Fanatu ki te fakasologa

Fanatu ki te fakasologa o mataupu

Molimau a Ieova

Fili se `gana Tuvalu

Maleko 3:1-35

3  Ne toe ulu atu a ia ki loto i se sunako e tasi telā ne nofo i ei se tagata e ‵mate tena lima.  Tela la, ne lamalama a ia ne te kau Falesaio i te mea ma faka‵lei ne ia te tagata tenā i te Sapati, ke ‵losi atu ei ki a ia.  Ne fai atu a ia ki te tagata e ‵mate tena lima: “Tu ki luga kae vau ki te kogaloto.”  Fai atu ei a ia ki a latou: “E mata, e saoloto i te Sapati ke fai se galuega ‵lei io me se galuega masei, ke fakasao io me tamate se tino? Kae ne seki fai‵pati latou.  Ne kilokilo atu a ia ki a latou katoa mo te ‵mae o tena loto, ne fanoanoa malosi a ia ona ko te ma‵keke o olotou loto, fai atu ei a ia ki te tagata tenā: “‵Fola mai tou lima.” Kae ne ‵fola atu ne ia tena lima, ko te mea eiloa ko ‵lei.  Ne olo a Falesaio ki tua kae ne fono fakavave latou mo tino o te potukau a Helota ke tamate ne latou a ia.  Kae ne olo atu a Iesu mo ana soko ki te vai, kae ne tau‵tali atu i a ia a tino e tokouke mai i Kalilaia mo Iuta.  Ne olo atu ki a ia a tino e tokouke mai i Ielusalema mo Itumaia mo koga i te suā feitu o te Iolitana mo koga i tafa o Tulo mo Saitonu, i te ‵logoga i mea e uke kolā ko fai ne ia.  Ne fai atu a ia ki ana soko ke toka faeloa se tamā poti ke fakaaoga ne ia i te mea ma fakatauteke mai a te vaitino ki a ia. 10  Me ne faka‵lei ne ia a tino e tokouke, ne fakatauteke mai ei a tino kolā e pokotia i masaki ma‵sei ke pa‵tele atu fua latou ki a ia. 11  Ke oko foki ki agaga ma‵sei, i so se taimi e lavea ei ne latou a ia, e to‵tuli ifo latou i ana mua kae ka‵laga atu: “A koe ko te Tama a te Atua.” 12  Kae e uke a taimi ne fakatonu malosi atu ei a ia ki a latou ke mo a e fakailoa atu ne latou a ia. 13  Ne kake aka a ia ki luga i se mauga kae fakatonu atu ke olo aka foki a tino kolā ne manako a ia ki ei, kae ne olo aka ei latou ki a ia. 14  Ne fili ne ia se potukau e toko sefululua, kae ne fakaigoa foki ne ia latou ki apositolo ke olo fakatasi mo ia kae ke uga atu foki latou o talai 15  kae ke maua foki ne latou te malosi o afuli keatea a temoni. 16  Kae ne aofia i te potukau e toko sefululua telā ne fili ne ia ko Simona, telā ne fakaigoa foki ne ia ki a Petelu, 17  Iakopo te tama a Sepetaio mo Ioane, te taina o Iakopo (ne fakaigoa foki ne ia a lāua konei ki a Poaneki, telā e fakauiga ki “Tama a te Fa‵tili”), 18  Anitelea, Filipo, Patolomaio, Mataio, Toma, Iakopo te tama a Alefaio, Tataio, Simona te tino loto finafinau,* 19  mo Iuta te Isikaliota, telā ne fakatogafiti fakamuli ne ia a Iesu. Ne fanatu a ia ki loto i se fale. 20  Ne toe mumu atu te vaitino ki ei, kae ne seki mafai ei ne latou o ‵kai. 21  Kae i te ‵logoga o ana kāiga i te mea tenā, olo atu ei latou o puke mai a ia, kae fai aka penei: “Ko masei tena ulu.” 22  Ne fai atu foki a failautusi kolā ne olo atu mai i Ielusalema: “Ko nofo i a ia a Pelesepulo, kae afuli ne ia a temoni e auala i te pule o temoni.” 23  Tela la, ne kalaga atu ei a ia ki a latou, kae faipati atu ki a latou e auala i tala fakatusa: “E mafai pefea o afuli ne Satani a Satani? 24  Kafai e se loto tasi se malo, e se mafai o tumau te malo tenā, 25  kae kafai e se loto tasi se kāiga, e se mafai foki o tumau te kāiga tenā. 26  Kafai foki e taua atu a Satani ki a ia eiloa kae sē loto tasi ana tino, e se mafai o tumau a ia, kae ka iku atu eiloa ki tena fakaseaiga. 27  E tonu, e seai se tino e ulu ki loto i te fale o se tagata mafi e mafai o kaisoa ne ia ana mea vagana ke saisai muamua ne ia te tagata mafi tenā. Ko mafai ei o puke ne ia ana kope mai tena fale. 28  Au e fai ‵tonu atu ki a koutou me ka fakamagalogina a agasala katoa a tino, faitalia me ne a agasala e fai ne latou mo muna ma‵sei a latou e fai. 29  Ka ko te tino telā e muna masei ki te agaga tapu e se mafai o fakamagalo ke oko eiloa ki te se-gata-mai, ko te agasala telā e se mafai o fakamagalo.” 30  Ne fai atu ne Iesu a pati konei me ne fai mai latou: “E nofo i a ia se agaga masei.” 31  Ne oko atu i te taimi tenā a tena mātua mo ana taina, a koi ‵tu latou i tua, kae uga atu ne latou se tino ke kalaga ki a ia. 32  Ne saga‵saga fakatamilo a te vaitino i feitu katoa o Iesu, fai atu ei a latou ki a ia: “Kiloke! A tou mātua mo ou taina kolā i tua, e ‵sala ki a koe.” 33  Kae ne tali atu a ia ki a latou: “Ko oi toku mātua kae ko oi foki oku taina?” 34  Ne ‵taki ifo a mata o tou tagata ki a latou kolā e ‵nofo fakapukupuku i ana feitu, kae fai atu: “Kiloke! Tenei toku mātua kae konei oku taina! 35  So se tino e fai ne ia te loto o te Atua, ko ia eiloa tenā toku taina mo toku tuagane mo toku mātua.”

Fakamatalaga mai lalo

Mal 3:18  Io me ko “Simona te Kanana.”