Fanatu ki te fakasologa

Fanatu ki te fakasologa o mataupu

Molimau a Ieova

Fili se `gana Tuvalu

Maleko 2:1-28

2  E tiga te feitu tenā, i nai aso mai tua ifo i ei, ne mafai o toe fanatu a ia ki Kapanaumi kae ne iloa aka ne tino i a ia ko toe foki atu.  Ona ko te tokouke o tino ne mumu atu ki a ia i konā, ko se ofi ei latou i te fale, ke oko eiloa ki tua o te mataloa, kae ne kamata ei o akoako atu ne ia a muna a te Atua ki a latou.  Kae ne aumai ne latou se tino ‵pili telā e sau mai ne tāgata e tokofa.  Kae ne seki mafai ne latou o avatu a ia ki a Iesu ona ko te sai‵tia o te fale, ne fakapu ne latou te tuafale mai i luga o te koga e nofo ei a ia, tukutuku ifo ei ne latou te moega telā e moe i ei te tino ‵pili tenā.  I te laveaga ne Iesu te lasi o te lotou fakatuanaki, fai atu ei a ia ki te tino ‵pili tenā: “Taku tama, au agasala ko magalo.”  Ne ‵nofo atu foki i konā a nisi failautusi, kae i olotou loto ne mafau‵fau latou penei:  “Kaia e faipati ei penei te tagata tenei? A ia e faipati mai e pelā mo te Atua. Ko oi e mafai o fakamagalo ne ia agasala, i tafa o te Atua?”  A ko Iesu, ne iloa fakavave ne ia olotou mafaufauga, fai atu ei ki a latou: “Kaia e mafau‵fau ei koutou penā i otou loto?  Se a te mea e faigofie atu, ko te fai atu ki te tino ‵pili, ‘Au agasala ko magalo,’ io me, ‘Tu ki luga, puke tou moega, kae sasale’? 10  Kae ko te mea ke iloa ne koutou me e isi se malosi o te Tama a te tagata o fakamagalo a agasala i te lalolagi—” fai atu ei a ia ki te tino ‵pili: 11  “Au e fai atu ki a koe, Tu ki luga, puke tou moega, kae fano ki tou fale.” 12  I konā eiloa, tu aka tou tagata, puke fakavave tena moega kae sasale ki tua i mua o latou katoa. Ne ofo masei latou, ‵viki atu ei latou ki te Atua, olotou muna: “Ne seki lavea aka eiloa ne matou se vaegā mea penei.” 13  Ne toe fano a ia ki tua i tafa o te vai kae ne mumu atu ki a ia a te vaitino, kae ne kamata o akoako atu ki a latou. 14  I tena auala o fano, lavea ei ne ia a Levi, te tama a Alefaio, e sagasaga i te ofisa ao lafoga, kae fai atu ki a ia: “Tautali mai i a au.” Ne tu aka tou tagata, tautali atu ei i a ia. 15  Fakamuli ifo, ne sagasaga a ia i te taipola i te fale o Levi, kae e tokouke a tino ao lafoga mo tino agasala ne saga‵saga fakatasi mo Iesu mo ana soko i konā, me ne tokouke ‵ki a latou i konā ne fai mo fai ana soko. 16  Kae i te laveaga ne failautusi a Falesaio i a ia e ‵kai fakatasi mo tino agasala mo tino ao lafoga, fai atu ei latou ki ana soko: “Kaia e ‵kai fakatasi ei a ia mo tino ao lafoga mo tino agasala?” 17  I te lagonaga ne Iesu a te mea tenei, fai atu ei ki a latou: “A tino kolā e ma‵losi ‵lei e se ma‵nako ki se tokita, kae ko tino fua kolā e ma‵saki. Au ne vau o kalaga ki tino agasala kae e se ki tino amio‵tonu.” 18  Ne fakaliki‵liki sale a soko o Ioane e pelā foki mo Falesaio. Tela la, ne olo atu latou ki a ia kae fai atu: “Kaia e fakaliki‵liki ei a soko o Ioane mo soko o Falesaio a ko ou soko e se fakaliki‵liki?” 19  Fai atu ei a Iesu ki a latou: “A koi ‵nofo fakatasi a te tamataene ka fakaipoipo mo latou, e se ‵tau o fakaliki‵liki ana taugasoa, e tonu au me ikai? I te taimi e ‵nofo ei latou mo te tamataene ka fakaipoipo e se mafai o fakaliki‵liki latou. 20  Kae ka oko mai te aso e ave ei keatea te tamataene ka fakaipoipo mai i a latou, ko fakaliki‵liki ei latou i te aso tenā. 21  E seai se tino e ‵sui ne ia se potu laugatu fou ki se gatu mago. Kafai e fai ne ia te mea tenā, ka ‵sae ne te malosi o te potu laugatu fou a te gatu mago, ko na lasi atu ei te masaega. 22  E se gata i ei, e se utu ne se tino a te uaina fou ki loto i taga uaina mua. Kafai e fai penā, ka ma‵pa a taga konā, ko māumāu ei te uaina fakatasi mo taga konā. Kae e utu ne tino a te uaina fou ki loto i taga uaina ‵fou.” 23  I te oloatuga a Iesu mo ana soko i loto i te fatoaga o saito i te Sapati, tau ei ne ana soko a kaufui saito. 24  Ne fai atu a Falesaio ki a ia: “Kilo atu! Kaia e fai ei ne latou te mea telā e tapu i te Sapati?” 25  Kae ne fai atu a ia ki a latou: “E a, e seki fai‵tau koutou ki mea ne fai ne Tavita i te taimi ne fia‵kai ei a ia mo ana tāgata? 26  I te tala e uiga ki a Aviata, te faitaulaga pule, i te taimi ne ulu atu ei a Tavita ki loto i te fale o te Atua, kae kai ne ia a falaoa kolā ko oti ne ofo atu ki te Atua, telā e tapu ma kai ki ei so se tino kae na ko faitaulaga fua, kae ne tuku atu foki ne ia a nisi mea ki ana tāgata? 27  Tela la, fai atu ei a ia ki a latou: “A te Sapati ne fai mō te ‵lei o tino, kae seki faite a tino mō te ‵lei o te Sapati. 28  Tela la, a te Tama a te tagata ko te Aliki eiloa o te Sapati.”

Fakamatalaga mai lalo