Fanatu ki te fakasologa

Fanatu ki te fakasologa o mataupu

Molimau a Ieova

Fili se `gana Tuvalu

Maleko 5:1-43

5  Ne oko atu latou ki te suā feitu o te vai i te fenua ko Kelasa.  I tena sopoga eiloa ki lalo mo te poti, kae fakafetaui atu ki a Ia se tagata e pukea ne se agaga masei telā ne nofo atu i tanuga.  A ia e nofo tumau eiloa i tafa o tanuga, kae i te taimi tenā, ne seki ai eiloa se tino kai mafai o saisai ne ia tou tagata ki seni.  Me ne masani o pikifao tou tagata ki mea ‵sai vae mo seni, kae ne ‵motu ne ia a seni kae fatifati ne ia a pikifao; kae e seai eiloa se mafi ne mafai o puke ne ia tou tagata.  Kae i taimi katoa, i te po mo te ao, e pakalaga faeloa a ia i tanuga mo mauga kae selesele tena foitino ki fatu.  I te laveaga ne ia a Iesu mai se koga tai ‵mao, ne tele atu tou tagata kae ifo atu ki a ia.  Kae ne pakalaga atu a ia: “Kaia e fakalavelave mai ei koe ki a au, e Iesu, te Tama a te Atua Tafasili i te Maluga? Tauto mai i te igoa o te Atua me ka se fakapuapuaga ne koe au.”  Me ko oti ne fai atu a Iesu ki ei: “Fano ki tua mo te tagata tenā, a koe te agaga masei.”  Ne fesili atu a Iesu ki tou tagata: “Ko oi tou igoa?” Ne tali atu a ia: “A toku igoa ko Lekeono, me e tokouke matou.” 10  Kae ne fakatagi fakafia atu tou tagata ki a ia ke se ‵tuli keatea a agaga konā ki tua o te fenua tenā. 11  I te taimi tenā, e isi se matuga lafu puaka e kai‵kai i luga i te mauga. 12  Ne fakatagi atu a agaga konā ki a ia, olotou muna: “Uga atu matou ki puaka, ko te mea ke ulu atu matou ki loto i a latou.” 13  Ne talia ne ia te lotou fakatagi. Olo ei ki tua a agaga ma‵sei kae ulu atu ki loto i puaka konā. Ne ‵tele fakavave atu a puaka ki te kaugutu o te mauga, ‵to ki lalo i te tai, kāti e nofo ki se 2,000 o latou, kae ne ma‵lemu katoa i ei. 14  Ne ‵tele atu a tino fagai puaka o lipoti te mea tenā ki te fa‵kai mo koga i ana tafatafa, olo atu ei a tino o onoono me se a te mea ne tupu. 15  Ne olo atu latou ki a Iesu kae lavea ne latou te tagata telā ne pukea ne temoni e tokouke, e sagasaga mo ana gatu ‵lei kae ko ‵lei foki tena mafaufau, ne ma‵taku ei latou. 16  Kae ko tino foki kolā ne lavea ne latou te mea tenā, ne fakamatala atu ki a latou a te mea ne tupu ki te tagata ne pukea ne temoni e pelā foki mo te lafu puaka. 17  Tela la, ne fakatagi atu latou ki a Iesu ke fano keatea mai te lotou fenua. 18  I tena sopoga ki te poti, fakatagi atu ei te tagata ne pukea ne temoni ke tautali atu i a ia. 19  Kae ne seki talia ne ia, kae fai atu ki te tagata tenā: “Fano ki ou kāiga kae fakaasi atu ki a latou a mea katoa kolā ko oti ne fai ne Ieova mō koe mo tena alofa fakamagalo tenā ki a koe.” 20  Ne fano loa tou tagata kae talai atu i Tekapoli kātoa a mea katoa kolā ne fai ne Iesu mō ia, kae ne ofo masei a tino katoa i ei. 21  I te ‵toe fokiatuga a Iesu i te poti ki te suā feitu o te vai, ne mumu atu se vaitino ki a ia i konā; a koi nofo atu a ia i te tafatai. 22  Ne fanatu se ofisa tausi e tokotasi o te sunako, ko Iailo tena igoa, kae i te laveaga ne ia a Iesu, fakasiga ifo ei ki ana vae 23  kae fakatagi atu ki a ia i taimi e uke, ana muna: “A taku tamaliki fafine ko oko eiloa i te masaki. Fakamolemole, vau aka o tuku ou lima ki luga i a ia ko te mea ke toe ‵lei a ia.” 24  Tena ne olo ei lāua. Kae ne tau‵tali atu i a ia se vaitino kae fakatauteke atu i ana tafa. 25  E isi se fafine i konā ne ‵tafe tena sua i tausaga e sefululua, 26  kae ne fakalogo‵mae a ia i taimi e uke ne tokita e tokouke kae ko oti foki ne fakaaoga ana tupe katoa e aunoa mo se ‵lei ne maua, kae ne gasolo aka eiloa o masei atu. 27  I te lagonaga ne ia a mea e uiga ki a Iesu, fanatu ei a ia i tua o te vaitino kae fakapatele atu ki tena gatu, 28  me ne fai atu faeloa tou fafine ki a ia eiloa, penei: “Ke patele fua au ki tena gatu ko ‵lei ei au.” 29  Ne gata fakavave ei te ‵tafe o tena sua, kae ne lagona ne ia i tena foitino me ko oti ne faka‵lei aka te masaki fakalogo‵mae tenā. 30  Ne lagona fakavave foki ne Iesu te fanoga keatea o te ‵mana mai i a ia. Ne mafuli atu ki te vaitino kae fai atu: “Ko oi ne patele ki toku gatu?” 31  Kae ne fai atu ana soko ki a ia: “E lavea ne koe te vaitino konā e fakatauteke atu i ou tafa, kae kaia e fai mai ei koe, ‘Ko oi ne patele mai ki a au?’” 32  Kae ne salasala tou tagata ke lavea ne ia te tino telā ne fai ne ia te mea tenei. 33  Ne mataku te fafine kae polepole, me e iloa ne ia te mea telā ko oti ne tupu ki a ia. Ne fanatu ei tou fafine, fakasiga ifo i ana mua kae fakaasi atu a mea katoa ki a Iesu. 34  Ne fai atu a ia ki tou fafine: “Taku tama, ko ‵lei tou masaki ona ko tou fakatuanaki. Fano mo te filemu mo te malosi mai tou masaki fakalogo‵mae tenā.” 35  A koi faipati a ia kae oko atu a tāgata mai te fale o te ofisa tausi o te sunako kae fai atu: “Ko mate tau tamaliki fafine! E se ‵tau o fakalavelave atu koe ki te Faiakoga.” 36  Kae ne lagona ne Iesu olotou pati, fai atu ei ki te ofisa tausi o te sunako: “Sa mataku, kae fakatuanaki fua.” 37  Ne seki talia ne ia se tino ke tautali atu i a ia kae na ko Petelu, Iakopo, mo Ioane te taina o Iakopo. 38  Ne oko atu latou ki te fale o te ofisa tausi o te sunako, kae lavea ei ne ia a tino e logoa valevale kae ‵tagi paka‵laga. 39  Ne ulu atu tou tagata ki loto, kae fai atu ki a latou: “Kaia e logoa valevale ei koutou kae ‵tagi paka‵laga? A te tamaliki foliki tenā e seki mate kae e moe fua.” 40  Ona ko ana pati konei, ne ‵kata fakatauemu atu ei a latou ki a ia. Kae i te otiga ne uga ne ia a tino katoa ki tua, olo ei latou ki loto mo te tamana mo te mātua o te tamaliki mo tino kolā ne olo atu mo ia. Ne fanatu a ia ki te koga telā e takato ei te tamaliki tenā. 41  Ne puke ne ia te lima o te tamaliki kae fai atu ki ei: “Talita kumi,” telā e fakauiga penei: “Te tamaliki fafine, au e fai atu ki a koe, Tu ki luga!” 42  Ne tu fakavave aka te tamaliki fafine tenā kae kamata o sasale. (A ia ko sefululua ana tausaga.) Kae ne ofo masei lāua i te fia‵fia. 43  Kae ne fakatonu atu a ia ki a latou i taimi e uke ke mo a e fakailoa atu te mea tenei ki se isi tino kae fai atu fua ke tuku atu ne meakai ki te tamaliki fafine ke kai.

Fakamatalaga mai lalo