogaloto o te vai, a ko ia tokotasi fua e ‵toe i uta. 48  Kae i te laveaga ne ia me ko logo‵fio latou i te pūlūga o te poti ona ko te mea e ‵pono tonu mai eiloa te matagi i olotou mua, sasale atu ei a ia i te vaveao ki a latou i luga i te vai; kae e pelā me ka fakaseke aka i olotou tafa. 49  I te laveaga ne latou a ia e sasale i luga i te vai, ne mafau‵fau latou penei: “Tapa! A te mea tenei se aitu!” Kae ne paka‵laga latou ki luga. 50  Me ne lavea a ia ne latou katoa kae ne ma‵taku latou i ei. Kae ne faipati fakavave atu a ia ki a latou, kae fai atu: “Ke loto ‵toa koutou! Ko au fua tenei; sa ma‵taku.” 51  Ne sopo aka a ia ki luga i te poti, malū ei te matagi. Ona ko te mea tenei, ne ofo masei latou, 52  me ne seki maina latou i te uiga o falaoa, kae ne tumau eiloa latou i te ‵segi. 53  I te lotou okoga ki te suā feitu, ki te fenua ko Kenesaleta, taula ei te lotou poti i se koga e pili ki ei. 54  Kae i te taimi eiloa ne olo ifo ei latou mo te poti, ne lavea fakavave a ia ne tino, 55  kae ne ‵tele atu a tino mai te fenua kātoa tenā o avatu a tino ma‵saki i luga i moega ki te koga telā ne ‵logo latou me e nofo i ei tou tagata. 56  I so se fa‵kai foliki io me ko fa‵kai ‵lasi io me ko koga i tua o fa‵kai e fanatu a ia ki ei, e tuku ne latou a tino ma‵saki i maketi, kae fakamolemole atu ke fakapa‵tele atu fua latou ki te kapa o tena gatu. Kae ko latou katoa kolā ne pa‵tele ki ei ne ‵lei katoa olotou masaki.

Fakamatalaga mai lalo

 I te ‵gana Eleni, “‵pei ki gatu ‵tao loto e lua.”