Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Tusi Tapu i te Itaneti | NEW WORLD TRANSLATION (Ne `Lomi i te 1984)

Maleko 4:1-41

4  Ne toe kamata o akoako atu tou tagata i tafa o te vai kae ne mumu atu ki a ia se vaitino. Tela la, ne sopo a ia ki te poti, tai momea atu ki tai, kae ne ‵nofo a tino katoa i te tafatai.  Ne akoako atu ne ia a mea e uke ki a latou e auala i tala fakatusa kae fai atu:  “Faka‵logo mai. E isi se tino ‵toki lakau ne fano o ‵toki a fuaga.  I te taimi ne ‵toki ei ana fuaga, ne ta‵tela atu a nisi fuaga i tafa o te auala. Ne o‵mai a manu eva, kai ei ne latou.  Ne ‵to atu a nisi fuaga ki koga fatufatua, kolā e se uke a one i ei, kae ne ‵somo fakavave aka a fuaga konā ona ko te manifi o te one i ei.  Kae i te ‵kasamaiga o te la, velasia ei a fuaga konā, kae ona ko te mea e seai ne olotou aka, ‵mate atu ei.  Ne ‵to atu foki a nisi fuaga i va o lakau makai‵kai kolā ne ola aka, ola sai‵tia ei a fuaga konā kae se ‵fua mai.  A ko nisi fuaga ne ‵to atu ki luga i te laukele ola ‵lei, kae ne kamata o ‵fua mai i taki tolusefulu, taki onosefulu, mo taki selau.”  Kae ne toe fai atu a ia penei: “A te tino telā e isi ne ana taliga, ke na fakalogo la ki ei.” 10  I te taimi ne nofo tokotasi ei a Iesu, ne olo atu ki a ia a nisi tino fakatasi mo te toko sefululua o fesili atu ki a ia e uiga ki tala fakatusa konā. 11  Ne tali atu a ia ki a latou: “Ko oti ne tuku atu ki a koutou a mea ‵funa kae tapu o te Malo o te Atua, kae ka taku atu ki tino i tua a mea katoa e auala i tala fakatusa. 12  Me e tiga eiloa e ‵kilo atu ki ei kae e se lavea ne latou, e tiga eiloa e lagona ne latou kae se iloa ne latou te uiga o mea konā, ko te mea ke se ‵fuli mai latou ke fakamagalo atu olotou agasala.” 13  E se gata i ei, ne fai atu a ia ki a latou: “Kafai e se iloa ne koutou te tala fakatusa tenei, e malamalama la pefea koutou i nisi tala fakatusa? 14  “Ne ‵toki ne te tino ‵toki lakau te muna. 15  Konei la a tino i tafa o te auala telā ne ‵toki i ei te muna, kae i te taimi eiloa ne lagona ei ne latou a te muna tenā, ko Satani eiloa ko fanatu kae ave ne ia keatea te muna telā ne ‵toki i loto i a latou. 16  Kae e penā foki a mea kolā ne ‵toki i koga fatufatua; i te taimi eiloa ne lagona ei ne latou te muna, talia ei ne latou mo te fia‵fia. 17  Kae seki ‵mau olotou aka i loto i a latou. Ne ola aka latou i se taimi toetoe; kae ko te taimi eiloa ne oko atu ei a fakalavelave mo fakasauaga ona ko te muna, pa‵ku ei latou. 18  A ko nisi fuaga kolā ne ‵toki i va o lakau makai‵kai, ko latou kolā ne lagona ne latou te muna, 19  kae ona ko manavasega o te olaga tenei mo te ‵gali fakaloi‵loi o koloa mo te manako ki nisi mea katoa, ne fai ei ke ola sai‵tia te muna, ko se fua mai ei. 20  A ko fuaga kolā ne ‵toki i te laukele ola ‵lei ko latou kolā ne lagona ne latou te muna kae ne talia ne latou mo te fia‵fia kae ne ‵fua mai i taki tolusefulu mo taki onosefulu mo taki selau.” 21  Kae ne fai atu a ia ki a latou: “E a, e isi se moli e tuku mai lalo i se kete io me se moega? E a, e se tuku atu ki luga i se tugamoli? 22  Me e seai se mea ‵funa telā e se fakaasi mai; e seai se mea e kofu faka‵lei ke galo telā e se tuku faka‵sau mai ki tua. 23  A ia telā e isi ne ana taliga, ke na fakalogo la ki ei.” 24  Ne toe fai atu a ia ki a latou: “‵Saga tonu ki mea kolā e lagona nei ne koutou. Ko te fua telā e fua atu ne koutou, ka toe fua mai foki ki a koutou, e tonu, ka toe fakaopoopo atu a nisi mea ki a koutou. 25  Me ko te tino telā e isi ne ana mea, ka toe tuku atu a nisi mea ki a ia, a ko te tino telā e seai ne ana mea, ka tapale foki mai i ei a nai mea kolā e nofo mo ia.” 26  Ne toe fai atu a ia: “Tela la, a te Malo o te Atua e fakatusa ki se tagata e ‵pei atu ne ia a fuaga ki te laukele, 27  kae ne moe i te po kae ala aka i te ao, ko ‵somo aka a fuaga kae ko maluga, kae e se iloa ne ia me ne ‵tupu aka pefea. 28  Ne fakaola malielie aka ne te laukele i a ia eiloa a te fuaga. A te mea muamua ko ana lau, tafa atu ki ei ko kausaito, kae fakamuli loa ko fui saito kolā ko ma‵tua ‵lei. 29  Kae i te taimi ko ma‵tua ei a fuataga, ko ‵kati ei ki te naifi, me ko oko ki te ‵tau e tau ei a fuataga.” 30  Ne toe fai atu tou tagata: “Se a te mea ka fakatusa ne tatou ki ei te Malo o te Atua, io me se a te tala fakatusa ka fai ne tatou e uiga ki ei? 31  E fai te Malo tenā e pelā me se fuaga o te sinapi. I te taimi e ‵toki ei i te laukele ko te ‵toe fuaga foliki eiloa tenā i te lalolagi kātoa—, 32  kae kafai ko oti ne ‵toki, ko ola aka, ko fai ei te sinapi mo fai te ‵toe lakau lasi eiloa i lakau katoa kae ‵lasi foki ana kaula, ko mafai ei o fai ne manu eva o te lagi olotou ofaga i malumaluga o ana kaula.” 33  Tela la, ne faipati atu ne ia te muna a te Atua ki a latou e auala i tala fakatusa e uke penā, e ‵tusa mo te lotou mafai o fakalogo‵logo ki ei. 34  E tonu, e se mafai o faipati atu a ia ki a latou e aunoa mo se tala fakatusa, kae ko fakamatala atu ei ne ia a mea katoa konā ki ana soko i a latou aka eiloa. 35  I te afiafi o te aso tenā, ne fai atu a ia ki a latou: “Tatou ka olo ki te suā feitu o te vai.” 36  I te otiga ne uga ne latou a tino ke olo, ‵sopo ei latou ki te poti kae e isi aka foki ne nisi poti i konā. 37  Ne poko se kaumatagi lasi kae ne ‵fati a galu ki loto i te poti, toeitiiti eiloa ko pulu. 38  A ko Iesu e tō tena moe i te taumuli. Ne ‵fagu ne latou a ia kae fai atu: “Te Faiakoga, e a, e se lavea ne koe i a tatou ko pili o ‵mate?” 39  Ne tu aka tou tagata ki luga kae ‵liko ne ia te matagi kae fai atu ki te tai: “Malū! Filemu!” Ne mate te matagi kae malū palapala te tai. 40  Ne fai atu a ia ki a latou: “Kaia e ma‵taku ei koutou? E a, e seai eiloa se otou fakatuanaki? 41  Kae ne ma‵taku malosi eiloa latou kae fai aka olotou pati, penei: “Ko oi la te tino tenei? E faka‵logo foki te matagi mo te tai ki a ia.”

Fakamatalaga mai lalo