Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Tusi Tapu i te Itaneti | NEW WORLD TRANSLATION (Ne `Lomi i te 1984)

Maleko 15:1-47

15  I te vaveao eiloa tenā, ne fono fakavave a faitaulaga pule mo toeaina mo failautusi, ke oko ki te Sanetulini kātoa, saisai ei ne latou a Iesu kae ‵taki atu ki a Pilato.  Ne fesili atu a Pilato ki a ia: “A koe ko te Tupu o tino Iutaia?” Ne tali atu a Iesu ki a ia: “Tenā eiloa e fai mai ne koe.”  Kae ne ‵losi atu te faitaulaga sili ki a ia e uiga ki mea e uke.  Ne fesili atu a Pilato ki a ia, ana muna: “E a, e seai sau tali? Onoono ki te uke o ‵losiga a latou ki a koe.”  Kae ne seki toe tali atu a Iesu, kamata ei o ofo a Pilato.  I aso fakamanatu takitasi, ne masani o ‵tala atu ne ia ki a latou se pagota e tokotasi, telā e fakatagi mai latou ki ei.  I te taimi tenā ne ‵loka i te falepuipui a te tagata e igoa ki a Palapa fakatasi mo tino kolā ne tatino ona ko te lotou ‵teke ki te malo.  Ne olo atu te vaitino kae ne kamata o fakatagi atu e ‵tusa mo te mea telā e fai sale ne Pilato ki a latou.  Ne tali atu a ia ki a latou, ana muna: “E ma‵nako koutou ke ‵tala atu ne au ki a koutou te Tupu o tino Iutaia?” 10  Ne iloa ne ia me ona ko te loto ma‵sei o faitaulaga pule, ne tuku atu ei ne latou a Iesu ki a ia. 11  Kae ne fakamalosi aka ne faitaulaga pule a te vaitino ke fai atu ke ‵tala mai ne ia a Palapa. 12  Kae ne toe fai atu a Pilato ki a latou: “Se a la te mea ka fai ne au ki a ia telā e fakaigoa ne koutou ki te Tupu o tino Iutaia?” 13  Ne toe paka‵laga atu latou: “‵Tuki atu a ia!” 14  Ne fai atu a Pilato ki a latou: “Kaia? Se a tena mea masei ne fai?” Kae ne paka‵laga aka faeloa latou ki luga: “‵Tuki atu a ia!” 15  Ona ko te manako o Pilato o fakafiafia atu ki te vaitino, ne ‵tala atu ei ne ia a Palapa ki a latou, kae i te otiga ne ‵kini a Iesu, tuku atu ei ke ‵tuki ki te lakau. 16  Ne ‵taki atu ne sotia a ia ki te koga ateatea i loto i te palesi o te kovana, kae ne ‵luku mai ne latou a sotia katoa, 17  ne fakapei ne latou ki luga i a ia se gatu violeta kae ‵fili ne latou se foualiki ki mea makai‵kai kae fakafou atu ki ei. 18  Kae ne kamata o fakatalofa atu latou ki a ia: “Talofa, te Tupu o tino Iutaia!” 19  Ne pagopago foki ne latou tena ulu ki se potulakau kae popoki atu ki a ia, kae ne to‵tuli ifo latou kae ifo atu ki a ia. 20  Oti aka loa, i te otiga o olotou faifaiga fakatauemu, ne tapale ne latou te gatu violeta kae toe fakapei atu ki ana gatu eiloa, ave ei ne latou o ‵tuki ki te lakau. 21  Ne fakamalosi atu foki latou ki se tino ne ui atu i konā, ko Simona mai Kulene, telā ne vau mai i te vao, ko te tamana o Alesana mo Lufo, ke amo ne ia te lakau fakasaua* o Iesu. 22  Ne avatu ne latou a ia ki Kolokota, ko tena uiga māfai e ‵fuli, ko te “Koga o Gatiulupoko.” 23  Ne taumafai latou i konā o tuku atu ki a ia te uaina e palu mo te vailakau ko te mulo, kae ne seki inu a ia ki ei. 24  Kae ne ‵tuki ne latou a ia ki te lakau, kae ne tufa ne latou ana gatu i a latou eiloa i te faiga o se vili, ke iloa ei me tefea te vaega e ‵tau o maua ne te tino. 25  Ne oko atu ki te tolu* o itula, ‵tuki ei ne latou a ia ki te lakau. 26  Kae ne tusi mai luga i a ia a te ‵losiga tenei, “Te Tupu o tino Iutaia.” 27  E se gata i ei, ne ‵tuki foki ne latou fakatasi mo ia a tino kaisoa e tokolua, e tokotasi i tena feitu fakaatamai, kae e tokotasi i tena feitu fakamaui. 28*  —— 29  A ko tino kolā ne ui atu i konā ne pati ma‵sei ki a ia, ne lūlū olotou ulu kae fai atu: “Ko koe telā ka ofa ne koe te faletapu kae toe fakatu aka ne koe i aso e tolu, 30  fakasao aka la ne koe a koe eiloa kae fanaifo ki lalo mo te lakau fakasaua.” 31  E penā foki a faitaulaga pule, ne fai olotou pati fakatauemu i a latou eiloa fakatasi mo failautusi kae fai aka: “Ne faka‵sao ne ia a nisi tino kae e se mafai o fakasao ne ia a ia eiloa! 32  Ke na fanaifo nei a te Keliso, te Tupu o tino Isalaelu mai te lakau fakasaua, ko te mea ke lavea kae tali‵tonu ei tatou.” Ke oko foki eiloa ki tino kolā ne ‵tuki fakatasi mo ia ne fakatauemu atu foki ki a ia. 33  I te okoga ki te ono o itula,* ne pouli ei te fenua kātoa ke oko eiloa ki te iva o itula.* 34  Kae ko te iva o itula, ne kalaga aka ei a Iesu i se leo lasi, ana muna: “Eli, Eli, lama sapakatani?” ko tena uiga māfai e ‵fuli: “Toku Atua, toku Atua, kaia ko tiaki ei au ne koe?” 35  Kae i te lagonaga ne nisi tino kolā ne takatu‵tu ‵pili atu, fai aka ei latou penei: “Onoono! A ia ko kalaga ki a Elia.” 36  Kae ne tele atu se tino, ufi ne ia se omomi ki uaina ‵vi, faka‵piki atu ki te mata o se lakau kae tuku atu ke inu a ia, ana muna: “Tuku malie a ia! Ke onoono aka tatou me e mata, e vau a Elia o tuku ifo a ia ki lalo.” 37  Kae ne tagi pakalaga a Iesu i se leo lasi, ko te mea eiloa ko mate. 38  Kae ne masaelua te ‵pui laugatu i te koga tapu, mai luga ki lalo. 39  I te laveaga ne te ofisa o te kautau telā ne tu atu i konā me ne mate a ia mai lalo i fakanofonofoga konei, fai atu ei tou tagata: “Tenei eiloa te Tama a te Atua.” 40  E isi foki ne fāfine ne kilo‵kilo atu ki ei mai se koga tai ‵mao, ne aofia i a latou konā ko Malia te Makatala e pelā foki mo Malia te mātua o Iakopo Foliki mo Iose, mo Salome, 41  kolā ne olo atu faeloa i a ia kae tavini atu ki a ia i tena nofoga i Kalilaia, mo nisi fāfine e tokouke kolā ne olo fakatasi mo ia ki Ielusalema. 42  Ne oko atu ki te afiafi kae ona ko te Aso Fakatoka, telā ko te aso mai mua o te Sapati, 43  ne vau ei a Iosefa mai Alimataia, se tino fakaaloalogina o te Kaupule, telā e nofo fakatalitali foki ki te Malo o te Atua. Ne loto toa tou tagata ke fanatu ki mua o Pilato kae fakamolemole atu ke tuku atu te foitino o Iesu. 44  Kae ne mafaufau a Pilato me ko Iesu nei ko oti ne mate, kae ne aumai ne ia te ofisa o te kautau kae fesili atu me ko oti ne mate a Iesu. 45  I te otiga ne fakamautinoa ne ia mai te ofisa o te kautau, talia ei ne ia ke tuku atu te foitino mate ki a Iosefa. 46  Ne ‵togi ne Iosefa a laugatu lino ‵gali, tuku ifo a ia ki lalo, kae ‵kofu ne ia te foitino ki laugatu lino ‵gali konā kae fakatakato ne ia i te tanuga telā ne tuki ne ia i te papa, kae fakateka atu se fatu ki te mataloa o te tanuga. 47  Kae ne kilo‵kilo atu faeloa a Malia te Makatala mo Malia te mātua o Iose ki te koga telā ne fakamoe ei a ia.

Fakamatalaga mai lalo

 Ke onoono ki te Mataupu Fakaopoopo e 7.
 “Te tolu o itula” e ‵pau mo te itula e 9 i te taeao.
 Ke onoono ki te fakamatalaga mai lalo i te Mat 17:21.
 “Te ono o itula” e ‵pau mo te itula e 12 i te tutonu.
 “Te iva o itula” e ‵pau mo te itula e 3 i te fakaafiafi.